Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٣٣

ہیر وارث شاہ بند ٣٣

June 5th, 2007
5 / 5 (1 Votes)

مسجد بیت العتیق آہی خانہ کعبیوں ڈول اتاریا نیں
گویا اْقصی دے نال دی بھین دوئی شاید صندلی نور اساریا نیں
پڑھن فاضل درس درویش مفتی خوب کڈھ الحان پرکاریا نیں
تعلیل میزان تے صرف بہائی صرف میر بھی یاد پکاریا نیں
قاضی قطب تے کنز انواع باراں مسعودیاں جلد سواریا نیں
خانی نال مجموعہ سلطانیاں دے اتے حیرت الفقہ نواریا نیں
فتاوی برہنہ منظوم شاہاں نال زبدیاں حفظ قراریا نیں
معارج النبوت خلاصیاں توں روضہ نال اخلاص پساریا نیں
زرداریاں دے نال شرح ملا زنجانیاں نحو نتاریا نیں
کرن حفظ قرآن تفسیر دوراں، غیر شرح نوں دریاں ماریا نیں



مشکل لفظاں دے معنے
ڈول۔ ڈیزائن، نقشہ
اقصی۔ بیت المقدس دی اک مسیت جیس دا ذکر قرآن وچ معراج شریف دے سلسلے وچ آیا ہے۔ سب توں پہلاں حضرت سلیمان نے ایتھے اک عبادت دی تھاں بنائی سی جیہڑی بنی اسرائیل دے نبیاں دا قبلہ سی۔
دوئی۔ دوجی
صندلی۔ عمارت دے بناون وچ ورتیا جاون والا اُچا سٹول
اسارنا۔ بنانا
پرکاریا۔ قسم، دو شیواں یاں لفظاں وچ فرق کرنا جیویں قاری ک تے ق وچ کردا ہے۔
سواریا۔ سودھیا۔ غلطیاں توں پاک کرنا
نوارنا۔ اک دوجی کتاب دے حوالے دوہاں نوں سہارا دینا، غلطیاں کڈھنا، کسے کتاب وچوں وادھو گھاٹو مواد کڈھنا
قراریا۔ قرات دے نال
پساریا۔کھول کے بیان کرنا
نتاریا۔ شفاف کیتا

مطلب
وارث شاہ ایس بند وچ اپنا اوہ ڈھنگ ورتدیاں پہلاں شیواں دا سوہپن دوروں وکھاندا ہے تے پھیر اوس دے اندر لے جاکے اوس دا گند مند ننگا کردا ہے۔ اسیں ویکھیا سی جو اوس پہلاں تخت ہزارے نوں دوروں وکھایا سی تے کہیا سی ''گویا بہشت زمین تے آیا اے'' تے پھیر اوس دے اندر جاکے دسیا سی جو اوسے تخت ہزارے وچ ''غرض ہے بہت پیاری، ہور ساک نہ سین نہ انگدے نیں '' دسیا سی جتھے بھرا بھرا نوں مکاون تے تیار بیٹھا ہے تے کوئی کسے دا بیلی نہیں۔

ایتھے وی وارث شاہ ہوبہو اوہو کم کر رہیا ہے۔ ہن اوہ مسیت دا ڈیزائن خانے کعبیوں آیا دس رہیا ہے تے اوس نوں مسجد اقصی دی بھین بنا رہیا ہے۔ ہنے اگے جاکے تسیں ویکھو گے جو اوہ اوسے مسیت دے اندر دی کہانی ایہہ کہہ کے کرے گا جو ''وارث شاہ وچ حجریاں فعل کردے ملاں جوترے لاوندے واہیاں نوں''

ایس بند وچ وارث شاہ ایہہ وی دس رہیا ہے جو اوہ جیس ملاں نال ٹاکرا کرن جا رہیا ہے اوہ کوئی ان پڑھ بندہ نہیں سگوں اوہ اوس ویلے دی مسیتڑ مذہبی ستھ دا سچا لشکارا ہے۔اصل وچ تے وارث شاہ اپنے چشتیہ مسلک دے وچار دھارا دا مسیتڑ مذہب نال ٹاکرا کروا رہیا ہے ( وارث شاہ دی پوری لکھت دی مڈھلی سیدھ ہی وچاردھارا دا ٹاکرا سی)۔

مدرسے دا اوس ویلے دا کورس ویکھ کے لگدا ہے جو اوتھے قرآن، حدیث، فقہ، نحو تے منطق پڑھائی جاندی سی۔ بہتے مدرسیاں وچ فقہ حنفی پڑھائی جاندی سی تے شاید ایسے لئی اجے وچ پاکستان تے ہندوستان وچ حنفی مسلک دے لوک بوہتے ہین۔ اج وی مدرسیاں وچ فقہ دیاں اوہو کتاباں پڑھایاں جاندیاں ہین جیہڑیاں دو سو سال پہلاں پڑھایاں جاندیاں سن۔

ایتھے اسیں اک ہور گل ول وی دھیان دواؤنا چاہونے ہاں۔ سارے ہندوستان دے مدرسیاں وچ اک ہی کورس پڑھایا جاندا سی تے اوس دے خلاف وچار دھارا دی لہر وی اکو جیہی سی۔ ایسے لئی اسیں ویکھنے آں جو اٹھارویں صدی وچ پنجاب سندھ تے ہندوستان دے ہور علاقیاں دے صوفی وچاراں وچ اکسارتا تے سانجھ ہے۔
؎
بند وچ دتیاں درسی کتاباں

تعلیل۔ عربی فارسی دی من بھانویں لغت
تعطیل۔ (سبعئہ قرآت) ابو العباس احمد بن محمد موصلی نحومی
میزان۔ (میزان الصرف) مصنفہ مولوی سراج الدین اودھی
صرف بہائی۔ عربی زبان دی فارسی وچ مشہور کتاب بہا الدین عاملی، لقب شیخ بہائی
صرف میر۔ ربی زبان شروع کرن والیاں لئی فارسی وچ لکھی صرف میر سید شریف جرجانی
قاضی۔ (مبارک) (شرح سلم العلوم ) منطق قاضی محمد مبارک سوم گوپاموی
قطبی۔ (شرح رسالہ شمسیہ مصنفہ نجم الدینقزوینی ) منطق قطب الدین رازی
کنز ۔ (کنز الدقائق) عربی وچ فقہ حنفی ابوالبرکات حافظ الدین عبداللہ نسفی
انوار باراں۔ (باراں انواع) پنجابی شعراں وچ فقہ دی کتاب عبداللہ عبدی لاہوری
مسعودی۔ (صلوۃ مسعودی) حنفی فقہ دی نماز تے سلام دیاں دعاواں شیخ مسوعد ابن یوسف سمرقندی
خانی۔ مجموعہ۔ فقہ۔ کمال الدین ناگوری
سلطانیہ۔ (شرح کتاب نورانیہ) حاجی بابا ابراہیم ابن عثمان رومی
حدیقہ سلطانیہ۔ (توحید عدل نبوت تے بحث)
تحفہ سلطانی۔ شریعت محمدی۔ فارسی وچ ١٤٤٩ وچ لکھی گئی
حیرت الفقہ۔ (حیرت الفقہا) فقہ حنفی عبدالگفار ابن لقمانکردری الحنفی
معارج النبوت۔ (فی مدارج الفتوت) سیرت النبی معین الدین حاجی محمد فراہی
خلاصہ۔ (خلاصہ کےدانی) فقہ حنفی دے مطابق نماز دے طریقے بارے نکا جیہا رسالہ لطف اللہ نفسی
روضہ۔ (روضتہالاصفیانی فی ذکر الانبیائ) عربی کتاب، نور محمدی دا ذکر، حضرت آدم توں لے کے محمد رسول اللہ، چار خلیفے تے کربلا دے شہیداں بارے کتاب ترجمہ نول کشور لکھنؤ نے ١٢٤٩ ھ وچ چھاپیا
عثمانیہ۔ صرف دا ایہہ مڈھلا قاعدہ فخرالدین زرداری ہوراں اپنے شاگرد سراج الدین عثمانی لئی لکھیا تے اوس دا ناں عثمانیہ رکھیا پر اوہ رسالہ زرداری دے ناں نال مشہور ہویا
شرح ملا حسن۔ (منطق دی کتاب سلم العلوم، محبت اللہ بہاری دی شرح لکھن والے ملا محمد حسن فرنگی محلی
زنجانی نحو۔ (نحو دی کتاب الہادی فیالنحو) لکھاری عبدالوہاب بن ابراہیم زنجانی
فتاویٰ برہنہ۔ فارسی وچ فقہ حنفی دی کتاب، نول کشور پبلشرز ایس نوں اردو وچ دو جلداں وچ چھاپ چکیا ہے
منظام شاہان۔ (ٹھفہ شاہی) لکھاری علامہ قطب الدین ، ایہہ چودھویں صدی وچ لکھی گئی
زہدہ۔ (زبدۃ الصرف) زبندۃ التواریخ ، دہلی دے سلطاناں دا حال شاید مولوی عبالکریم نے لکھی۔



Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels