Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 100

ہیر وارث شاہ: بند 100

August 20th, 2009
5 / 5 (1 Votes)

وَلَوْبَسَطَ اللّٰہُ الرِّزْقَ رج کھائیکے مستیاں چائیاں نی
کُلُوْا وَاشْرَبُوْا وَلاَ تُسْرِفُوْا نہیں مستیاں کرنیاں آئیاں نی
کتھوں پچن اےہناں مشٹنڈیاں نوں نِت کھانیاں دُدھ ملائیاں نی
وَمَا مِنْ دَ آبَّـۃٍ فِی ا لْاَرْضِ ایہہ لے سانبھ مجھیں گھر آئیاں نی

اوکھے لفظاں دے معنی
وَلَوْبَسَطَ اللّٰہُ الرِّزْق لِعِبَادِہٖ: جے رب اپنے بندیاں دا رزق ودھا دیندا۔(اگلا حصہ نال رلا کے مطلب سمجھ آؤنا اے) تے اوہ زمین وچ یقیناً فساد کردے۔ کُلُوْا وَاشْرَبُوْا وَلاَ تُسْرِفُوْا:کھاؤ پیو تے فضول خرچی نہ کرو۔ پچن: ہضم ہوون۔ وَمَا مِنْ دَ آبَّـۃٍ فِی ا لْاَرْضِ: تے نہیں ہے زمین تے کوئی وی جاندار (ایہدا وی مطلب پوری آیت وچ ہونا) جیہدا رزق رب دے ذمے نہیں ہے۔

سدھا مطلب
چوچک کہندا ہے جو جدوں رب بندیاں دا رزق ودھا دیندا ہے تے اوہ رانجھے وانگوں رج کھا کے مستیاں کرن لگ پیندے نیں۔ رب نے ایہہ کہیا ہے جو کھاؤ پیو پر فضول خرچی نہ کرو۔ بہتا کھا کے مستیاں نہ کرو۔ ایہناں مشٹنڈیاں نوں ددھ ملائیاں کیویں ہضم ہو سکدیاں نیں۔ اخیرلا مصرعہ رانجھے ولوں چوچک نوں بولیا لگدا ہے جو رزق دین والا رب ہے تے توں اپنیاں مجھاں سانبھ میں گھر لیا کے اپنا فرض پورا کردتا ہے۔

کھلارواں مطلب
ایس بند وچ وارث شاہ ہوراں دی کاریگری ویکھو۔ پہلے دو مصرعیاں وچ ادھا مصرعہ قرآن دی آیت ہے تے ادھا حصہ چوچک دا اوس آیت دا اپنے لابھ لئی ورتنا۔ پہلے مصرعے وچ آیت کہندی ہے جو جے رب اپنے بندیاں دا رزق ودھا دیندا ہے تے اوس توں اگے ہونا چاہیدا ہے جو اوہ زمین تے فساد کردے نیں۔ ہن ایہہ گل تے چوچک تے پوری آوندی ہے جو رب نے اوسدا رزق بہت ودھایا ہویا ہے اوسے تے ہی فساد وی شک ہے۔ پر اوہ ایہہ گل اک عام چاکر تے لا دیندا ہے جیویں سارا دن مجھاں چارن والے تے چوچک دی دولت پیدا کرن والے رج کے روٹی کھا لین تے اوہ مستیاں کرن تے آجاندے نیں۔ مطلب ایس طبقے دے لوکاں نوں بھکھا رکھیا جاوے تے اوہ ٹھیک رہن گے۔ چوچک دی گل توں ایہہ وی لگدا ہے جو جیویں قرآن دیاں آئیتاں دا اوس دے کردار نال کوئی تعلق نہیں ایہہ صرف ماڑیاں اُتے ہی لاگو ہوندیاں نیں۔

دوجے مصرعے وچ وی چوچک قرآن دی آیت راہیں کہندا ہے جو کھاؤ پیو پر فضول خرچی نہ کرو۔ اوسدا مطلب ایہہ کڈھدا ہے جو ایہہ کامیاں بارے ہے جیہڑے بہتا کھاکے مستا جاندے نیں۔ پر ویکھو چوچک دے سماج وچ کامے نے فضول خرچی کتھوں کرنی ہے اوس نوں تے بس پیٹ بھر کھانا ہی ملدا ہے۔ جے کر فضول خرچی کر سکدا ہے تے اوہ چوچک آپ ہے۔ تسیں رانجھے دے ملن توں پہلاں ہیر دا پہناوا تے اوس دے زیور لتے یاد کرو۔ ایہہ سب کجھ فضول خرچی چوچک دے ہتھوں ہی ہو رہی ہے۔ ماڑے بندے دا گزارہ ہی نہیں ہوندا اوس فضول خرچی کاہدے نال کرنی ہے۔ پرچوچک نے مذہب نوں اپنے مقصد لئی ورتنا ہے ایس لئی اوس لئی کامے دا رج کے روٹی کھانا وی فضول خرچی ہے۔

تیجے مصرعے وچ چوچک ایہہ کہہ کے جو ددھ ملائیاں کامیاں نوں پچ نہیں سکدیاں ایہہ کہہ رہیا ہے جو ایہہ صرف حاکم میل نوں پچ سکدیاں ہین۔ اوہ بندہ جیہڑا ددھ ملائیاں دین والیاں مجھاں دے پچھے جنگل بیلے گھمدا ہے اوس نوں اوہناں مجھاں دی پیداوار دا بہتا حق نہیں ۔۔۔ اوس تے حق حاکم میل دا ہے کیوں جو مالکی اوہناں دی ہے۔ ایہہ کلاسیکل کیس ہے جو کپڑا بناون والے مزدور دی اپنی کنڈ ننگی ہوندی ہے۔ جیس تے ساحر لدھیانوی دا اک مصرعہ وی ہے:

ملیں اسی لئے ریشم کے ڈھیر بنتی ہیں ، کہ دختران وطن تار تار کو ترسیں

چوتھے مصرعے وچ رانجھا ایہہ کہہ کے جو رزق دین والا رب ہے اوس دی ساری دلیل نوں پرتا دیندا ہے۔ چوچک تے ایویں ظاہر کر رہیا سی جو رزق اوہ دیندا ہے جیس نوں ماڑے لوکاں نوں خاص وتھ وچ رہ کے ورتنا چاہیدا ہے۔
ایتھے وی ویکھو وارث شاہ ہوریں حاکم میل تے تھلڑے میلاں دے مذہب تے رب دے تصور وچ کیویں لیک کھچدے ہین!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels