Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 113

ہیر وارث شاہ: بند 113

September 24th, 2009

اِیہدھے وڈھ لُڑکے کھوہ چُونڈیاں نوں گل گھٹ کے ڈُونگھڑے بوڑرنے
سر بھن سو نال مدھانیاں دے ڈھوئی نال کھڑ لت دے توڑرنّے
ایہدا داتری نال چا ڈِھڈ پاڑو سُوا اکھیاں دے وچ پوڑرنّے
وارث چاک تھوں ایہہ نہ مُڑے مُولے اسیں رہے بہتیرڑا ہوڑرنّے

اوکھے لفظاں دے معنے
لُڑکے: کان دی کنونی، کن کی لو۔ چونڈیاں: نکیاں زلفاں۔ ڈونگھڑے بوڑ: گہری ڈبو۔ ڈھوئی: کمر۔ سُوا: بوریاں سین والی سلائی۔ پوڑ: چبھو
بہتیرڑا:بوہتا۔ ہوڑ: منع

سدھا مطلب
چوچک اپنی بیوی ملکی نوں کہندا ہے جو ہیر دے کناں دیاں لوواں وڈھ کے، وال کھوہ کے، ڈوہنگے ویہن وچ ڈوب دیوے
ایہدا سر مدھانیاں نال بھن سٹے ایس دا لک تے لتاں توڑ دیوے
ایہدا ڈھڈ داتری نال پاڑ دیوے تے ایہدیاں اکھیاں وچ سوا گھپ دیوے
ایہہ چاک دی یاری توں نہیں مڑدی حالاں اسیں ایس نوں بڑا روکیا۔

کھلارواں مطلب
ایس بند وچ دو پکھ ساہمنے آؤندے ہین۔ اک تے ایہہ جو جد مرد یا حاکم میل کول کوئی دلیل نہیں بچدی تے اوہ جبر تے ظلم نال اپنی گل منواؤندا ہے۔ دوجے ایس بند توں پتہ لگدا ہے جو اوس ویلے زنانی نال کیہ کیہ ظلم کیتے جاندے سن۔

لگدا ہے جو الزام لگی کڑی دے کن دیاں لوواں وڈھ دینا، اوس دے وال مُن دینا، اوس نوں دریا وچ ڈوب دینا، مدھانیاں یا ڈنڈیاں سر پھینہ دینا یا لتاں توڑ دینا، داتری نال ڈھڈ پار دینا، اکھاں وچ سوئے مار کے انھیاں کر دینا عام سی۔ ہن وی زنانیاں نال ایہناں وچوں بہت سارے ظلم کیتے جاندے ہین سو ایس پکھ توں اجے تیکر بہتا نہیں بدلیا۔

دوجے حاکم میل دے زور تے جبر دے ہتھیار ہین۔ پنڈ دی پدھر تے نکا موٹا چوہدری وی غنڈیاں دی ٹیم بنا کے رکھدا ہے تاں جو ویلے سر ماڑے لوکاں یا زنانیاں نوں کٹیا یا جان تو ماریا جا سکے۔ حکومت دی پدھر تے پولیس، فوج تے ہور ہتھیار بند جتھے وی حاکم میل دے اصولاں تے اوہناں دے مفاد دی رکھیا کردے ہین۔

عام طور تے دبیاں طبقیاں جیہناں وچ زنانیاں وی رلتی ہین تے حاکم میل دے مفاداں وچ سدھا ٹکرا ہوندا ہے۔ ایس ٹکرا وچ اخیر حاکم میل اپنا کنٹرول طاقت تے ہتھیار بند جتھیاں راہیں ہی کردے ہین۔ اوہ لوکاں یا محنتی طبقیاں نوں رنگے برنگے لالچ دے کے وی اوہناں دی محنت دی مفت کھٹی کھاندے ہین جیویں چوچک رانجھے دی محنت ورت رہیا ہے پر جے ایہہ لالچ کم نہ کرے تے فیر زور جبر نال کم کڈھوایا جاندا ہے۔

حاکم میل مذہب تے ریت رواج دے داء پیچ وی لڑاؤندا ہے، جیویں ملاں یا قاضی دی ورتوں ہے۔ اوہناں کولوں اپنے مفاد دے حق وچ فیصلے کرائے جاندے ہین، ہدایت نامے جاری کروائے جاندے ہین جیویں پچھلے بند وچ قاضی نوں ہیر نوں سمجھاون لئی سدیا گیا سی۔ پر جے ایہہ دلیلاں کم نہ کرن تے فیر لاٹھی گولی توں کم لیا جاندا ہے۔

ہیر نوں وی پہلاں دلیلاں تے ریت رواج دے پینتریاں نال قابو کرن دی کوشش کیتی گئی پر جدوں اوہنے دلیلاں وچ قاضی نوں جھوٹھا ثابت کر دتا تے ہن اوس تے جبر تے ظلم ورتن دیاں دھمکیاں دتیاں جا رہیاں ہین۔ ایہہ حاکم میل دا ٹھکواں ورتارا ہے تے ایس وچ کوئی حیرانی دی گل نہیں ہے۔ سو اخیر حاکم میل دی اخلاقیات دے پچھے وی ظلم تے جبر ہوندا ہے۔ ایہہ وکھری گل ہے جو بہتے ویلے اوس تے مذہب تے ریت رواج دا پردہ پایا ہوندا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels