Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٣٦

ہیر وارث شاہ بند ٣٦

June 6th, 2007

ملاں آکھیا چــونیاں ویکھدیاں ای غیر شرح توں کون ہیں دور ہو اوئے
ایتھے لچیاں دی کائی جا ناہیں پٹے دور کر حق منظور ہو اوئے
اناالحق کہا نہ کِبر کر کے اوڑک مریں گا وانگ منصور اوئے
وارث شاہ نہ ہنگ دی باس چھپدی بھانویں رسمسی وچ کافور ہووے


مشکل لفظاں دے معنے

چونیاں۔ لمے پٹے جیہڑے ساہمنیوں جوگیاں وانگ لٹکدے نیں تے پچھوں کنگھی کیتی گردن نوں ڈھک لینے نیں۔ ایہہ عام طور تے تھلڑے میل تے عام کامے لوکاں دے والاں دا ڈھنگ ہوندا سی۔
پٹے۔ لمے وال
اناالحق۔میں رب ہاں
کبر۔ غرور
اوڑک۔اخیر، انت تے
منصور۔ منصور حلاج جیس نوں انالحق کہن تے پھاہے لا دتا گیا سی
ہنگ۔ اک کھاون وچ پین والا مصالحہ، جڑ، جیس دی بو بڑی ہوندی ہے
باس۔ چنگی یا بھیڑی بو
رسمسی ۔چنگی طرحاں بھجی ہوئی
کافور ۔ خوشبو والا سفوف،

سدھا مطلب
ملاں نے جدوں ہی رانجھے دے لمے لمے وال ویکھے تے اوس کہیا توں شرح دا وردھی کون ہیں ، ایتھوں نس جا۔
ایتھے مطلب مسیت وچ لچے لوکاں لئی کوئی تھاں نہیں ہے۔ توں اپنے لمے وال سنبھال تاں جو توں حق یا اللہ نوں منظور ہوویں۔
اپنے آپ نوں رب کہہ کے غرور نہ کردا ، نہیں تے توں منصور وانگوں ماریا جاویں گا۔
وارث شاہ دا کہنا ہے جو ہنگ دی بو کدی وی نہیں لکی رہندی بھانویں اوس نوں کافور وچ بھیوں دیو۔

کھلارواں مطلب

بند دا شروع ہی ویکھو تے پتہ لگ جاندا ہے جو وارث شاہ کیہہ کرن جا رہیا ہے۔ ملاں نے رانجھے دے لمے وال ویکھ کے ہی متھ لیا ہے جو اوہ شرع دا دشمن تے لچا لفنگا ہے۔ اوس پچھن دی تکلیف وی نہیں کیتی جو پتہ کرے جو اوہ کون ہے کہناں حالاں وچ ایتھے آیا ہے، کیہڑیاں بھیڑیاں حالاں نال اوس دا مہاندرا انج دا ہے۔ اوس لئی اوس دی ظاہرا شکل ہی فیصلے لئی بہت ہے۔ تے ایہو مڈھلا پاڑ ہے ملا شاہی تے صوفی سوجھواناں وچ۔ جے اک ظاہر نوں سب کجھ سمجھدا ہے تے دوجا بندے دے اندر نوں ہوندے دی منیاد مندا ہے۔

پھیر ویکھو وارث شاہ ہوراں دا ''اوئے'' دے لفظ دی ورتوں۔ مطلب ملاں وچ مڈھلی بنیائی وی نہیں ہے جو اپنے توں وکھ وچار رکھاون والے بندہ سمجھ سکے۔ ''دور ہو اوئے'' ''منظور ہو اوئے'' وغیرہ وغیرہ۔ مطلب اوس نوں اک بندے دے سدھار (جے اوہ وگڑیا ہویا وی ہے تے جیہڑا رانجھا نہیں ہے) نال وی کوئی لینا دینا نہیں ہے۔ اوس لئی سب کجھ ظاہرا ہے تے بندیائی دی کوئی تھاں نہیں ۔ ایس لئی اوہ بڑے تکبر نال فرعون وانگوں ایہو ہی کہہ سکدا ہے جو توں وال سنبھال جے توں رب نوں راضی کرنا ہے۔ ملانیاں دی ایسے گل نوں سلطان باہو ہوراں ایہہ کہہ کے ننگیاں کیتا سی:
جے رب ملدا نہاتیاں دھوتیاں رب مل پیندا ڈڈواں مچھیاں نوں

تیجے مصرعے وچ اوہ رانجھے دے لمے والاں توں آپ ہی گویڑ لا لیندا ہے جو ایہہ جیہڑا مسیت وچ لمے والاں والا ونجھلی وجا کے خلقت نوں مست کری جا رہیا ہے ایہہ کوئی منصور حلاج دے وچاراں دا بندہ ہووے گا۔ ملاں لئی تے وال ودھا کے مسیت وچ ونجھلی وجاونا اناالحق کہنا ہے جیس دی سزا پھانسی ہے۔

ایتھے وارث شاہ وی اپنی کاریگری وکھاوندا ہے۔ اوہ ملاں کولوں ہی کہوا دیندا ہے جو والاں دی گل تے ہے ہی پر ایہہ بھیڑ، ٹاکرا دو وچاردھاریاں دا ہے جیہدے اک پاسے ملا شاہی ہے تے دوجے پاسے منصور حلاج تے اوس دے وچاراں نوں سچ منن والے۔ وارث شاہ ایس مصرعے نال پڑھن ہار نوں ایہہ وی سینت مار رہیا ہے جو میں اک پینڈو ملاں تے رانجھے دا ڈرامہ ہی نہیں سکا کروا ر رہیا، میں وڈیاں وچار دھاراں دا نکھیڑا کرن لگا ہاں۔

اخیری مصرعے وچ وارث شاہ دی سینت بڑی ڈوہنگی ہے۔ ایہہ کہ کے جو ہنگ دی باس کافور وچ پاکے وی نہیں مکدی اوہ کہہ رہیا ہے جو ملاں اک ہنگ دے ٹوٹے وانگ ہے جیہڑا جناں مرضی پڑھ لکھ لوے (جیس دا ذکر پہلے بنداں وچ آیا ہے) اوہ ظالم دا ظالم ہی رہوے گا۔

انج کافور مردیاں دی بو مارن لئی ورتیا جاندا ہے تے وارث شاہ ایہہ وی سینت مار رہیا ہے جو وچوں ملاں اک مریا ہویا بندہ ہے تے اوس دی بو کافور نال وی مر نہیں سکدی۔

ایس مصرعے نوں باالکل الٹا کے وی پڑھیا جا سکدا ہے، جو رانجھا بھانویں لکھ غیر شرع دسدا ہووے پر اوس دی بندیائی لک نہیں سکدی، اوہدی اصل کتوں نہ کتوں ظاہر ہو جاوے گی۔ جیویں پنڈ والے اوس دی ونجھلی سن کے اوس نال رلتی کر لیندے ہین۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels