Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٣٧

ہیر وارث شاہ بند ٣٧

June 8th, 2007

داڑھی شیخ دی عمل شیطان والے، کیہا رانیو جاندیاں راہیاں نوں
اگے کڈھ قرآن تے بہیں ممبر کیہا اڈیو مکر دیاں پھاہیاں نوں
ایس پلیت تے پاک دا کرو واقف اسیں جانیے شرع گواہیاں نوں
جیہڑے تھاؤں ناپاک دے وچ وڑیوں شکر رب دیاں بے پرواہیاں نوں
وارث شاہ وچ حجریاں فعل کردے ملاں جوترے لاوندے واہیاں نوں


مشکل لفظاں دے معنے
شیخ۔ علم ، وڈھا بزرگ پیر
شیطان۔ خدا دا فرشتہ جیس اوس توں نابری کیتی سی تے ہن اوس دا کم لوکاں نوں پٹھے راہ تے پاونا ہے
راننا۔ پیراں تھلے مدھنا، جنسی فعل لئی ڈاہ لینا
قرآن۔ مسلماناں دی سب توں وڈھی الہامی کتاب
ممبر۔ لکڑی دا چبوترا جیس تے چڑھ کے مولوی تقریر کردے ہین
پھاہی اڈنا۔ جال وچھاونا
پلیت۔ گندہ
پاک۔ صاف
شرع۔ مسلماناں دی زندگی گذارن لئی قاعدے، شرع گواہیاں۔ شرع وچوں ثبوت
حجرے۔ ملانے دے مسیتاں نال رہن لئی بنے ہوئے کمرے
فعل کردے۔ جنسی کردے
جوترہ۔ اک ویلے لئی متھیا ہویا ہل واہن داتھاں
واہیاں۔ انج تے ایہدا لفظی مطلب ہے جیہڑی زمین وچ ہل چلیا ہووے پر ایہہ بیجے ہوئے کھیتاں یا پیلیاں لئی ورتیا جاندا ہے۔ جیویں زراعت نوں واہی بیجی کیہا جاندا ہے۔

سدھا مطلب
(رانجھا جواب دیندا ہے) توں ظاہرا شکل تے عالماں برغاں والی بنائی ہوئی ہے پر تیرے کم شیطان والے ہین۔ توں ترے جاندے مسافراں دی عزت لاہنا ہے تے اوہناں نوں مدھولنا ہے۔
توں اپنے اگے جیویں قرآن کھول کے تے ممبر تے بہنا ہیں ایہہ توں جال یا کڑکی لائی ہوئی ہے (لوکاں نوں پھساون لئی)
توں سانوں گندے تے صاف ہوون دا ذرا فرق کر کے دس ، اسیں وی جان لئے جو ایس دی شرع وچ کتھے گواہی ہے
توں جیہڑیاں ناپاک تھاواں دے وچ وڑنا ایں ، اوہ تے رب دی بے پرواہی دا شکر ہے (جو تینوں پھڑدا نہیں)
وارث شاہ تہانوں دسدا ہے جو ملانے اپنے حجریاں وچ منڈے بازی کردے نیں تے اہناں دی ایہو واہی بیجی ہے۔

کھلارواں مطلب
رانجھا وی گل اوتھوں ہی شروع کردا جتھوں ملاں نے کیتی سی۔ ملاں نے اوس دے لمے وال ویکھ لے فتوی دے دتا سی جو توں لچا ہیں، باغی تے رب دا انکاری ہیں، رانجھا کہندا ہے توں شکل تے ٹھیک شیخ والی یا نیک عالم والی بنا لئی ہے پر توں وچوں شیطان ہیں۔ سو رانجھا اوہدے اندر نوں ساہمنے لیاوندا ہے۔ اوہ ایس نتیجے تے ایس لئی پجیا ہے جو اک بندہ راہ جاندے مسافر نوں بنا پچھے دسے کیویں اپنے فتوے اگے ڈھاہ سکدا ہے۔ ظاہر گل ہے اوہ شیطان ہی ہووے گا جیہڑا ایڈے پٹھے دھنگ نال لوکاں نوں ویکھ رہیا ہے۔

دوجے مصرعے وچ رانجھا اوہدیاں ظاہرا کرنیاں تے سٹ ماردا ہے مطلب توں منبر تے قرآن کھول کے صرف لوکاں نوں پھساونا ہیں ، تیرا قرآن نال تعلق واسطہ کوئی نہیں۔ انج ہی جیویں تیری داڑھی تیرے شیطان ہوون نوں لکا رہی ہے تیرا قرآن تے بہہ کے وعظ کرنا وی انج ہی ہے۔

تیجے مصرعے وچ وارث شاہ رانجھے دے حوالے نال سوال چکدا ہے جو پاک تے پلیت نوں وکھ وکھ کیویں کیتا جاوے تے شرع ایس بارے کنج فیصلہ دیوے گی۔ مثال دے طور عام ملنگ کہندے ہین جو بندہ وضو کرکے انج تے باہروں اپنے آپ نوں پاک صاف کر لیندا ہے پر جد اوہ مسیت وچ وڑدا ہے تے گونہہ تے اوس دے اندر انج ہی ہوندا ہے جیہڑا ناپاک ہے۔ سو ایس گل نوں شرح کیویں نبیڑے گی؟

پر ایتھے آیا ہے ''جیہڑے تھاؤں ناپاک دے وچ وڑیوں'' جیہڑا تھوڑا فرق ہے۔ ایس دا مطلب ایہہ وی کڈھیا جاندا ہے جو بندہ ماں دے اندر ناپاک تھاں وچ پیدا ہوندا ہے۔ ایس دا مطلب جے اگلے مصرعے نال ملا کے کیتا جاوے تے اوس دا مطلب ملاں دا منڈی بازی دے فعل ول اشارہ ہے۔ پر وارث شاہ دا کہنا ہے جو رب بے پرواہ ہے اوہ اہناں گلاں توں درگذر کر رہیا ہے ایسے لئی ملاں دا سارا کاروبار چل رہیا ہے۔

اخیری مصرعے دے پہلے ادھ دا مطلب صاف ایہہ ہے جو ملانے اپنے حجریاں وچ منڈے بازی کردے ہین۔ دوجے ادھے وچ ایہہ کہیا گیا ہے جو ملانیاں دی ایہو کار ہے، اوہ ایسے تے ویلا لنگھاوندے ہین ، مطلب منڈے بازی تے۔ جوترہ لاون دی سینت وچ وارث شاہ بہتا کھل گیا ہے، جیویں جوترے وچ ہل دا پھل زمین نوں چیردا جاندا ہے ملانے ایہو کم کتے ہور کر رہے ہین۔

واہیاں نوں جوترے لاون دی سینت وچ ایہہ گل وی شامل ہے جو واہیاں نوں جوترے لون والے تے کھاون پیون تے جیون لئی کجھ اگاوندے ہین، اوہناں دے کم وچ کجھ پیدا ہوندا ہے ، اوہناں دے جوترے پیداوار لئی ہوندے ہین پر ملاں دے جوترے سواد لئی ہوندے ہین جنہاں وچوں کجھ نہیں نکل سکدا۔

 


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels