Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 114

ہیر وارث شاہ: بند 114

September 26th, 2009

سر بیٹیاں دے چا جُدا کر دے جدوں غُصیاں تے باپ آؤندے نیں
سر وڈّھ کے نیں وچ روڑھ دیندے ماس کاؤں کُتے بلّے کھاؤندے نیں
سسّی جام جلالی نیں روڑھ دِتی کئی ڈُوم ڈھاڈی پئے گاؤندے نیں
اولاد جیہڑی کہے نہ لگے ماپے اوس نُوں گھُٹ لنگھاوندے نیں
جدوں قہر تے آؤندے باپ ظالم بنّھ بیٹیاں بھوہرے پاؤندے نیں
وارث شاہ جے ماریے بداں تائیں دینے خُون نہ تنہاندے آوندے نیں

اوکھے لفظاں دے معنے
نیں: ندی، دریا۔ جام جلالی: آدم جام دے ناں توں وی مشہور ہے سسی دا پیو، علاقہ بھنبور دا نواب سی۔ ڈھاڈی:ڈوم مراسی۔ مکاؤں دے: ماردیندے۔
بھوہرے: تہہ خانے۔ بداں: بھیڑے

سدھا مطلب
ہیر دی ماں ڈراؤندی ہے جو جدوں پیو غصے تے آؤندے ہین تے دھیاں دے گاٹے لاہ دیندے نیں
اوہ دھیاں دا سر وڈھ کے دریا وچ روڑھ دیندے نیں یا فیر اوہناں دی لاش نوں کاں تے کتے بلے کھاندے نیں
ڈوم مراسی گاؤندے ہین جو بھنبور دے نواب جام جلالی نے اپنی دھی سسی دریا وچ روڑھ دتی سی (نجومی نے دسیا سی جو عشق وچ مرے گی تے اوس دے پیو جام جلالی نے ایس ڈر توں اپنی دھی صندوق وچ پاکے روڑھ دتی سی)
جیہڑی اولاد ماں پیو دے کہن تے نہ ٹرے اوس دا گل گھٹ کے روڑھ دتا جاندا ہے
جے پیو قہر وچ آؤندے نیں تے دھیاں نوں تہہ خانیاں وچ سدا لئی بند کر دیندے نیں
وارث شاہ ماں دے مونہوں کہوا رہیا جو جے بد بندے یا زنانی نوں قتل وی کردئیے تے اوس دا خون بہا کوئی نہیں ہوندا

کھلارواں مطلب
ایس بند وچ ماں اوسے طرحاں دیاں دھمکیاں دوہرا رہی ہے جیہڑیاں چوچک نے پہلے بند وچ دتیاں سن۔ وارث شاہ ہوریں چوچک تے ملکی دی آواز نوں سانجھا کرکے وکھا رہے ہین جو کیویں حاکم میل دے مرد تے عورت مذہب تے انصاف کرن دی تھاں حاکم میل دی رکھیا کردے ہین۔ ایہناں دو بنداں وچ وارث شاہ ایہہ پتہ نہیں لگن دیندے جو کیہڑی دھمکی چوچک ولوں آرہی ہے تے کیہڑی ماں ولوں ۔ اوہ ایہہ کلا دوہاں نوں اک ہی وکھاون لئی ورت رہیا ہے۔ ایس لئی تسیں ویکھو پہلے بند وچ اوس ایہہ نہیں سی کہیا جو چوچک آکھیا تے نہ ہی ایس بند وچ کھل کے کہیا جو ماں کہندی ہے۔ایس لئی ایہناں بنداں دی اک خاص گل ایہہ وی ہے جو سدھا پتہ نہیں لگدا جو ایہہ قاضی، چوچک یا ملکی بول رہی ہے۔ایہہ اسیں گویڑ نال بولن والیاں دی پچھان کرن دی کوشش کیتی ہے۔ پر ایہہ ہے گویڑ ہی، کیوں جو وارث شاہ تنہاں نوں اک ہی ہستی بنا کے بلوا رہیا ہے۔

ہر مصرعے وچ ظلم تے جبر دی اک وکھری تصویر وکھائی گئی ہے۔ تے فیر اپنی گل دا بھار ودھاؤن لئی تاریخ وچوں جام جلالی دی مثال دتی گئی ہے جو اوس نے نجومیاں دے ڈر پاروں تے نویں جمی دھی دریا وچ روڑھ دتی سی۔ تے اگلے مصرعیاں وچ وی جبر دے ہی ہور انگ ، گل گھٹ کے روڑھ دینا یا سدا لئی تہہ خانیاں وچ بند کردین دا ذکر ہے۔

ایس بند دا اخیری مصرعہ بہت مڈھلا ہے کیوں جے ماں حکم سنا رہی ہے جو بداں نوں جانوں مارنا جائز ہے۔ ایتھے ویکھو جو عورت آپ مدھولی ہوندی ہے پر اوہ مرد دی غلامی وچ آ کے کیویں اوس دا ہی پرچھاواں بن جاندی ہے تے کیویں طوطے وانگ اوس دی ہی بولی بولن لگ پیندی ہے۔ سگوں بعضے ویلے تے زنانیاں مرداں نالوں ودھ مرد بنن لئی اپنی ہی دھیاں بھیناں تے اوہ ظلم کردیاں ہین جیہڑا خورے مرد وی نہ کر سکن۔ ایس لئی ایہہ کہنا وی ٹھیک ہے جو عام طور تے عورت مظلوم ہے پر اوہ حاکمی دی سیاست وچ مرد جنی یا اوس توں ودھ ظالم وی ہو سکدی ہے۔

ایتھے گوہ کرو جو ایہہ گلاں قاضی دے ساہمنے ہو رہیاں ہین جو پہلے ایہہ ہی دس چکیا جو پیو دا حکم نہ منن والے بد ہوندے نیں۔ ایتھے ہیر دی بدی صرف اینی ہے جو اوہ اپنی مرضی دے مرد نال ویاہ کرنا چاہندی ہے۔ ایس تے قاضی اوہ فتویٰ نہیں دے رہیا سی جو مذہب تے انصاف دے اصولاں دے مطابق ہووے اوہ فتویٰ اپنے حاکماں دی مرضی دے مطابق دے رہیا سی۔

ظاہر گل ہے جد ہیر دی ماں اوس نوں مارے جان دی دھمکی دے رہی ہے تے اوس نوں پتہ ہے جو انصاف کرن والا جج اوہناں دا اپنا ہے تے اوہناں دے نال بیٹھا ہویا ہے۔ ملکی نوں پتہ ہے جو جے ہیر دا پیو چوچک اوس نوں قتل وی کر دیوے تے قانون چوچک دا پکھ ہی پورے گا۔ مطلب لوکائی تے زنانیاں لئی نیاں دی کوئی تھاں نہیں ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels