Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 116

ہیر وارث شاہ: بند 116

October 20th, 2009

سلطان بھائی آیا ہیر سندا آکھے ماؤں نوں دِھیو نُوں تاڑ اماں
اساں پھیر جے باہر ایہہ ڈٹھی سٹاں اِیس نوں جان تھیں مار اماں
تیرے آکھیاں ستر جے بہے ناہیں پھیراں اِیس دی دھون تلوار اماں
چاک وڑے ناہیں ساڈے وِچ ویہڑے نہیں ڈکرے کراں سُو چار اماں
جے دھیو نہ حکم وچ رکھیائی سبھ ساڑ سُٹوں گھر بار اماں
وارث شاہ جیہڑی دِھیو بُری ہووے روڑھ دیے سمندروں پار اماں

اوکھے لفظاں دے معنے
سندا: دا۔ تاڑ: ڈک کے رکھ۔ ڈٹھی: ویکھی۔ ستر: پردہ۔ ڈکرے: ٹوٹے

سدھا مطلب
ہیر دا بھرا سلطان ماں نوں کہندا جو ہیر نوں اندر ڈک کے رکھ۔
جے میں ایس نوں گھروں باہر ویکھ لیا تے جان توں مار دیاں گا۔
جے تیرے آکھے پردے وچ نہ بیٹھے تے ایس دی دھون تلوار نال وڈھ دیاں گا۔
چاک مطلب رانجھا ساڈے ویہڑے نہ وڑے نہیں تے اوس دے چار ٹوٹے کردیاں گا۔
جے توں دھی نوں وس وچ تے حکم وچ نہ رکھیا تے سارا گھر بار ساڑ دیاں گا۔
جے دھی بری نکلے تے اوس نوں سمندروں پار روڑھ دینا چاہیدا ہے۔

کھلارواں مطلب
جاگیرداری سماج وچ عورت تے پیو تے خاوند دا ہی زور نہیں چلدا سگوں ٹبر دا ہر بندہ اوہدا مالک ہوندا ہے۔ بھرا بھتیجے، بھانجے سب اوس دے راکھے ہوندے نیں تے سب اوہدی راہ وچ ڈکے لاؤندے نیں۔ ایس بند وچ وی ویکھو پتہ نہیں لگدا جو ہیر دا بھرا سلطان اوس توں وڈا ہے یا نکا، پر ایس نال کوئی فرق نہیں پیندا ۔اوہ نکا ہووے یا وڈھا اوہ بھین تے اکو جیہا ظلم کردے ہین۔ بھرا تے بھرا ایتھوں تک کہ اک طرحاں پورے محلے پورے پنڈ دے مرداں دا اوس تے حکم چلدا ہے۔

بہتے ویلے ایہہ وی ہوندا ہے جو ماں پیو دے دل وچ تے فیر وی ترس آجاندا ہے پر بہتے بھراواں لئی بھین بس اوہناں دی انکھ توں وکھ کجھ نہیں ہوندی۔ اوہ ماں پیو نالوں ودھ ظلم کردے ہین۔ فیر اوہ بھین نوں جائیداد دا شریک وی مندے ہین تے ایہہ چالاں وی چلدے ہین جو اوہ کسے باہر دے بندے نال جوڑ جوڑ کے اوہناں دا جائیداد حصہ نہ لے لوے۔ ایس لئی بھراواں دی انکھی میں وچ جائیداد دی ونڈ وی کتے رلتی ہوندی ہے۔ فیر ایہہ وی ہوندا ہے جو جاگیرداری سماج دے نویں تے جوان سنبھالو ہوندے نیں تے اوس زور جبر نال ہی اوس دی رھیا کردے ہین جیس دا شکار بھیناں پہلاں بندیاں ہین۔

خورے ایہدی وجہ پرانے سماج دی رہند کھوہند وی کتے چل رہی ہووے جیس وچ بھین بھرا اک دوجے نال ویاہ کر سکدے سن تے باہر دا ہر بندہ اوہناں دا رقیب تے اوہناں دا دشمن ہوندا سی۔ ایہہ گل بہتے لوک منن گے نہیں پر قدیم سماج نے جیہڑے اثر بندے تے ذہن وچ چھڈے ہین اوہ وی کسے ریت رواج دی نویں صورت بن کے فیر زندہ ہو جانے نیں۔ بھین بھرا دے ہیر تے سلطان ورگے ٹکرا وچ قدیم ویلیاں دے ورتارے دا نویں رہت وچ ڈھلنا وی ہو سکدا ہے۔

ایہہ تفسیر ٹھیک نہ ہووے تاں وی سوال رہوے گا جو بہتے ویلے بھرا پیو توں وی ودھ کڑیاں تے ظالم کیوں کردے ہیں تے اوہناں دی لج بارے ایڈے الھے کیوں ہوندے نیں؟

ایس بند وچ ہیر دے ماں پیو تے قاضی تے پہلاں ہی اپنا کردار کر رہے سن پر اوہ اجے چھڑیاں دھمکیاں دے رہے سن تے نال نال سمجھا وی رہے سن۔ پر ہیر دا بھرا سلطان تے دوٹوک فیصلہ کر دیندا ہے جو جے ایہہ نہ روکیا گیا تے ہیر تے رانجھے دا قتل کر دیوے گا۔ وارث شاہ جان بجھ کے گل قاضی دے سمجھاون توں شروع کردا ہے تے اوس نوں ہولی ہولی کلائمیکس تے لے کے جاندا ہے۔ ایہہ اوسدی دی ناٹک کاری دی کاریگری دا اک نمونہ ہے۔ ایسے طرحاں تسیں ویکھو گے جو باقی دی لکھت دے ڈرامے وچ وی اوہ سین نوں ہولی ہولی کنج کلائمیکس ول لے کے جاندا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels