Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 118

ہیر وارث شاہ: بند 118

October 29th, 2009
5 / 5 (2 Votes)

قاضی آکھیا خوف خدا دا کر ماپے چہ چڑھے چاہے مارنی گے
تیری کیاڑیوں جیبھ کھچا کڈھن مارے شرم دے خون گزارنی گے
جس وقت اساں دتا چا فتویٰ اوس وقت ہی پار اُتارنی گے
ماؤں آکھدی لوڑھ خدا دا جے تکھے شوخ دیدے ویکھو پاڑنی گے
وارث شاہ کر ترک بُریائیاں توں نہیں اگ دے وِچ چا نگھارنی گے

اوکھے لفظاں دے معنے
چہ چڑھنا: ضد تے غضب وچ آؤنا۔ کیاڑیوں: گل دی ہیٹھلی تھسں، (کھکواڑوں) گُدی، زبان دا آخری حصہ جیہڑا دھون دی پچھلی ہڈی تیکر جاندا ہے۔ لوڑھ خدائے دا جی: تیرے تے رب عذاب نازل کرے

سدھا مطلب
قاضی نے ہیر نوں کہیا جو خدا دا خوف کر نہیں تیرے ماں پیو ضد تے غصے وچ تینوں قتل کر دین گے۔
تیرے ماپے تیری گُدی توں زبان کھچ دین گے تے شرم دے مارے تیرا خون کر دین گے۔
جیس ویلے میں فتویٰ جاری کردتا اوسے ویلے تینوں اگلے جہان پہنچا دین گے۔
ماں آکھدی ہے جو تیرے تے رب دا عذاب پوے ۔ تیرے پیو بھرا تیریاں شوخ اکھاں پاڑ دین گے۔
وارث شاہ وی ایہو کہندا ہے جو برائیاں چھڈ دے نہیں تے اگ وچ سٹ دتا جاویں گا۔

کھلارواں مطلب
ماں پیو تے بھرا توں بعد فیر قاضی اپنا حکم سناؤندا ہے۔ اوہ کہہ تے ایہہ رہیا ہے ہیرے خدا دا خوف کر پر اوس دا مطلب سماج دے ٹھیکیدار نیں۔ قاضی دا خدا حاکم میل ہے تے اصل وچ اوہ اوہدے کولوں ہی ڈرا رہیا ہے تے کہہ رہیا ہے جو تیرے ماں پیو قہر وچ آ کے تینوں قتل کر دین گے۔ اک ہی مصرعے وچ خدا تے ہیر دے ماں پیو نوں لیا کے وارث شاہ دس رہیا ہے جو قاضی دا اصل خدا کون ہے۔

اوہ اوس نوں گدی توں زبان نکلن تے قتل ہو جان دیاں دھمکیاں دے کے ایہہ وی دس رہیا ہے جو جے اوس ماں پیو دی گل نہ منی تے اوہ اوس دے خلاف فتویٰ جاری کر دیوے گا جیس توں مگروں اوس نوں گھڑی پل وچ قتل کر دتا جاوے گا۔ قاضی اوہو کر رہیا ہے جو اوس ویلے دے حاکماں دے اہلکار کردے رہے سن۔ سو حاکم میل ظلم کرن توں پہلاں ہی عدالتاں نوں اپنے جرم وچ شامل کردا رہیا ہے تے ایتھے وی اوہو ہو رہیا ہے۔

ہیر دی ماں وی اوس تے رب دے عذاب دی بد دعا دے کے جھبدے اوہناں دا ذکر کردی ہے جیہناں اصل وچ ہیر نوں قتل کرنا ہے۔ سو ہیر دے رب دے عذاب دا مطلب وی اپنے گھر دے مرداں دا عذاب۔ کیوں جو اوس لئی وی رب اوہو ہین۔

اخیر تے وارث شاہ وی صلاح دیندا ہے جو برائیاں چھڈ دے نہیں تے اگ وچ سڑسیں۔ پر ایتھے وارث شاہ ایہہ نہیں کہندا جو برائی کون کر رہیا ہے تے کیس نے اگ وچ سٹیا جانا ہے۔ بند وچ عام پڑھت وچ ایویں ہی دسدا ہے جو ایہہ وی ہیر نوں ہی کہیا جا رہیا ہے پر جے وارث شاہ دے عشق دے فلسفے نوں مکھ رکھیا جاوے تے ایہہ گل قاضی تے ہیر دے ماپیاں لئی وی ہو سکدی ہے۔ جو اوہ جو برائی کر رہے ہین اوہ اگ وچ ہی سڑن گے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels