Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٣٨

ہیر وارث شاہ بند ٣٨

June 15th, 2007

گھر رد دے مسجداں ہندیاں نیں ایتھے غیر شرع ناہیں واڑیئے اوئے
کتا اتے فقیر پلیت ہووے نال دریاں بنھ کے ماریئے اوئے
تارک ہو صلوۃ دا پٹے رکھے لباں والیاں مار پچھاڑیئے اوئے
نیواں کپڑا ہووے تاں پاڑ سٹیئے لباں ہون دراز تاں ساڑیئے اوئے
جیہڑا فقہ اصول دا نہیں واقف اوہنوں چا سولی اتے چاڑیئے اوئے
وارث شاہ خدا دیاں دشمناں نوں دوروں کتیاں وانگ دھرکاریئے اوئے




مشکل لفظاں دے معنے
غیرشرع۔ شرع نوں نہ منن والا، شرع دا مطلب ہے اسلام دا کوڈ آف کنڈکٹ
تارک۔ چھڈ دینا
صلوۃ۔ نماز
پٹے۔ لمے وال
لباں۔ مچھاں
مار پچھاڑیئے۔ مار کے پچھاں سٹ دیئے
دراز۔ لما، لمیاں
فقہ۔ اسلام دی حیاتی دی روز بروز دے ڈھنگ بارے اصول، انج تے چار مشہور فقہاں ہیں (حنفی، حنبلی، شافعی ، ملکی) پر پاک ہند وچ حنفی فقہ دے منن والے بہتے ہین۔ وارث شاہ دے دسے پچھلے بنداں دے مدرسے وچ حنفی فقہ دیاں ہی کتاباں پڑھایا ں جا رہیا سن۔
اصول۔ قانون
دھرکاریئے یا درکاریئے۔ پھٹکار پاونا

سدھا مطلب

[ملاں کہندا اے] مسیتاں رب دا گھر ہوندیاں ہین تے اوس بندے نوں نہیں وڑن دتا جا سکدا جیہڑا شرع دے مطابق نہ چلے
کتا تے فقیر دوہیں پلیت تے ناپاک ہوندے نیں، اوہناں نوں تے بنھ کے کوڑیاں نال مارنے آں ۔
جیس بندے نے وی نماز چھڈ کے وال ودھا لئے یا جیس مچھاں رکھ لیاں اوہناں نوں تے مار کے پچھاں سٹ دینے آں
جے کر کوئی بہتا نیویں کپڑے پائے تے اسیں اوسدے کپڑے پاڑ دینے آں، جے کسے دیاں مچھاں لمیاں ہوون تے اوہناں نوں ساڑ دینے ہاں
جیہڑا کوئی فقہ دے اصولاں دا جانو نہیں ہے اوس نوں اسیں سولی تے چاڑھ دینے آں
وارث شاہ دسدا ہے جو ملاں کہندا ہے کہ اسیں خدا دیاں ویریاں نوں دوروں کتیاں وانگوں پھٹکار دینے آں ، مطلب اسیں اوس نوں لاگے ہی نہیں لگن دیندے۔

کھلارواں مطلب

پہلی گل ایس بند وچ ایہ گوہ گوچری ہے جو ملاں دے پچھلے ڈائیلاگ وانگ ایتھے وی اوہ ''اوئے'' کہ کے ہی گل کردا ہے۔ اوہ بندے نوں بندہ ہی نہیں مندا تے اپنے غرور تے مان وچ ہے۔ اوہدے لئی کتا تے فقیر (جیہڑا بندہ ہے) اکو جیہے ہین تے دوہاں نوں بناں سوچے سمجھے دریاں نال مارنا چاہیدا ہے۔

دوجی گل ایس وچ ویکھن والی ایہہ ہے جو اوس دا سارا مہاڑ ات واد تے مارا ماری ول ہے۔ اوس دا مقصد ایہہ نہیں جو کسے پٹھے راہ پئے بندے نوں سدھے پاسے لیونا، اوس کول اک ہی حل ''مارئیے اوئے'' پچھاڑیئے اوئے'' ''ساڑیئے اوئے'' تے ''سولی اتے چاڑھیئے اوئے'' مطلب اوہ مذہب نوں زور دھگانے نال لوکاں دے سنگھاں وچ تُننا چاہندا ہے ۔ تے جے اوہ اوس دے دسے پیمانے تے پورے نہ ہون اوہناں نو جیون دا کوئی حق نہیں۔

تیجی گل ایہہ، جیویں پہلے کہیا گیا ، ملاں نوں صرف ظاہر نال غرض ہے۔ جے کسے دے وال لمے ہوون، مچھاں لمیاں ہوون، کپڑے لمے ہوون تے اوہناں نوں سولی تے چاڑھ دینا چاہیدا ہے کیوں جو شرع موجب چل ہی نہیں رہے۔ تے ملاں واسطے شرع دا پیمانہ وال، مچھاں تے کپڑیاں دی لمبائی ہے۔

ایتھے وارث شاہ شرعی مذہب دی وچلی کمزوری تے سٹ مار رہیا ہے جو اوپروں ویکھن تے ودھ کجھ وی نہیں ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels