Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٣٩

ہیر وارث شاہ بند ٣٩

June 15th, 2007

سانوں دس نماز ہے کاس دی جی کاس نال بناء کے ساریا نیں
کن نک نماز دے ہین کِتنے، متھے کنہاں دے دھروں ایہہ ماریا نیں
لمبے قد چوڑی کِس ہان ہوندی کس چیز دے نال سواریا نیں
وارث کلیاں کتنیاں اُس دیاں نیں جِن نال ایہہ بنھ اتاریا نیں



مشکل لفظاں دے معنے
کاس۔ کس شے دی
ساریا۔ بنایا
نماز دے کن نک۔ امام غزالی دی کتاب اسلام وچ نماز دے کن نک دا ذکر ہے۔مطلب نماز وچ کیہہ ذکر تے تسبیح پڑھی جانی چاہیدی ہے۔
متھے مارنا۔ کسے نوں غصے نال کوئی شے دینی، یا کسے تے زبردستی کوئی شے دے دینی
دھروں۔ ازل توں، آد توں
ہان۔ ایس دا مطلب عمر وی ہو سکدا ہے (ہان دے منڈے جیویں) ۔ ایس دا مطلب تھاں (جے ہان ستھان توں وگڑیا ہے تے)، جگہ، مقام وی ہو سکدا ہے۔
کلیاں۔ اوہ کلے جنہاں نال ملاح اپنی بیڑی نوں بنھدے ہین۔

سدھا مطلب

[رانجھا ملاں نوں سوال کردا ہے] توں سانوں دس جو نماز کِیس شے دا ناں ہے یا کِس دی ہے تے ایس نوں کیہڑیاں شیواں نال بنیا یا گیا ہے۔
[جے ایہہ اک شکل والی ہستی ہے] تے ایس دے کن تے نک کنے ہیں، تے کنہاں دے منہ تے غصے نال ماری گئی ہے
ایس دی لمبائی کتنی ہے تے چوڑی کنی ہے، تے ایس دی عمر کیہ ہے؟ تے ایس نوں کیس شے نال شنگاریا گیا یا سوتر کیتا گیا ہے
[جے ایہ کوئی بیڑی رنگی شے ہے] تے ایس نوں اتار کے کنیاں کلیاں نال بنھیا گیا ہے۔

کھلارواں مطلب

اسیں مشکل لفظاں دے معنے لکھن وچ شریف صابر ہوراں دی مرتبہ ہیر توں بہتا لبھ لینے ہاں، پر ایس بند دے معنے لکھدے ہوئے صابر ہوراں نے انج سمجھیا ہے جو جیویں رانجھا ملاں دی نماز بارے جانکاری دا امتحان لے رہیا ہے تے اوس دی علمائی نوں چیلنج کر رہیا ہے۔ پر اسیں اوہناں نال سہمت نہیں ہاں۔

ساڈا خیال ہے جو ایتھے رانجھا یا وارث شاہ ملاں شاہی نال چاگھ (مخول) کر رہیا ہے تے چاگھ چاگھ وچ اوس دے مذہب نوں ننگیاں کر رہیا ہے۔

اہناں توں پہلیاں بنداں وچ ملاں رانجھے دے ظاہرا نوں ویکھ کے اوس تے فتوے لا رہیا ہے۔ دوہاں دے ٹاکرے دے مڈھ وچ ہی ملاں اوس دے لمے وال ویکھ کے فتوی دے دیندا ہے (ملاں آکھیا چونیاں ویکھدیاں ہی)۔ پھیر ملاں اوس دا سارا زور ظاہرا بنتر تے ہے۔ کسے دا کپڑا کنا لما ہے، مچھاں لمیاں نیں یا چھوٹیاں، وال سنبھلے ہوئے یا نہیں۔ مطلب ملاں لئی ظاہرا صورت توں ہی سارے فیصلے ہونے ہوندے نیں۔ سوملاں لئی گل صورت دی ہے۔

رانجھا اوسے دی دلیل اوس تے ورتدا ہے۔ جو جے ہر شے بارے فیصلہ اوس دی صورت شکل تے ہی ہونا ہے تے پھیر نماز دی وی کوئی شکل ہووے گی جیہدے چنگے بھیڑے ہوون دا فیصلہ اوس دے مہاندرے تے نین نقشاں نوں ویکھ کے کیتا جاوے گا۔

ایس لئی رانجھا ایہو جیہے سوال کردا ہے جو نماز کیس شے نال بنی ہے، کیس شے نال سواری گئی ہے؟ ایس دے نک تے کن کتنے ہین؟ کیس دے منہ تے ماری گئی ہے ۔ ایس دا قد کیہ ہے تے ایس عمر کنی ہووے گی۔ یا ایہہ کوئی بیڑی ہے جیہڑی اتوں گھل کے کلیاں نال بنھی ہوئی ہے؟

ظاہر گل ہے جو رانجھا کہ ایہہ کہہ رہیا ہے جو جے نماز اک روحانی عمل ہے بندے دے سندرونے دا تے پھیر کسے بارے وی فیصلہ یا فتوی اوس دے اندرونے نوں ویکھ کے ہونا چاہیدا ہے اوس دے ظاہرا نوں ویکھ کے نہیں۔ ایہہ بند اوس مڈھلے پاڑ تے چانن پاوندا ہے جیہڑا شریعت پوجاری ملانیاں تے صوفی سوجھواناں (جنہاں نوں سوکھ لئی طریقت والے وی کہیا جاندا ہے) وچکار سی تے ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels