Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند٤٢

ہیر وارث شاہ بند٤٢

June 18th, 2007

ملاں آکھیا نامعقول جٹا فرض کج کے رات گذار جائیں
فجر ہندی تھوں اگے ہی اُٹھ اِیتھوں سر کج کے مسجدوں نکل جائیں
گھر رب دے نال نہ بنھ جھیڑا از غیب دیاں ح' جتاں نہ اٹھائیں
وارث شاہ خدا دے خانیاں نوں ایہہ ملاں بھی چمبڑے ہین بلائیں



مشکل لفظاں دے معنے

نامعقول۔ عقلوں وانجیا
فرض کجنا۔اسلامی شرع مطابق جسم دے کجھ انگاں نوں ڈھنا ضروری ہے۔ مرد لئی دھنی توں تھلے والے حصے نوں ڈھکنا لازم ہے۔اصل وچ مرد لئی اپنے جنسی حصیاں نوں ڈھکنا ہے کیوں جو لتاں ننگیاں وی ہو سکدیاں ہین۔
فجر۔ سویر
جھیڑا۔ جھگڑا
از غیب دیاں حجتاں۔ اوہ دلیلاں دینا جیہڑیاں اجے تیکر کسے نہ دتیاں ہوون۔ نویاں منوں گھڑیاں دلیلاں یا ترک (منطق)

سدھا مطلب

ملاں [رانجھے نوں] نوں کہیا جو توں اپنے جنسی انگاں نوں ڈھک کے مسیت وچ رات گذار جائیں۔
سویر ہوون توں پہلاں ہی سر ڈھک کے مسیت وچوں نکل جائیں
توں رب دے گھر نال جھڑے نہ کر تے اوہ دلیلاں نہ دے جیہڑیاں اجے تیکر کسے نے نہ دتیاں (یا جیہڑیاں ہوا وچوں گھڑیاں ہویاں نیں)۔
وارث شاہ کہندا ہے جو ملانے مسییتاں نوں بلاواں بن کے چمبڑے ہوئے ہین۔

کھلارواں مطلب

ملاں شروع تے ہویا سی ایس پینترے توں جو اوہ لمیاں والاں تے مچھاں والیاں نوں کوڑیاں نال مارے گا تے رانجھے ورگے بندے نوں مسیت وچ کدی وڑن وی نہیں دیوے گا پر سارے پنڈ دے ساہمنے اوہ رانجھے دیاں دلیلاں سن کے اپنے پینترے توں نس جاندا ہے۔ رانجھے دیاں دلیلاں دا ملاں کول کوئی جواب نہیں ایس لئی اوہ اخیر ہار کے من کے کہندا ہے جو رانجھا مسیت وچ رات گذار سکدا ہے۔ رانجھے دا مسیت نہ چھڈنی تے ملاں توں اوس دے حق نوں منوا کے وارث شاہ ملاں شاہی نوں چت کیتا ہے۔

پر ملاں جاندیاں جاندیاں اوس نوں پھوکیاں ہدائیتاں وی کر جاندا ہے۔ ہن پتہ نہیں ایہہ وارث شاہی ٹچکر بازی ہے جو ملاں دا دھیان جنسی سنداں (اعضائ) ول بہتا رہندا ہے یا وارث شاہ ملاں دی بھیڑی نیت ول سینت مار رہیا ہے کیوں جو اوہ پہلاں لکھ ہٹیا ہے جو ''وارث شاہ وچ حجریاں فعل کردے'' ۔

دوجے مصرعے وچ سر کج دا کہہ کے شاید ملاں ایہہ دس رہیا ہے جو اوہ کن ولھیٹ کے نکل جاوے تاں جو لوکاں نوں پتہ نہ لگے جو اوہ رات زبردستی مسیت وچ رہیا سی تے ملاں اوسدا کجھ نہیں سی کر سکیا۔ ملاں اپنی ہار لکاونا چاہندا ہے جو کتے رانجھے دی ویکھا ویکھی ہور وی مسیت دی عوامی لوڑاں لئی ورتوں شروع نہ کردین۔

تیجے مصرعے وچ ملاں دی ہار دا اعلان ہے۔ اوس کول جواب کوئی نہیں ایس لئی اوہ رانجھے دیاں دلیلاں نوں خدا دے گھر نال جھگڑا کہندا ہے تے اوس دیاں دلیلاں نوں از غیب دیاں کہندا ہے۔ ایہہ وی ہے جو شاید ملاں نوں کدی ایس طرحاں دا کوئی ڈاڈھا پکا پیڈھا سوجھوان ٹکریا نہیں۔ مطلب چشتیہ تحریک توں پہلاں ملاں شاہی نوں کسے ہندوستان وچ للکریا نہیں سی۔

اخیری مصرعہ یعنی ملانے مسیتاں نوں بلاواں بن کے چمبڑے ہوئے ہین تک پجن لئی ہی وارث شاہ نے ملاں تے رانجھے دا ایڈا لما ڈائیلاگ کروایا سی۔ وارث شاہ دی وچار دھارا وچ ملاں شاہی دا مذہب وچ کوئی رول نہیں تے باہر دیاں بلاواں وانگ چمبڑ گئے ہین۔

بلاواں سدا باہر دیاں ہوندیاں ہین، ایس لئی اوہناں نوں باہرلیاں وی کہیا جاندا ہے۔ مطلب اوہ انسان دی نسل وچوں نہیں ہین تے کتوں باہروں آئیاں ہین۔ ملاں وی مذہب وچ باہروں آئے ہین مطلب اوہناں دی مذہب دے اندر کوئی ہوند نہیں سی۔ اوہ ایس لئی وی باہر والے ہین جو اوہ عام انساناں والے کم کاج نہیں کردے جیویں پچھلے بنداں وچ رانجھے نے کہیا۔ مثلاًاوہ قدرتی جنس دی بجائے مُنڈے بازی کردے نیں۔اوہ عام لوکاں طرحاں روٹی روزگار نہیں کماؤندے تے انھیاں لولیاں وانگ بیٹھے لوکاں دے مرن جیون دیاں پتریاں جوڑدے رہندے ہین، مطلب اوہ باہرلیاں طرحاں بندیاں دا شکار کردے رہندے ہین۔

بلا وی جدوں کسے نوں چمبڑدی ہے اوس دے جُثے تے مل مار لیندی ہے۔ پھیر اوہ انسان دے جُثے نوں قدرتی راہ تے ٹرن نہیں دیندی۔ ایسے طرحاں ملانے وی مسیتاں نوں چمبڑ کے مسیتاں نوں تے بندیاں نوں اوہناں دے اصل تے قدرتی راہ تے ٹرن نہیں دیندے۔

ملاں تے رانجھے وچکار ایہہ اخیری ڈائیلاگ سی۔ ایتھے خیال آؤندا ہے جو وارث شاہ نے ہیر رانجھے دی لگت مسیت دے حجرے وچ بیٹھ کے لکھی۔ اوس ملاں نوں بڑی نیڑتا توں واچیا ہووے گا پر سوال ہے جو اوس نوں مسیت وچ کنج رہن دتا گیا؟ یا ملکہ ہانس وچ مسیت دے حجرے وچ رہیا ہی نہیں تے قصبے دے کسے ہور تھاں تے ٹکیا رہیا۔ ایہہ سوال
پڑچولیاں تے ادبی کھوجیاں لئی ہین ۔




Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels