Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٤٣

ہیر وارث شاہ بند ٤٣

June 20th, 2007

چڑی چوہکدی نال جاں ٹرے پاہندی پیاں ددھ دے وچ مدھانیاں نیں
اٹھ غسل دے واسطے جان دوڑے سیجاں رات نوں جنہاں نے مانیاں نیں
رانجھے کوچ کیتا آیا ندی اتے ساتھ لدیا پار مہانیاں نے
وارث شاہ میاں لُڈن وڈھی کپن کُپا شہد دا لدیا بانیاں نے



مشکل لفظاں دے معنے

چڑی چوہکدی۔ جد چڑی چہکن لگی
پاہندی۔ راہی، مسافر
غسل۔ نہاون
سیجاں۔ پلنگ
ماننا۔ سواد لینا
سیجاں ماننا۔ جنسی سواد لینا
کوچ کرنا۔ کسے تھاں توں ٹر پینا
مہانیاں۔ بیڑی یا کشتی چلاون والے ملاح
وڈھی کپن۔ رشوت لین والا
کپا۔ کنستر، وڈھا بھانڈا

سِدھا مطلب
جد چڑیاں چہکن لگ پیاں (سویر ہوگئی) تے (زنانیاں) ددھ رڑکن لئی مدھانیاں پے گیا
جنہاں رات نوں اپنیاں زنانیاں نال سواد لئے سن اوہ نہاون لئی دوڑ پئے۔
رانجھے نے وی (مسیت وچوں) چلاؤ کیتا تے دریا یا ندی تے آگیا جتھے ملاح دریا پار لنگھاون لئی کشتیاں لد رہے سن۔
وارث شاہ کہندا ہے جو لڈن رشوت کھان والا ہے جیس نے بانیاں دا شہد دا کپا لد لیا ہے۔

کھلارواں مطلب

ایہہ وارث شاہ دا بڑا مشہوربند ہے جیس وچ اوس نے پنڈ دی سویر دا منظر دسیا ہے۔ پنڈ وچ جد سویر ہوندی ہے تے چڑیاں چہکدیاں نیں (شہراں وچ انج نہیں ہے)۔ تے سویر ہوون ویلے زنانیاں پہلا کم ایہہ کردیاں ہین جو رات دے جمائے ددھ توں مکھن تے لسی بناون لئی مدھانیاں چلاوندیاں ہین۔ بہتیاں زنانیاں مدھانی چلاون دے نال نال گا کے یاں بول کے اللہ اللہ وی کردیاں ہین۔ اہناں دی آواز، مڈھانی دی گھمکار تے چڑیاں دی چہکاراک وڈا نظارہ بناوندیاں ہین۔

پھیر سویر ہوون دے نال ہی اوہ بندے نہاون لئی نس پیندے نیں جنہاں رات نوں ہم بستری کیتی ہوندی ہے۔ گھٹو گھٹ مسلماناں لئی ہم بستری مگروں نہانا فرض سمجھیا جاندا ہے۔ہو سکدا ہے دوجیاں مذہباں وچ وی انج ہی ہووے۔انج پنجاب دیاں پنڈاں وچ عام طور تے لوک مسیتاں نال لگے کھوہاں تے نہاندے ہین۔ جے کوئی لاگے ندی ہووے تے اوس وچ وی ٹبی مار لیندے ہین۔

وارث شاہ نے سویر دی ایڈی سوہنی دکھ (منظر) ایس لئی وی الیکی ہے جو ایہہ رانجھے دی حیاتی دی اک نویں سویر ہے۔ اوہ تخت ہزارے دی کالی رات نوں چھڈ کے اک نویں حیاتی دی سویر ول ٹریا ہے۔ ایس لئی ویکھو وارث ہوراں اوس دے تورن لئی لفظ ''کُوچ'' ورتدا ہے جیہڑا لشکراں تے قافلیاں لئی بہتا ورتیا جاندا۔ رانجھے دا ''کوچ'' اک پڑاں نوں چھڈ کے دوجے پڑاں ول ہے۔

پرانی وسوں وچ دریا یا ندی بندے دے تصور دی اخیری حد وی ہے۔ ندی یا دریا دے پار سفنیاں دی دنیا ہے ''ندیوں پار رانجھن دا ٹھانہ'' ہے پر ایس سفنیاں دی دنیا تائیں جاون لئی پچھلے نال توڑنا تے ان ڈٹھی دنیا وچ وڑنا پیندا ہے۔ ایہہ بڑے جیرے دا تے بہادری دا کم ۔ پر رانجھا ایس سفنیاں دی دنیا وچ وڑن لئی تیار ہے۔

تریجے مصرعے دا اخیر ''ساتھ لدیا پار مہانیاں نیں'' تے چوتھا مصرعہ دریا دی ہورویں ورتوں تے چانن پاوندا ہے۔ ملاحاں لئی دریا روٹی روزی کماون دا ذریعہ ہے۔ چوتھے مصرعے وچ وارث شاہ لڈن ملاح دے وڈھی خور ہوون تے دس ہی رہیا ہے پر ایہہ وی دس رہیا ہے جو اوس دے ویلیاں وچ وڈھا بیوپار دریاواں راہیں ہوندا سی۔ مطلب بیوپاری باہر دی دنیا نوں پنجاب وچوں وستاں گھلدے سن۔ شہد د کپا اک سینت وی ہے ایس گل دی جو پنجاب دی معیشت اوس ویلے بیوپار تے وستاں دی پیداوار تے اوہناں نوں باہر گھلن وچ چوکھی اگے سی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels