Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٤٤

ہیر وارث شاہ بند ٤٤

June 21st, 2007
4 / 5 (1 Votes)

رانجھے آکھیا پار لنگھا ابّا میکوں چاڑھ لے رب دے واسطے تے
اسیں رب کیہ جاندے بھین پاڑا بیڑا ٹھیلدے لب دے واسطے تے
اساں رزق کماونا نال حیلے بیڑے کھچدے ڈب دے واسطے تے
ہتھ جوڑ کے منتاں کرے رانجھا ترلا کراں میں جھب دے واسطے تے
رُس آیا ہاں نال بھائیاں دے جھٹ کراں سبب دے واسطے تے




مشکل لفظاں دے معنے

ابّا۔ پیو، وڈھا
میکوں۔ مینوں
ٹھیلدے۔ چلاوندے، دھکدے
لب۔ منافع، لابھ، لالچ
حیلے۔ بہانے، واسطے نال
ڈب۔ دھوتی دی لک دوالے مروڑی نوں جیب دے طور وی ورتیا جاندا ہے، شریف صابر ہوراں ایہدا مطلب خوراک نال بنن والی جثے دی طاقت لکھیا ہے۔ پر جیس پچھوکڑ وچ گل ہو رہی ہے اوس وچ ڈب دھوتی دی مروڑی نال بنی جیب ہے ۔ ایہہ جیب لکی ہوئی وی رہندی ہے۔
جھب۔ چھیتی

سدھا مطلب

رانجھے نے ملاح نوں کہیا جو میں تینوں وڈھا من کے تے رب دا واسطہ پا کے کہ رہیا ہاں جو مینوں دریا دے پار لنگھا دے
ملاح بھین دی گالھ کڈکے کہندا ہے جو اسیں رب نوں کیہ جاننے ہاں ، اسیں تے بیڑے منافع لئی چلاونے ہاں
ملاح گل ودھاندیاں کہندا ہے جو اسیں تے داء دپے تے آنے بہانے رزق کماونا ہے تے بیڑے اپنی جیب بھرن لئی کھچدے ہاں
رانجھا پھیر ترلے تے منتاں کرکے کہندا ہے جو مینوں بڑی چھیتی جانا ہے ایس لئی تیرے ترلے مار رہیاں
میں بھراں تے بھابیاں نال رُس کے آگیا ہاں تے کوئی سبب لبھ رہیاں(پار جاون دے)۔

کھلارواں مطلب

ایس بند دو پہلی گل تے رانجھے دی عاجزی تے نمانتا ہے دوجے پاسے لُڈّن ملاح دا غرور تے تکّبر۔رانجھا ملاں نال تے ساہواں ہوکے دلیل کر رہیا سی پر اوس دی ایتھے کوئی واہ نہیں چلدی، کیوں جے ملاح دا کم پرائیویٹ سیکٹر وچ ہے جتھے رانجھا ایہہ نہیں کہ سکدا جو ملاح اِک لوک ادارے تے مل ماری بیٹھا ہے۔ ہاں ملاح اوس نوں انج ہی، سگوں ہو بھیڑی طرحاں جھڑکا جھاڑدا ہے۔

ملاں تے ملاح اکو ہی کم کردے نیں یعنی لوکاں توں کمائی تے ماڑے بندے نوں کول پھٹکن نہیں دیندے۔ تے مزے دی گل ویکھو ملاں نے ایہہ پینترا رب داٹھیکیدار بن کے کرنا شروع کیتا ہے۔ ملاح رب نوں کجھ وی نہیں سمجھدا اوہ ایہہ کہ کے ''اسیں رب کیہ جانئیے بھین پاڑا'' دس دیندا ہے جو نہ اوہ رب نوں منندا ہے تے نہ ہی اوسدے واسطے نوں۔

وارث شاہ لڈن ملاح راہیں اوس ویلے دے (اجوکے) بیوپاری، کمرشل تے سرمایہ دا طبقے دے مڈھلے عقیدیاں تے چانن پا رہیا ہے۔ لڈن ملاح والے ڈائیاگ توں پتہ لگدا ہے جو اٹھارہویں صدی دے پنجاب وچ سرمایہ داری پونگرنی شروع ہو چکی سی تے وڈھی پدھر تے کاروباری طبقے پیدا ہو رہے سن۔ اہناں نویاں طبقیاں دا مذہب، دین دھرم نال کوئی لینا دینا نہ سی تے نہ ہی ہوندا ہے۔ اوہناں دا دھرم پیسہ ہوندا ہے جیہڑا لڈن ملاح رانجھے نوں دس رہیا ہے۔ ''بیڑے کھچدے ڈب دے واسطے تے'' وچ ایہہ گل نترجاندی ہے۔

رانجھا وی ملاح نوں نندا نہیں سگوں منتاں کردا ہے۔ رانجھے نوں پتہ ہے جو ملاح ظالم تے لالچی ہے ہر پیسہ کم کرکے محنت نال بناوندا ہے اوہ ملاں وانگ بیٹھے بیٹھے حلویاں دی باس نہیں سنگدے تے ''انھے کوڑھیاں لولیاں وانگ بیٹھے'' لوکاں دی مفت وچ کمائی نہیں کھاندے۔ ایس توں ایہہ وی پتہ لگدا ہے جو سرمایہ داری دے مذہب نال ملاں دے مذہب نالوں لڑنا بہتا اوکھا ہے۔

رانجھے دی نمانتا توں ایہہ وی پتہ لگدا ہے جو سفنیاں دی دنیا تائیں اپڑن لئی اپنے آپ نوں مٹی نال مٹی کرنا پیندا ہے۔ جے تسیں پنڈاں دے چوہدریاں دے سبھا جاندے ہو تے تہانوں پتہ ہے اوہناں لئی رانجھے ورگی اپنے اندر نمانتا پیدا کرنی ممکن ہی نہیں۔ اوہ جے پتن تے وی جاون گے تے اپنی چوہدراہٹ نال کم کڈھوان گے۔ کسے لوکل چوہدری دی مدد لین گے یا کوئی ہور داء مارن گے۔ اوہ فقیراں وانگوں نمانے کدی نہیں بنن گے۔ پر رانجھا تے اوس دنیا وچ نکل رہیا ہے جتھے زمین جائیداد دا غرور تے مان ہے، اوہ تے عشق دی جوہ وچ وڑ رہیا ہے جتھے نمانتا پہلی شرط ہے!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels