Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٤٥

ہیر وارث شاہ بند ٤٥

June 26th, 2007

پیسہ کھول کے ہتھ جے دھریں میرے گودی چاء کے پار اتارنا ہاں
اتے ڈھیکیا مفت جے کن کھائیں چا بیڑیوں زمین تے مارنا ہاں
جیہڑا کپڑا دے تے نقد مینوں سبھو اوس دے کم سوارنا ہاں
زوراوری جو آن کے چڑھے بیڑے ادھواٹرے ڈوب کے مارنا ہاں
ڈوماں اتے فقیراں تے مفت خوراں دوروں کتیاں وانگ دِھرکارنا ہاں
وارث شاہ جہیاں پیر زادیاں نوں مڈھوں بیڑی دے وچ نہ واڑنا ہاں




مشکل لفظاں دے معنے

ڈھیکیا۔ بدھو، احمق
ادھواٹڑے۔ ادھے رستے وچ
ڈوماں۔ گاون وجان والیاں
دِھرکارناں۔ نفرت نال دور ہٹا دینا
مڈھوں۔ ہر گز، بالکل

سدھا مطلب
ملاح رانجھے نوں آکھدا ہے جے تو پیسے میرے ہتھ تے دھر دیویں تے میں تہانوں گودی وچ چک کے دریا دی پار اتار دیواں گا۔
کوئی وی جیہڑا مینوں کپڑا دیوے یا مینوں نقدی دیوے اوہناں دے کم سوار دینا ہاں۔
جے کوئی زبردستی بیڑے وچ آن کے چڑھ جاوے تے اوس نوں ادھ دریا وچ ڈوب کے مار دیاں گے
میں گاون وجاون والیاں، تے فقیراں یا مفت خوراں نوں دوروں کتیاں طرحاں دِھرکار دینا ہاں
تے وارث شاہ جیہاں پیرزادیاں نوں بیڑی وچ پیر ہی دھرن نہیں دیندا۔

کھلارواں مطلب
ایس بند وچ وارث شاہ کاروباری طبقے دے پینترے دی گل کر رہیا ہے۔ ایس طبقے لئی ذات برادری، مذہب، ریت رواج دا کوئی مطلب نہیں۔ ایس طبقے دا مڈھلا مقصد پیسہ بناونا ہے۔ جے کسے کول پیسہ ہے تے اوس نوں گودی وچ کھڈاون گے پر جے کوئی ماڑا مفت خورا ہے تے اوس نوں ادھ دریا وچ ڈوبن توں وی نہیں اجھکن گے۔

بیوپاری تے کمرشل طبقیاں دا ایہہ ورتن ڈھنگ دو دھاری تلوار ہے۔ اک پاسیوں تے ایہہ بڑا انسان دشمن ہے جو پیسے بنا بندہ بندہ ہی نہیں۔ پر دوجے پاسے ایہہ وی ہے جو کمرشل طبقہ ذات برادری، تے جاگیرداری سماج دیاں ولگناں بھن توڑ دیندا ہے۔ اوس نوں کسے دے پچھے نال کوئی غرض نہیں اوہ صرف اپنے منافعے نوں ویکھدا ہے۔اوس لئی چوہڑا چمیار، سانسی سب اکو جیہے ہین جے اوہ پیسہ بناون دا ذریعہ بن سکدے ہین۔ ایسے لئی کمرشل ودھا نال ذات برادری ٹٹ جاندی ہے۔وارث شاہ دے ایس بند توں لگدا ہے جو اٹھارویں صدی وچ ایہہ طبقہ پیدا ہونا شروع ہوگیا ہویا سی۔

ایس بند وچ اک پکھ ہور سامنے آؤندا ہے جو کیویں منافع خوار تے ملانے کلاکاراں تے عام ورتارے توں وکھرے لوکاں نال ورودھ رکھدے ہین۔

ملاں کہندا ہے
کتا اتے فقیر پلیت ہووے نال درّیاں بنھ کے مارئیے اوئے
وارث شاہ خدا دیاں دشمناں نوں دوروں کتیاں ونگ دِھرکارئیے اوئے

تے ملاح کہندا ہے
ڈوماں اتے فقیراں تے مفت خوراں دوروں کتیاں وانگ دِھرکارنا ہاں

ۤاخیر تے وارث شاہ گل مکاؤندیاں آکھدا ہے جو وارث شاہ ورگے پیرزادیاں نوں وی ملاح بیڑی نہیں چاڑھدا کیوں جو اوہناں کول وی پیسہ نہیں ہوندا۔ ایتھے وارث شاہ دوجیاں پیر زادیاں توں اپنے آپ نوں وکھ کر کے دسدا ہے۔ اوہ اپنے آپ نوں اک لکھاری تے شاعر من کے لوکاں نال ہی شامل سمجھدا ہے جنہاں نوں لڈن ملاح دِھرکار رہیا ہے، جیویں ڈوم فقیر تے مفت خورے۔

ایس مصرعے توں ایہہ وی پتہ لگدا ہے جو وارث شاہ اپنے آپ نوں لوکائی دا حصہ من کے لکھ رہیا ہے۔ اوہ رانجھے راہیں اپنا تے پورے سماج دا درد بیان کر رہیا ہے۔ ایتھے اوہ اک طرحاں شاعری دا مڈھلے فلسفے ول وی سینت مار رہیا ہے، جو ہر شاعر تے لکھاری کسے طبقے دا وکھالا ہوندا ہے۔ دربار دے شاعر بادشاہاں دی اکھ نال دنیا ول ویکھن تے وکھاون دی کوشش کر دے ہین ، پر وارث شاہ اپنے آپ نوں سب توں تھلڑے رلدے پھردے لوکاں دا سنگتی سمجھدا ہے۔ ایسے لئی اوس نوں پتہ ہے جو لڈن ملاح ڈوماں فقیراں نوں رد اوس نوں وی رد رہیا ہے کیوں اوہ اوہناں دا سنگتی ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels