Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٤٦

ہیر وارث شاہ بند ٤٦

June 27th, 2007

رانجھا منتاں کر کے تھک رہیا انت ہو کندھی پرہاں جا بیٹھا
چھڈ اگ بیگانڑی ہو گوشے پریم ڈھانڈری وکھ جگا بیٹھا
گاوے سد فراق دے نال رووے اتے ونجھلی سبد وجا بیٹھا
جوکوئی آدمی تریمتاں مرد ہیسن پتن چھڈ سب اوس تے جا بیٹھا
رناں لڈن جھبیل دیاں بھرن مٹھیں پیر دوہاندے ہِک ٹکا بیٹھا
غصہ کھاء کے لئے جھبیل جھیاں، اتے دوہاں نوں ہاک بلا بیٹھا
پنڈا باہوڑی جٹ لیجاگ رناں کیہا شغل ہے آن جگا بیٹھا
وارث شاہ ایس موہیاں مرد رناں ناہیں جاندے کون بلا بیٹھا





مشکل لفظاں دے معنے
انت۔ اخیر
کندھی۔ دریا دا کنڈھا
بیگانڑی۔ بیگانی، دوجے دی
ڈھانڈری۔ ککھاں کانیاں دی نکی جیہی دھونی
سد۔ اچی آواز وچ گایا درد بھرا گیت
فراق۔ جدائی
سبد۔ہر راگ دیاں سراں سب ہوندیاں نیں۔
ونجھلی سبد۔ ونجھلی دیاں متھیاں سراں
تریمتاں۔ عورتاں
تے یا تھے۔ کول، نزدیک
جھبیل۔ لڈن ملاح دی ذات
مٹھیاں بھرنا۔ مٹھی چاپی کرنا تاں جو تھکاوٹ لتھ جاوے
ہک ۔ سینہ
جھئیاں۔غصے دے دورے پینے
ہاک۔ اچی آواز وچ بلانا
پنڈا۔ پنڈ والیو
باہوڑی۔ پہنچیو، آئیو (اوکھے ویلے دی پکار)
لیجاگ۔ لے جائے گا
موہیاں۔ کسے دا دل لٹ لینا،

سدھا مطلب
رانجھا جدوں منتاں ترلے کر کے تھک گیا تے اوہ دریا دے کنڈھے تے کجھ دور ہٹ کے بہہ گیا
اوس نے بیگانی اگ چھڈ دتی۔ مطلب اوس لڈن ملاح دی مجلس چھڈ دتی تے جا کے وکھری اک پاسے دھونی رچا لئی
اوس فراق دے درد بھرے گیت گاون لگ پیا تے نال ہی روندا وی جاندا ہے ، مطلب اوس دے گیت دل دا روون ہے۔ اوہ ونجھلی دیاں سب تاناں وی لا رہیا ہے۔
پتن اُتے جنے مرد عورتاں سب سب اوس دے دوالے آکے بہہ گئے
لڈن ملاح دیاں دوہیں بیویاں وی آکے اوسدی مٹھی چاپی کرن لگ پیاں تے اوہ دوہاں دی ہک تے پیر ٹکا بیٹھا۔ مطلب اوس اوہناں دوہاں دا دل موہ لیا
ملاح نوں ایہہ ویکھ ویکھ کے غصے دے دورے پے رہے ہین ، اوہ دوہاں بیویاں نوں واجاں مار کے بلا بیٹھا (پر اوہ نہیں آئیاں)
[پھیر اوہ پنڈ والیاں نوں پکاردا ہے] اوئے پنڈ والیو بوہڑو، آوو، ایہہ جٹ میریاں بیویاں لے جاوے گا، سمجھ نہیں آوندا ایس نے پتہ نہیں کیہ شغل لا دتا ہے آکے
ایس نے جیویں مرداں تے عورتاں دا من موہ لیا ایس توں پتہ نہیں لگدا جو ایہہ بلا کیہ شے ہے۔

کھلارواں مطلب

ایس بند وچ اسیں ویکھنے ہاں جو رانجھا جدوں ملاح دے جواب توں نراش ہو جاندا ہے تے پھیر ونجھلی وجاوندا ہے تے لوکاں نوں اپنے دوالے اکٹھا کر لیندا ہے۔ ایس توں پہلاں جدوں اوہ مسیت وچ بھکھ ننگ نوں جھاک کے وڑیا سی تے اوتھے وی وارث شاہ ہوراں لکھیا سی

ہتھ ونجھلی پکڑ کے رات ادھی رانجھے مزہ بھئی خوب بنایا اے
رن مرد نہ پنڈ وچ رہیا کوئی سبھا گرد مسیت سدایا اے

تے ایتھے وی ویکھو اوہو منظر پھیر کھچیا گیا ہے ''جو کو آدمی تریمتاں مرد ہیسن پتن چھڈ سب اوس تے جا بیٹھا''۔
سو ونجھلی رانجھے دا اخیری تے اکلا ہتھیار ہے جیس نال اوہ لوکائی نوں اپنے نال جوڑ کے تے اپنا کم کڈھدا ہے۔ وارث شاہ ہوراں آپ ونجھلی دی سینت بارے اخیری بند وچ کہیا ہے

جیہڑا بولدا ناطقہ ونجھلی ہے، جس ہوش دا راگ سنایا ای

مطلب ونجھلی دا وجنا سرت دا جمنا ہے۔ تے رانجھا اپنی سرت نال دوجیا ں لوکاں نوں نال رلاوندا تے مسیت تے مل ماری بیٹھے ملاں نال تے ایس بند وچ لڈن ملاح نوں ٹکراوندا ہے۔

اوہ ملاح نال ملاں طرحاں بحث کر کے اپنا حق نہیں جتا سکدا جیویں اسیں پچھلے بند دی تشریح وچ کہیا سی۔ ایس لئی ایتھے ملاح دے اپنے اندر دا پاڑ اوہدی مدد کردا ہے۔ لڈن ملاح دیاں دو بیویاں دا اوس تے مہربان ہوجانا لڈن دی اپنی تھوڑ دی تے اپنے اندر پاڑ دی سینت ہے۔ رانجھے دی سرت اپنے مخالف دے اندر دے پول پاروں جت جاندی ہے۔

تاریخ دا عمل وی انج ہی ہے جو جبر دے نظام دے اندر ایہو جیہے پاڑ ہوندے نیں جیہڑے اوس دے ٹٹن دا سبب بندے نیں تے نویں سرت والیاں نواں نظام قائم کرن وچ ہتھ پواندے نیں۔ نظام دے چلاون والیاں دے وس وچ نہیں ہوندا جو اپنے اندرلے پاڑاں نوں میل سکن جیویں ملاح دے وس وچ نہیں ہے جو اوہ اپنیاں نیویاں نوں ڈک سکے۔ اوس نے ایہہ شاید کدی سوچیا وی نہیں سی جو کوئی سرت وند بندہ اوس دیاں زنانیاں دا من موہ سکدا ہے تے ایسے لئی اوس نوں رانجھا کوئی ''بلا'' دسدا ہے۔ مطلب باہرلی دنیا وچوں آئی ہستی جیڑی بندیاں تے مل مار لیندی ہے۔ رانجھے دی سرت اوس لئی اک باہرلی بلا وانگ ہی ہے کیوں جو اوس دا کم ہی تاں چل سکدا ہے جو اوس دے آلے دوالے بے سرتی ہووے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels