Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٤٧

ہیر وارث شاہ بند ٤٧

July 18th, 2007

لڈن کرے وسواس جیوں آدمی نوں یارو وسوسہ آن شیطان کیتا
ویکھ شور فساد جھبیل سندا مئیں رانجھے نے جیو حیران کیتا
بنھ سرے تے واہل تیار ہویا ترت ٹھلنے دا سمیان کیتا
رناں لڈن دیاں ویکھ کے رحم کیتا جو کجھ نبی نے نال مہمان کیتا
ایہو جیہے جی آدمی ہتھ آون جان مال پوار قربان کیتا
آؤ کریں ہیں ایس دی منت زاری وارث کاستھوں دل پریشان کیتا



مشکل لفظاں دے معنے
وسوسہ۔ فکر، شک
جھبیل۔ لڈن ملاح دی ذات
سندا۔ اوس دا
واہل بنھنا۔ دریا لنگھن لئی جتی کپڑے سر تے بنھ لینا
ترت۔چھیتی، شتابی
ٹھہلنے۔ تیرن
سمیان۔ سامان، تیاری
نبی نے نال مہمان کیتا۔ رسول اللہ نے اک یہودی پروہنے نال بڑا چنگا ورتارا کیتا حالاں اوسنے جان بجھ کے بستر خراب کر دتا۔
کاستھوں۔ کیس وجہ توں۔

سدھا مطلب
لڈن دے دل وچ انج دے ہی شک اگر گئے ہین جیویں شیطان بندے وچ شک پاوندا ہے
لڈن ملاح دا رولا سن کے رانجھے دا دل پریشان ہو گیا
اوس نے اپنے کپڑے تے جتی سر تے بنھ لئی تے اوہ آپ ہی دریا وچ چھال مارن لئی تیار ہو گیا
لڈن دیاں بیویاں نوں اوس تے انج ہی رحم آیا جیویں رسول اللہ نوں یہودی پروہنے تے آیا سی
[اوہ سوچدیاں ہین] جے ایہو جیہے بندے مل جاون تے اوہناں توں جان مال قربان کردینا چاہی دا ہے
آؤ چل کے اوس دا ترلا کرئیے ، اوس نے کیوں دل پریشان کیتا ہویا ہے۔

کھلارواں مطلب
ایہہ بند پڑھن وچ بڑا سدھا ہے پر ایس دی رمز ڈوہنگی ہے۔ کیوں جو وارث شاہ ہوراں پہلے ہی مصرعے وچ لڈن دیاں شکاں نوں شیطان نال جوڑ کے دس دتا جو لڈن رانجھے تے اپنیاں بیویاں دے رشتے نوں پٹھے پاسے لے جا رہیا ہے۔ جیویں شیطان دا کم بندے نوں سدھی راہ توں لاہونا ہے انج ہی لڈن وی سدھی راہ توں لتھ گیا ہے۔ اوہ لتھے وی کیویں نہ، اوہ پیسے دا لوبھی ہے تے اوس لئی پیسے دے رشتے توں وکھ کوئی ساک نہیں۔ ایس لئی سارے پتن تے رانجھے دی ونجھلی لوکائی نوں جگاوندی ہے پر لڈن تے اوس دا کوئی اثر نہیں ہوندا۔ اوس دی روح کجھ وی مان نہیں سکدی کیوں جو اوس وچ پیسے دا لوبھ ہے تے لوبھ تے شک اک دوجے دے بھین بھرا نیں۔

اوس دے الٹ رانجھا ہے اوہ جدوں لڈن دے رولے تے پریشان ہو جاندا ہے تے آپ ہی ٹھلہن دی تیاری کر لیندا ہے۔ مطلب اوہ کسے وی حال وچ پچھاں نہیں مڑدا بھانویں اگے جاون وچ اوس دی جان ہی کیوں نہ چلی جاوے۔ جیویں اسیں کہیا سی جو دریا دا پار سفنیاں دے دیس دی سینت ہے تے رانجھا جان گوا سکدا ہے اپنے سفنے نہیں تیاگ سکدا۔

تیجے مصرعے وچ وارث شاہ لڈن دیاں بیویاں تے رانجھے دے تعلق بارے سینت ماردا ہے۔ لڈن دیاں بیویاں دا رحم کرنا تے وارث شاہ دا نبی دا ذکر نا ظاہر کردا ہے جو لڈن ملاح دیاں بیویاں رانجھے نال جنس یا کام دے ناطے نہیں جڑیاں۔ اوہ اک درد، رحم تے ڈوہنگی بندیائی دے پیار دے رشتے نال رانجھے دی سیوا کر رہیاں ہین۔ اوہناں دی سیوا وچ، اک معشوق والا رنگ وی ہے تے ماں بھین دے درد والا وی۔

وارث شاہ لڈن ملاح دے شک تے ٹوک مار کے مرداں دی سوڑی سوچ نوں وی ننگا کر رہیا ہے جیس وچ عورت بس جنسی کھڈونا ہے جیس ہتھ آگیا اوہ کھیڈ لوے۔ لڈن ملاح ایس توں ودھ سوچ ہی نہیں سکدا جو رانجھا اوسدیاں بیویاں نال جنس تے کام توں وکھ کیہ ساک بنا سکدا ہے۔ اوہ ایہو ہی سمجھدا ہے جو اوس دیاں بیویاں رانجھے نال نسن نوں تیار بیٹھیاں ہین۔حالاں رانجھے یا اوسدیاں بیویاں دی کوئی گل ایہہ ظاہر نہیں کردی۔

ایسے لئی پنجویں مصرعے وچ اوہ کہندیاں ہین جو رانجھا اوہ بندہ ہے جیس توں جی جان قربان کیتا جا سکدا ہے۔ مطلب اوس دے اندر بندیائی دے اوہ گن ہین جیس نوں سماج وچ مدھولی ہوئی زنانی سمجھ سکدی ہے۔ وارث شاہ لڈن ملاح دیاں بیویاں دی سینت توں پتہ نہیں کیہڑا وچار دھارا دا کم لینا چاہندا ہے پر ایہہ صاف ہے جو اوہ اوہناں راہیں مرد عورت دے اک اجیہے رشتے ول وی دھیان دوا رہیا ہے جیہڑا جنس، کام تے اک دوجے تے مل مارن نالوں وکھ ہے۔

لڈن دیاں بیویاں جاندیاں ہین جو اوہ دریاؤں پار کسے اپنے سفنے دے پینڈے وچ ہے تے اوہ بس اوس دی سنگت مان کے اوس دی امداد کرنا چاہندیاں ہین۔ اوہ اوس دی منت زاری کرکے اوس نوں ڈبن توں روکدیاں ہین تے اخیر اوس نوں پار لاون تک اوس دے نال نال رہندیاں ہین۔ اوہ زنانی تے مرد دے اک بندیائی دے ساک نوں نبھاندیاں ہین۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels