Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٥٠

ہیر وارث شاہ بند ٥٠

July 20th, 2007

یارو پلنگ کیہا سنُنّی سیج اِیتھے لوکاں آکھیا ہیر جٹیٹڑی دا
بادشاہ سیالاں دے ترنجناں دی، مہر چوچکے خان دی بیٹڑی دا
شاہ پری پناہ نت لئے جِس تھوں ایہ تھاؤں اُس مشک لپیٹڑی دا
اسیں سبھ جھبیل تے گھاٹ پتن سبھا حکم ہے اوس سلیٹڑی دا

مشکل لفظاں دے معنے

سُنّی۔ ویران، بے آباد
جٹیٹڑی۔ جٹی۔۔۔ایسے طرحاں وارث شاہ ہبیٹی توں بیٹڑی، لپیٹی توں لپیٹڑی تے سلیٹی توں سلیٹڑی بنایا ہے
ترنجن۔ جتھے کڑیاں اکٹھیاں ہوندیاں نیں۔
شاہ پری۔ کوہ قاف دی رانی، پریاں دی ملکہ
پناہ لینا۔ مقابلہ کرن توں ڈرنا
مشک لپیٹڑی۔ خوشبو وچ لپیٹی ہوئی، جیس دا جثہ خوشبو وچ رچیا ہووے
جھبیل۔ بیڑی چلاون والے ملاحاں دی ذات
گھاٹ۔ دریا کنارے نہاون، کپڑے دھون دی تھاں۔ دریا تے کسٹم ڈیوٹی لین لئی بنائی تھاں
سلیٹڑی۔ سلییٹی رنگ دی، سانولی

سدھا مطلب

[بیڑی وچ پیا] پلنگ نہیں اک ویران سیج سی، جیس بارے لوکاں دسیا ایہہ جٹی ہیرا دا ہے
اوہ مہر چوچک دی دھی ہے تے سیالاں دیاں ترنجناں دی باشاہ ہے۔
اوہدا جثہ خوشبوواں وچ ولیھٹیا ہویا اے، اوہ ایڈی سوہنی تے ڈاہڈی ہے جو پریاں دی ملکہ وی اوس نال مقابلہ کرن توں ڈردی ہے
اسیں، جھبیل ذات دے لوک، گھاٹ تے پتن تے اوسے سانولی سوہنی دا حکم چلدا ہے۔

کھلارواں مطلب

پچھلے بندوچ رانجھے دے بیڑی وچ مڑ آچاڑھے جاون نوں بہشت وچ مڑن آکھیا گیا سی۔ مرد دا گناہ زنانی [لڈن ملاح دیاں بیویاں] نے بخشیا یا بخشوایا تے اوہ مڑ بہشت وچ آوڑیا، یعنی اوہدا اپنے آپ نالوں، زنانی نالوں تے قدرت نالوں نکھیڑا تے وجوگ مکا۔ رانجھے نوں نہا کے ، نواں کر کے ''بیوی'' ہیر دے پلنگ تے چاڑھیا گیا سی۔ وارث شاہ دا ہیر لئی ''بیوی'' دے لفظ دی ورتوں دھیان یوگ ہے۔ ایس دا مطلب بیوی بھی ہے تے پاک پوتر زنانی وی جیس دے پلنگ تے چڑھن لئی مرد نوں نہاونا، پرانا میل دھوناتے نواں ہوونا پیندا ہے۔

پر بیوی ہیر دا پلنگ تے اک سنی سیج ہے، اوہ سیج جیہڑی کدی آباد نہیں ہوئی، جیس نوں آباد کرن والا کوئی آیا نہیں، کیوں جو ایس نوں اوہو آباد کر سکدا سی جیہڑا نواں جیون لے کے آیا ہووے۔

پر ویکھو سنی سیج دے دوالے کڈا رعب تے کڈا رولا ہے۔ ایہہ ہیر جٹی، چوچک خان دی بیٹی، سیلاں دے ترنجناں دی بادشاہ تے شاہ پری نوں خوف دوا دیون والی دی سیج ہے، پتن ، گھاٹ تے اوتھے دے جھبیل لوکاں تے حکم وی اوس دا ہی چلدا ہے پر اوہ ایہہ سب کجھ ہوندیاں وی سیج نوں آباد نہیں کر سکدی، اوہ اوہدے سنے پن نوں نہیں مکا سکدی۔

اخیری سطر وچ کہیا تے ایہہ گیا ہے جو جھببیل ملاح، بیڑی تے گھاٹ پتن سب ہیر دی راٹھا چاری وچ ہین۔ پر جے کجھ بند پچھانہہ پرتو تے نقشہ کجھ ہوردسدا سی ۔ اوتھے لڈن ملاح وڈھی لے کے بانیاں دے شہر دے کپے لد رہیا دسدا ہے۔ تے لگدا ہے جیویں اوہ ہی ایس شپنگ بزنس دا مالک ہے، پر ایتھے پتہ لگدا ہے جو لڈن ایہہ کاروبار سیال راٹھاں نال پتی (حصے داری) وچ کر رہیا ہے تے وچ ڈنڈی مار کے شہد دے کپے ورگیاں شیواں وی لد لیندا ہے جیس دی راٹھاں کسے وجہ توں مناہی کیتی ہوئی ہے۔ نجم حسین سید ہوراں وی ایس نقطے نوں چکدیاں کہیا ہے ایتھے لگدا ہے کہ راٹھ تے جاگیرداراں اپنے سیپیاں نال کسے حد تائیں حصے داری تے کاروبار وچ ہتھ پیر مارنے شرع کر دتے ہین۔ ایس لئی لڈن ملاح اجے ہے تے ہیر دا سیپی پر اوہدی وکھری حیثیت تے گنڈھ وی بننی شرع ہو چکی ہے۔

ایس پکھ توں جے ویکھئیے تے ایہہ وی کہیا جا سکدا ہے جو ہیر دی سنی سیج راٹھا چاری دے نظام دی نامردی دا وکھالا ہے، ایہہ نظام وپار تے بندیاں دی نویں ورتوں راہیں اپنے آپ نوں چلاون دے جتن کر رہیا ہے پر ایس وچ اینی شکتی نہیں جو اوہ اجے وی سنی سیج نوں وسا سکے ، اوہ اوس نوں جیوا سکے۔

ایس لئی نامرد سماج نوں نویں حیاتی دیون لئی اگونہے بندیاں دیاں لوڑ ہے جیہڑے آپ نظام دی کھرک نال کھاہدے نہ ہوون۔ اوہ آپ نویں وچار دھارا وچ رچے ہوون تے تاں ہی پرانے اوہ ویہار دی سنی سیج نوں وسا سکدے ہین۔

ایہہ وی کہیا جاندا ہے جو ہیر دا سماج پشوپال ہے تے رانجھا واہی بیجی دے نظام وچوں آیا ہے۔ واہی بیجی پیداواری ارتقاء وچ پشو پالن توں بعد آئی ایس لئی اوس نوں پشو پالن نالوں ودھ اگونہا کہیا جاندا ہے۔ ایس لئی ایس پکھ توں ویکھن والے ایہہ وی کہندے ہین جو رانجھا اگونہے سماج دی وی اگونہی سرت لے کے ہیر دے نظام وچ آیا ہے۔ اوہ ہی ہیر دا آگو ہو سکدا ہے تے اوس دی سنی سیج آباد کرن دی ہمت کر سکدا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels