Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٥٢

ہیر وارث شاہ بند ٥٢

July 27th, 2007

جا ماہیاں پنڈ وچ گل ٹوری اک سُگھڑ بیڑی وچ گاوندا ہے
اوہدے بولیاں مُکھ تھیں پھل ِکردے، لاکھ لاکھ دا سد الاوندا ہے
سنے لُڈن جھبیل دیاں دوویں رناں سیج ہیر دی تے انگ لاوندا ہے
وارث شاہ کواریاں آفتاں نیں ویکھ کہیا فتور ہُن آوندا ہے

مشکل لفظاں دے معنے

ماہیاں۔ ماہی دی جمع، مجھاں چارن والے۔پرانے ویلیاں وچ ایہہ مجھاں چارن والے ہی کڑیاں دا آئیڈیل ہوندے سن کیوں جو اوہ سب توں وڈھا تے اوکھا کم کردے سن۔ ایس لئی محبوب لئی ماہی دا لفظ زبان دا حصہ بن گیا۔
سُگھڑ۔ گُڑھیا ہویا بندہ، ساؤ
الاونا۔ سر وچ گاونا
انگ لاونا۔ پیار محبت کرنا

سدھا مطلب

ڈنگراں دیاں چروالاں پنڈ وچ جا کے گل دھمائی جو اک بڑا ہی گڑھیا ہویا بندہ بیڑی وچ گاوندا ہے
اوہدا گاونا اجیہا ہے جو جیویں اوس دے منہ وچوں پھل کرن، اوہدا اک اک بول لکھ لکھ دا ہے
اوہ لڈن جھبیل دیاں دوہیں بیویاں نوں نال لے کے ہیر دی سیج تے پیار محبت کر رہیا ہے
ورث شاہ، دس رہیا جے تہانوں جو کواریاں کڑیاں آفت ہوندیاں نیں تے ہن ویکھو کیہا فتور آوندا ہے

کھلارواں مطلب

رانجھے نے جہڑی سانجھ بیڑی وچ پیدا کیتی ہے، اوہ بیڑی تیکر ہی نہیں رہی اوہ باقی خلقت تائیں وی پج رہی ہے۔سانوں پنڈدے چروالاں دیاں پنڈ وچ جا کے کیتیاں گلاں توں پتہ لگدا ہے جو رانجھے دی آواز وچ تے اوس دے نویں حیاتی دی خوشبو پیدا کرن نال لوکاں تے کیہ اثر ہو رہیا ہے۔

اوہو آواز تے ونجھلی دی سد جیہڑی بھرجائیاں نوں اک نکھٹو دی ویلا ٹپاون دی کارستانی دسدی سی، جیہڑی ملاں لئی شرع دا النگھن ہے تے ملاح لئی اوس دیاں بیویاں نوں ٹھگن دا سند (اوزار) ہے اوہ خلقت نوں پھلاں وانگ جاپدی ہے، اوہدیاں بولاں نال خلقت دیاں اکھاں نوں تراوت ملدی ہے تے اوس دی سوگندھ نال بندے پرندے کیلے جاندے نیں۔ ایہہ خلقت تخت ہزارے دی ہووے، ملاں دی مسیت والے پنڈ دی یا اوہ خلقت بیڑی وچ ہووے۔ ایس خلقت لئی اوس دے بول لاکھ لاکھ دے ہین ، اوہ لاکھ لاکھ جیہڑے خلقت نے سنے ہین پر ویکھے نہیں ۔ پر ایتھے اوہ لاکھ لاکھ مفت ورتائے جا رہے ہین رانجھے دے بولاں وچ۔

وارث شاہ ہر منزل تے رانجھے دوالے خلقت دی سانجھ بناوندا تے سماج وچ لٹن والے بھراواں، ملاحواں تے لڈناں نوں دوجے پاسے کھڑا کر دیندا ہے۔ بھرا بھرجائیاں بھوئیں دی مالکی دے نشے وچ قاضی تے پینچاں نوں وڈھی دیندے ہین تے لڈن اپنے پیٹ لئی تے دوزنانیاں تے مل مارن لئی وڈی کھاندا ہے، ملاں اپنے لوبھ لئی خلقت نوں دھوکہ دے رہیا ہے۔ رانجھے دے ورودھ آون والیاں ایتھوں تیکر تن طاقتاں، تن ادارے سامنے آئے ہین۔ ملکیت دا ادارہ، مذہب تے کاروبار، بیوپار۔ اہناں تناں دا تت اک ہے، سانجھی حیاتی لئی ٹھگی کرنا۔ دوجے پاسے خلقت ہے جیہڑی اک آواز تے سانجھ دی چس مانن لئی اکٹھی ہو جاندی ہے۔ رانجھے دی ونجھلی ایس سانجھ دی جاگرتا دی سینت بن جاندی ہے۔

رانجھے دی سانجھ جاگرتا لئی گائے بول تے ونجھلی دے سُر زنانی دے دل وچ بہتے کھبدے ہین کیوں جو اوہ سب توں بہتی مدھولی ہوئی ہے، اوہ مالکی دی، مذہب دی تے لڈن دے لوبھ لالچ دی ہتھوں بہتا جبر سہندیاں ہین۔ایہہ تخت ہزارے دے پنگھٹ تے ترنجن ہوون یا لڈن دیاں زنانیاں ہوون۔ ایسے لئی چروالاں نوں پنڈ والیاں نوں رانجھے دے گناں نوں ثابت کرن لئی ایہہ وی دسنا پیندا ہے جو لڈن دیاں بیویاں اوہدے سامنے ہی رانجھے تے فدا ہو رہیاں ہین تے ہیر دے پلنگ تے اوس نال موج میلہ کر رہیاں ہین۔ مطلب ایہہ اک ان ہونی ہے جیہڑی ہو رہی ہے۔ تے ان ہونی ہے رانجھے نال بنن والی لوکاں دی سانجھ۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels