Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٥٨

ہیر وارث شاہ بند ٥٨

August 21st, 2007

پکڑ لئے جھبیل تے بنھ مُشکاں مار چھمکاں لہو لُہان کِیتے
آن پلنگ تے کون سوالیا جے میرے ویر دے تُساں سامان کیتے
کُڑئیے مار نہ اساں بے دوسیاں نوں کوئی اساں نہ ایہ مہمان کیتے
چنچر ہارئیے رب توں ڈرِیں مُوئیے اگے کِسے نہ ایڈ طُوفان کیتے
ایس عشق نے نشے نے نڈھئیے نی وارث شاہ ہوریں پریشان کیتے

مشکل لفظاں دے معنے
مشکاں بنھنا۔ ہتھ پیر رسی نال بنھ دینا
بے دوسیاں۔ بے گناہاں
چنچر ہاریئے۔ چُلبلی
نڈھئیے۔ بھری جوان کڑیئے

سدھا مطلب
ہیر نے ملاحاں (جنہاں دی ذات جھبیل ہے) دے ہتھ پیر رسی نال بنھ دتے تے چھمکاں (درخت نوں کچک والیاں توڑیاں ہنیاں) مار مار کے لہو لہان کردتے۔
ہیر نے پچھیا تسیں میرے نال دشمنی کڈھن لئی کیس نوں میرے پلنگ تے سوالیا جے
ملاں کہیا، کُڑئیے سانوں بے گناہواں نہ مار کیوں جے ایس نوں اسیں پلنگ تے نہیں سوالیا
توں اک چلبلی کڑی ہیں تے تیرے توں پہلاں کدی کسے نے ایڈا طوفان نہیں سی چُکیا۔
وارث شاہ کہندا ہے جو نڈھیئے،سانوں عشق نے پریشان کیتا ہویا ہے

کھلارواں مطلب

دمودر داس تے مقبل دیاں لکھیاں ہیراں وچ ملاح نے رانجھے نوں پلنگ تے سوالیا سی۔ دمودر داس دے رانجھے نے ونجلی وجا کے اوس نوں ایڈا موہیا سی جو جد رانجھے نے اوس کولوں منگ کیتی جو اوہ پلنگ تے سونا چاہندا ہے تے ملاح نے جان تلی تے رکھ کے اوس نوں پلنگ تے سواں دتا سی۔ مقبل دا ملاح تے ہور وی نرم دل سی، اوس نے وی ایس امید نال رانجھے نوں پلنگ تے سوالیا سی ہیر نوں کِنّے دسنا ہے۔ پر وارث شاہ دا ملاح تے رانجھے دا ڈھڈوں ویری ہے کیوں جے اوس دیاں دو بیویاں اوس تے مہربان ہویاں ہویاں نیں تے اوس نوں ڈر ہے جو ایہہ میریاں زنانیاں کھوہ کے لے جاوے گا۔

اک ہور فرق وارث شاہ دا ایہہ ہے جو اوس دا رانجھا اک اکلا پلنگ تے نہیں چڑھیا، اوس نے تے پوری بیڑی تے پلنگ نوں ''عام خاص'' لئی کھول دتا ہے، اوس نے اک اتلے طبقے دی راکھویں شے نوں لوکاں دے ورتوں لئی بنا لتا ہے۔ ''بیڑی نہیں ایہہ جنج دی بنی بیٹھک'' کہ کے وارث شاہ نے رانجھے راہیں اک راٹھنی دی جائیداد نوں لوکائی دی سانجھی شے بنا دتا ہے، اوس نے اسانجھ نوں سانجھ وچ بدل دتا ہے۔ ظاہر گل ہے ایس توں ودھ راٹھاں لئی ویر دی کیہڑی گل ہو سکدی سی؟ سو جد ہیر کہندی ہے ''میرے ویر دے تساں سامان کیتے'' تے اوہ اپنے پورے طبقے دے لوکاں بارے وچار ہی دہرا رہی ہے۔

دمودر داس تے مقبل دے وارث شاہ نال نکھیڑ کیویں تے کیوں ہویا۔ دمودر داس تے مُڑ مُڑ کے جھنگ دے راٹھاں نوں بھوئیں دے سائیں تے کھسم کہ کے اوہناں دے حق نوں مندا ہے۔ ایہہ ایس لئی وی ہے جو دمورداس اکبر دیں ویلیاں وچ ہویا جدوں مغل شاہی دی چڑھت سی تے جاگیرداری طبقہ بن کے ودھنا پھلنا شروع ہویا سی۔ پر وارث شاہ دے ویلے مغلاں دا بنایا حاکم میل پنجاب وچ مُک رہیا سی تے اوس دی تھاں چھوٹی جٹالی وچوں نواں حاکم طبقہ بن رہیا سی۔ وارث شاہ دے ویلے سکھ مِسلاں بنیاں شروع ہو گیاں سن جنہاں اتے اوہ لوک حاکم بن رہے سن جیہڑے بہت ہی ماڑی جٹ ستھ وچوں سن۔ اوہ جُڑ کے پرانے حاکم میل نوں مُکا رہے سن۔ ایہہ وکھری گل ہے جو اخیر اوہ بن پرانے حاکم وانگ ہی سن ۔ سو وارث شاہ دا رانجھا زوراوری نال بیڑی وچ چڑھدا تے ہیر دے پلنگ تے سوندا ہے۔ رانجھا اک حد تائیں تے نویں جٹالی دا وکھالا ہے پر اوہ اوس نالوں وکھ تے اگیرے ایس لئی ہے جو اوہ بیڑی تے پلنگ نوں عام لوکاں دے سپرد کر رہیا ہے۔

مقبل تے وارث دے ویلے کجھ بہتے وکھ نہیں پر مقبل دا وچار ڈھنگ مڈھلے طور تے مذہبی ہے تے اوہ حاکم میل دی سیوا وچ ہی ہے۔ ایس لئی اوس دا رانجھا وی ہر ادارے دے رحم نال ہی کم ساردا ہے۔ ملاں وی اوس تے رحم تے کرم کردا ہے تے ملاح وی۔ اوس دا رانجھا کسے نال کھیہندا یا پنگا نہیں لیندا۔ اوہدے اُلٹ وارث شاہ دا رانجھا ہر ادارے نال بنڈی پا لیندا ہے۔ مقبل لئی تے رانجھے دا سفر کوئی روحانی ہے پر وارث شاہ دے رانجھے دا مڈھلا ٹُچا ہی ہر ادارے دا گند وکھانا تے اوس نوں اُلٹانا ہے۔ وارث شاہ تے جنگ ہی وچار دھارا کرہیا تے کروا رہیا ہے۔ایس لئی مقبل دا بیڑی تے چڑھن والا تے ہیر دی سیج تے سوون والا رانجھا ہور ہے تے وارث شاہ دا ہور۔

اک ہور گل وی دھیان یوگ ہے۔ ہیر جد ملاحاں نوں ماردی ہے تے اوہدے جواب وچ وارث شاہ دے ملاحاں دی آواز وچ کوڑ ہے جیہڑا دمودر تے مقبل دے ملاحاں وچ نہیں۔ دمور داس دا لڈن ملاح تے بہانہ ہی ایہو کردا ہے جو میں رانجھے نوں ایس لئی بیڑی تے سوالیا سی جو ایہہ پورا ولی ہے تے ایس نال وگاڑ کے کتے ہیر دا نقصان نہ ہو جاوے۔ مقبل دا ملاح کہندا ہے

سانوں اک گناہ نہ بخشدی ہیں رب بخشدا لکھ گناہ تینوں

پر وارث شاہ دے ملاح کاوڑدے ہین '' چنچر ہارئیے رب توں ڈریں موئیے اگے کسے نہ ایڈ طوفان کیتے'' ۔ ایس وچ الزام وی ہے تے بد دعا وی۔ ایہہ کاوڑ وارث شاہ دے ویلے تھلڑے طبقے ولوں پھیل رہی سی۔ دوجے ہن ہیر ورگی راٹھ دی بیڑی بھاڑے تے وی چلدی ہے۔ ظاہر گل ہے لڈن ملاح جو سامان ڈھوندا ہے اوس دی کمائی راٹھاں نوں وی جاندی ہے۔ ایس لئی ملاحاں نوں وی پتہ ہے جو اوہ راٹھاں نوں ٹھمنے دے کے کھلیار رہے ہین۔ دمودر داس دا ملاح تے ہے ہی ہیر دا سیپی اوہ بیڑی بھاڑے تے نہیں واہندا تے اوس دی ہیر حصہ نہیں لیندی۔ مقبل دا ملاح وی ہیر دا سیپی ہی ہے پر وارث شاہ دا لُڈن ملاح تے نویں بندے کاروباری وگ وچوں ہے۔ اجے اوہ راٹھا چاری دے ہیٹھ ہی ہے انج نہیں جیویں دمورداس تے مقبل دے ملاح ہین۔ ایس لئی جے رانجھا زوراوری بیڑے تے چڑھیا ہے تے ملاح وی مار کھا کے کاوڑ وکھاون جوگ ہین۔

بند دے اخیری مصرعے وچ وارث شاہ ملاحاں دا مکھوٹا منہ توں سرکا کے ہیر دے موہرے آجاندے نیں تے اوس نوں خبرادر کر رہے نیں جو تینوں اجے پتہ نہیں کیہ ہو رہیا ہے تے کیہ ہوون والا ہے۔ اوہ عشق دی پراشانی تے اپنی دس رہے ہین پر نال ایہہ وی سینت ماری جارہے ہیں جو ہیرے ایہہ پریشانی تینوں چمبڑن والی ہے۔ میں پہلے ملاحاں دا مکھوٹا چڑھا کے تینوں سمجھا رہیا ساں پر توں نہیں سمجھی تے ایس لئی میں مکھوٹا لاہ کے تینوں دس رہیاں جو ہونا کیہ ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels