Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٦٢

ہیر وارث شاہ بند ٦٢

October 8th, 2007

رانجھا آکھدا ایہہ جہان سُفنا مر جاونا ہے متوالیے نی
تساں جیہاں پیاریاں ایہہ لازم آئے گئے مسافراں پالئیے نی
ایڈا حُسن دا نہ گمان کیجے ایہہ لے پلنگ ہئی سنے نہالیے نی
اساں رب دا آسرا رکھیا اے اُٹھ جاونا ہے نیناں والیے نی

مشکل لفظاں دے معنے

سفنا۔ خواب
متوالیے۔ نشے وچ مست
پالئیے۔ سیوا کرنا، پرورش کرنا، خیال رکھنا
گمان۔ مان تے غرور
نہالی۔ دری، وچھاون

سدھا مطلب

رانجھا ہیر نوں دسدا ہے جو ایہہ جہان اک خواب ہے تے مدہوشی وچ رہن والیے اخیر مر جانا ہے
تیرے ورگے سوہنیاں بندیاں تے ایہہ فرض ہے جو تسیں آئے گئے مسافراں دی ٹہل سیوا کریا کرو
اپنے حسن دا بہتا غرور نہ کر، ایہہ پیا ای تیرا پلنگ تے تیری دری جیس تے توں ایڈا مان کرنی ہیں
سانوں تے رب دا ہی آسرا ہے تے اسیں جاننے ہاں جو جو ایتھوں اُٹھ جانا ہے بھاویں توں سوہنیاں نیناں والی ہوویں۔

کھلارواں مطلب

جدوں ہیر نال رانجھے دا میل ہویا، تے ہیر اک راٹھا چاری دی آکڑ تے حسن تے غرور دا نشان ہے۔ اوہدی حیاتی وچ آؤن والا ہر بندہ اوس نوں اہناں دو پکھاں توں ہی ویکھدا رہیا ہے۔ ایس لئی اوس دا سماج نال ورتن اک حاکمی تے دابے والا ہے۔ ہر مرد وی اوس دے اہناں گناں نوں ویکھ کے اپنے آپ نوں ہینا سمجھ لیندا ہے تے اوس نال انگ جوڑن دی سوچ وی نہیں سکدا۔ ایس لئی اوہ ہُن تیکر بندیاں وچکار اک ہی سانگا سمجھدی ہے جیس وچ اک دھر دبدی ہے تے دوجی دِھر دبیندی ہے۔پر طاقت راہیں بنیا ایہہ سانگا کوئی انسانی رشتہ نہیں جیس نے کسے نوں اندروں کسے دوجے نال جوڑیا ہووے۔

رانجھے نوں ویکھ کے ہیر دے اندر اک بندیائی دا رشتہ جاگدا ہے جیس نوں اوہ ''روپ جٹ دا ویکھ کے جاگ لدھی'' کہندی ہے۔ پر رانجھا اوس دے ہنیریاں نوں لاہون لئی سب توں پہلاں اوس دے وکھالے تے اوس دی دکھ دی اصلیت وکھاوندا ہے۔ اوس نوں کہندا ہے جو توں اپنے اک حُسن تے مان کرکے بیٹھی ہوئی ہیں، پر ایتھے تے ایہہ پورا جہان ہی شاید اصل نہیں اک سفنا ہے، کجھ پل دی کھیڈ ہے جیس نے مُک جانا ہے۔ ایہہ جیونا سفنے وانگ نکا ہے تے اخیر سب نے مر جانا ہے۔ پھیر ایس مُکن جاون والی شے تے ایڈا مان تے غرور کیویں ہو سکدا ہے؟

دوجے مصرعے وچ وارث شاہ اوس نوں اوس دی بیماری دا علاج دسدا ہے۔ جو تیرے ورگے سوہنے بندیاں لئی تے ایہہ لازم ہے جو آئے گئے مسافراں دی سنبھال کرو۔ مطلب اک نمانا تے کوجھا بندہ تے نہ وی ایہہ کُجھ کرے تے اوس وچ نمرتا ہوندی ہے پر جیس بندے نوں اپنے زور تے حُسن دا غرور چڑھیا ہووے ہووے اوہ اوس نوں کیویں لاہوے۔ رانجھا کہندا ہے جو اوسدی اک ہی راہ ہے جو اجیہا بندہ مسافراں تے آیا گیاں نوں، جنہاں دا کوئی سہارا نہیں ہوندا، پالے۔ مسافراں نوں پالن وچ ایہہ رمز وی ہے جو اوہناں تے ٹر جانا ہے تے اوہناں دی سیوا نال نہ کوئی سماج وچ مقام ودھنا ہے تے نہ ہی سیوا کروان والیاں نے عاجزی وکھاوندے رہنا اے۔ ایس لئی اوہناں دی سیوا بنا لابھ دے ہووے گی تے صرف غرور والے وچ بندیائی دی ڈوہنگھ ودھائے گی۔

ایس مصرعے دی ایہہ وی پڑھت ہو سکدی ہے جو جے پہلے مصرعے وچ جہان نوں سفنا تے ٹر جان والی تھاں آکھیا گیا ہے تے ایس مصرعے وچ مسافر ایس حیاتی وچ ساڈے نال رہن والے بندے ہین جیہڑے ساڈے وانگ زندگی دے سفر وچ ہین۔ ایتھے وی اوہناں دی حالت مسافراں والی ہے جنہاں کول نہ رہن دی تھاں ہوندی ہے تے نہ ہی کھاون لئی کُجھ۔ ایس پکھ توں تھلڑا طبقہ تے وچارا بالکل مسافر ہی ہوندا ہے، جیہڑے نتھاواں وی رہندا ہے تے جیس دا سماج تے مان وی کوئی نہیں ہوندا۔ ایس لئی پیاریاں لوکاں نوں اہناں دی سیوا کرنی چاہیدی ہے کیوں جے ایسے وچ اوہناں دا بچا ہے۔

تیجے مصرعے وچ رانجھا سدھا اوسدے حسن تے ٹوک مار دا ہے تے اوسدیاں مان والیاں وستاں نوں اپنے کول رکھن دا کہندا ہے۔ پر اخیرلے مصرعے وچ اوس نوں دسدا ہے جو سانوں تیرے حسن تے ترے پلنگ دی لوڑ کوئی نہیں کیوں جو اسیں تے شیواں دے نہیں رب دے آسرے تے جیونے ہاں۔ رانجھا ایہہ گل ایس لئی آکھ سکدا ہے جو اوہ تے پہلاں ہی بھوئیں بھانڈا چھڈ کے ہر مان تران تروڑ کے نکلیا ہویا ہے۔ اوس نوں ہیر دے حسن تے اوسدیاں وستاں کیویں موہ سکدیاں ہین۔ پر اوہ اخیر تے اوس نوں خبردار وی کردا ہے جو ایہہ رب دا آسرا ایس لئی وی کافی ہے جو اخیر تے ایتھوں اٹھ ہی جانا ہے نا۔

اُٹھ جاونا ہے نیناں والئیے نی توں بابا فرید دا ایہہ دوہا چیتے آؤندا ہے۔

جن لوئن جگ موہیا سو لوئن میں ڈٹھ
کجل ریکھ نہ سہندیاں سے پکھی سوئے بِٹھ

(جنہاں اکھاں (لوئن مطلب اکھاں) نے جگ نوں موہیا ہویا سی اوہ اکھاں میں ویکھیاں ہین۔ اوہ اکھاں جیہڑیاں کجلے دی دھار دا بھار نہیں سی سہندیاں اوہناں اُتے میں پکھیاں نوں بٹھاں کردیاں ویکھیا)۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels