Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٦٣

ہیر وارث شاہ بند ٦٣

October 8th, 2007

اجی ہیر تے پلنگ سبھ تھاؤں تیرے گھول گھتیاں جیوڑا واریا ای
ناہیں گال کڈھی ہتھ جوڑنی ہاں ہتھ لا ناہیں تینوں ماریا ای
اسیں منتاں کراں تے پیر پکڑا، تھیں تھوں گھولیا کوڑما ساریا ای
اساں ہس کے آن سلام کیتا آکھ کاس نوں مکر پساریا ای
سُنے پرہے ہے ترنجنیں چین ناہیں اللہ والیا وو سانوں تاریا ای
وارث شاہ شریک ہے کون کون اُس دا جِس نے رب نے کم سواریا ای

مُشکل لفظاں دے معنے

گھول گھتیاں۔ قربان ہویاں
جیوڑا۔ دل
واریا۔ قربان کیتا
کوڑما۔ قبیلہ
پسارنا۔ پھیلانا، ودھانا
سنّے۔ سنسان، ویران
پرہے۔ پرہیا، کھیڈن دا دائرہ،
تاریا۔ پار اتار دتا۔ بھر دتا
ترنجنیں۔ کڑیاں دا اکٹھ
سواریا۔ ٹھیک کیتا۔ کامیاب کر دتا، سنبھال دتا

سدھا مطلب

ہیر رانجھے نوں جواب دیندی ہے جو ہیر تے اوسدا دا پلنگ سب کُجھ تیرا ہے، کیوں تیرے اتوں دل وار دتا ہے
نہ میں تینوں کوئی گال کڈھی تے نہ ہی تینوں ماریا ہے
میں تیریاں منتاں کردی پئی ہاں تے پیر یں پے رہی ہیں ، میں ترے اتوں سارا ٹبر تے قبیلہ قربان کردتا ہے
اسیں تے تینوں بس آن کے ہس کے سلام ہی کیتا سی، تے توں اگوں ایڈا فن فریب بنا لیا ایس گل دا
میں پرہیا سنجی سی مینوں ترنجناں وچ چین نہیں پیندا پر توں اللہ والیا ساڈا بیڑا پار لا دتا ہے
وارث شاہ کہندا ہے جو اوس نال کوئی کیہ ونڈ یا ویر کر سکدا ہے جیس دا کم رب نے آپ کر دتا ہووے

کھلارواں مطلب

رانجھے دے کھروے تے ہیر دی ہوند نوں ہلون والیاں گلاں دے جواب وچ ہیر اوس نوں اپنا سب کُجھ دین تے وارن دا وعدہ کر رہی ہے۔ اوہ ایس گل تے وی حیران ہے جو نہ میں کوئی گاہل کڈھی، نہ میں ماریا، میں منتاں وی کر رہی ہاں تے پیریں وی پے رہیں ہاں ، تے صرف ہس کے سلام کرن تے رانجھا ایڈیاں گلاں کیوں بنا رہیا ہے۔

ہیر اجے ایس گل نوں سمجھی نہیں جو رانجھا اوس نال اپنے نال ورتارے دی گل نہیں سی کر رہیا ، اوہ تے اوس دے جہان نال ورتارے اوس دے حیاتی ڈھنگ دے بارے وچ گل کر رہیا سی تے اوس نوں دس رہیا سی جو تیرا سماج نال سانگا راٹھی چاری تے سوہنی شکل تے بنیا کھلوتا ہے۔ ایہہ کوئی انسانی رشتہ نہیں، تے جے اوس انسانی رشتیاں وچ آؤنا ہے تے اوس نوں حسن دا مان چھڈ کے نمانیاں دی سیوا کرنی پینی ہے۔

پنجویں مصرعے وچ ہیر آپ ہی من دی ہے جو اوس دا کوئی انسانی رشتہ نہیں سی۔ ایسے لئی اوس دی پرہیا سنجی سی تے اوس نوں سہیلیاں نال ترنجناں وچ کھیڈدیاں وی اکلاپا چٹ رہیا سی، اوس نوں چین نہیں سی آؤندا۔ ایتھے تسیں چیتے کرو کیویں ہیر دے سین وچ داخل ہوون نوں وارث شاہ ہوراں کیویں وج وجا کے وکھایا سی

لے کے سٹھ سہلیلیاں دا نال آئی ہیر متڑی روپ گمان دی جی
بُک موتیاں دے کنیں جُھمکدے سن، کوئی حور کہ پری دی شان دی جی

ایتھے کیویں ہیر رُجھی ہوئی تے بھرویں دسدی ہے، پر جد اوسدا اندر کھُلدا ہے تے اوتھے سُن، ویرانہ ہے، بے چینی ہے۔ جیوین پہلاں کہیا گیا سی وارث شاہ دی ایہہ اٹکل ہے جو اوہ پہلاں دوروں شیواں دا سوہپن تے چمک دمک وکھاؤندا ہے تے پھیر اوسدے اندر لے جا کے اوس دا اصلی کوہجھ تے روپ ننگا کردا ہے۔ جیویں اوس تخت ہزارے نوں دوروں بہشت کہہ کے اندر دا گند وکھایا سی، تے مسیت نوں ''اقصی دی بھین'' بنا کے اوس اندر ملاں نوں حجریاں وچ فعل کردیا دسیا سی انج ہی اوہ ہیر نال وی کردا ہے جو پہلے اوسدی دی باہر دی شان و شوکت دا اکھاں وچ شیشہ ماردا ہے تے پھیر اوسدے اندر دے ویرانے تے لے آؤندا ہے۔

ہیر نوں رانجھے دی پوری گل تے سمجھ نہیں آؤندی جو ایویں ہی کیوں وٹری جا رہیا ہے تے اوس نوں بدلن دیاں نصیحتاں کر رہیا ہے پر اوس نوں ایہہ اندر پتہ لگ گیا ہے جو اوس دے خالی دل وچ ہُن کوئی آباد ہوون آ گیا ہے۔ ''اللہ والیا وو سانوں تاریا ای'' توں وارث شاہ ایہہ وی چانن کردا جا رہیا ہے جو ایہہ اِک عام کُڑی مُنڈے دا اکھ مٹکا نہیں، ایہہ دو ہستیاں دا جون بدلن ہے، پرانا حیاتی ڈھنگ چھڈ کے نویں دا اپناون ہے۔ ہیر دا تاریا جانا ایہو ہے جو اوہ اپنی سُنج نوں بھن کے بندیائی دے رشتیاں نال جُڑے۔ تے اوس نوں لگد ہے جو ایہہ جوڑ جُڑنا شروع ہو گیا ہے۔

اخیر تے وارث شاہ ہوریں آپ وی راوی دے روپ وچ ہوکا دینا ضروری جاندے ہین ، جو جیس کسے دا کم رب کر دیوے تے اوس دا کوئی کُجھ نہیں وگاڑ سکدا۔ ایتھے ہیر نوں اللہ والے نے تار دتا ہے تے اوسدا کم وگڑ نہیں سکدا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels