Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٦٤

ہیر وارث شاہ بند ٦٤

October 22nd, 2007

مان متیے روپ گمان بھرئیے اٹھکیلیئے رنگ رنگیلئیے نی
عاشق بھور فقیر تے ناگ کالے باجھ منتراں مُول نہ کیلیئیے نی
ایہہ جوبنا ٹھگ بازار دا ای ٹونے ہارئیے چھیل چھبیلئیے نی
تیرے پلنگ دا رنگ نہ وپ گھٹیا نہ کر شہدیاں نال بخیلئیے نی
وارث شاہ بِن کاردوں ذبح کرئیے بول نال زبان رسیلئیے نی

مشکل لفظان دے معنے

مان متیئے۔ غرور نال مدہوش
گمان بھرئیے۔ غرور نال بھری ہوئی
بھور۔ بھنورا، کالی مکھی
ناگ۔ وڈھا سپ
منتر۔ کسے خاص مذہب یا جادو دے بول
مُول۔ باالکل
کیلیئیے۔ کسے نوں قابو کر لینا، بے بس کر دینا۔ عام طور تے منتر پڑھ کے باہر دیاں بلاواں نوں اک دائرے وچ قید کر لیا جاندا ہے۔
ٹونے ہارئیے۔ جادو گرنئیے
چھیل چھبیلی۔ چنچل، شوخ
شُہدیاں۔ نتانے، ماڑے لوک۔ ایتھے ایس دا مطلب شُہدے کم وی ہو سکدے آ۔ مطلب ماڑے تے گھٹیا کم
بخیلی۔ کنجوسی
کارد۔ چھری
رسیلئیے۔ رس والی، مٹھی

سدھا مطلب

رانجھا آکھدا جو توں مان وچ مست تے اپنے حسن دے غرور نال بھری ہوئی چنچل تے ہر پل رنگ بدلن والی ہیں
عاشق، بھنورے، فقیر تے کالے ناگ نوں بنا منتر دے کوئی قابو نہیں کر سکدا
جوانی بازار دے ٹھگ وانگ ہے تے توں جادو گرنی تے چلیبلی ہیں
[لوکاں دے ورتن نال] تیرے پلنگ دا نہ رنگ خراب ہویا تے نہ ہی اوس دی سوہپن وچ کوئی فرق پیا۔ پھیر توں نتانے تے ماڑیاں لوکاں نال ایڈی کنجوسی کیوں ورت رہی ہیں۔
وارث شاہ تینوں دسدا ہے جو بندے نوں مٹھی زبان نال ہی کوہیا جا سکدا ہے

کھلارواں مطلب

پچھلے بند وچ ہیر نے حیرانی وکھائی سی جو اوس نے کُجھ بُرا کہیا نہ کیتا تے پھیر رانجھا اوس نوں ٹوکاں مار رہیا ہے۔ ایس بند وچ پھیر رانجھا اوس نوں دس رہیا ہے جو اوسنوں ہیردا حیاتی ڈھنگ منظور نہیں۔ ایس لئی اوہ اوس دی ہوند دی اصلی صورت اوس نوں وکھالدیا ں کہنداہے جو اوہ مان نال مست تے غرور نال بھری ہوئی رنگ رنگ دیاں کھیڈاں کھیڈ رہی ہے۔ ایہہ ہوند سماج وچ بندیاں نال جُڑن لئی نہیں اوہناں نالوں اپنے آپ نوں وکھرا تے اُچا رکھن لئی بنائی گئی ہے۔ایس ہوند وچ عشق نہیں سماوندا۔

ایسے لئی اوہ عاشق، بھور، فقیر تے ناگ کالے دا ذکر لیاوندا ہے۔ ایہہ چاروں سماج دی ریت تو
ؓں باہر رہندے نیں۔ عاشق تے بھنورے زندگی نوں کسے اک لئی قربان کرن لئی تیار رہندے نیں جدوں کہ اپنے آپ نوں اُچا تے اپنے آپ نوں ہی موہرے رکھن والی دنیا داری دی ہوند کسے دوجے لئی قربان ہوون لئی تیار نہیں ہوندی۔ فقیر تے ناگ کالے وی کسے اک تھاں تے ٹکا نہیں کردے ، اوہ کسے تھاں نال موہ نہیں پاوندے۔ ایس طرحاں عاشق بھور قفیر تے ناگ کالے وسیب دے ہوند توں باہر تے اوس دے اصولاں دے مطابق نہیں جیوندے۔ ایسے لئی اوہناں نوں قابو کرن لئی اوہ گُن کم نہیں آوندے جیہڑے وسیبی ہوند وچ اک دوجے نوں قابو کرن لئی بنائے ہوئے ہین۔

ہیر دا حُسن تے اوس دا دابہ اوس دی وسوں وچ رہندے لوکاں نوں تے قابو کر سکدا ہے پر جے کوئی رانجھے ورگا بندہ اوس وسوں دیاں
ساریاں پکڑاں توں باہر نکل گیا ہووے، جے اوس وطن، دیس، قبیلہ جائیداد چھڈ دتی ہووے تے اوس نوں ہیر دی پرانی سماجی ہوند نال قابو نہیں کیتا جا سکدا۔اوس لئی منتر سکھنا پیندا ہے، تے منتر سکھن لئی بھاری کشٹ کٹنا پیندا ہے۔ مطلب ایہہ جو رانجھے نوں قابو کرن لئی، اوس نال جُڑت کرن لئی ہیر دا پرانا جیون ڈھنگ نہیں چل سکدا۔ اوہ اپنے آپ نوں بدل کے ہی رانجھے نال جُڑ سکدی ہے۔

رانجھا اوس دی سماجی ہوند تے اوس دے حُسن تے مان نوں بازار دا ٹھگ آکھدا ہے۔ بازار زندگی ہے جیس نوں مانیا جانا چاہیدا ہے پر جوبنا ٹھگ ہے جیہڑا ایس نوں مانن دی تھاں ایس نال ٹھگی کردا ہے، ایسے لئی رانجھا ٹھگ دے نال ہیر نوں ٹونی ہارئیے وی کہندا ہے۔ ٹونہ وی حیاتی دی چلت وچ روک پیدا کرن دے جتن دا ناں ہے۔ جے ہیر لوکاں تے صرف اپنے حُسن دا جادو کردی ہے تے اوہ اوہناں نال کوئی انسانی رشتہ نہیں جوڑ رہی، صرف اوہناں دیاں اکھاں وچ لشکارا مار کے اوہناں نوں کُجھ دیر لئی انھیاں کردی ہے۔ ایتھے جے ہیر دی تعریف والے بند وچوں ''خوجے کھتری قتل بازار وچوں'' نوں چیتے کرئیے تے ہن پتہ لگدا ہے جو پہلاں وارث شاہ نے ہیر دا جو جو لشکارا بازار وچ وکھایا سی ہُن اوس لشکارے دی اصل دسی ہے، جو اوہ بازار دے ٹھگ وانگ تے جادو گرنی وانگ ہے۔

چوتھے مصرعے تیکر جاندیاں رانجھا پھیر اوس پاسے سینت مار رہیا ہے جو ہیر بدلے تے کرے کیہہ؟ تے اوہ کہندا ہے جو پہلاں تے اوہ ایہہ سمجھے جو جے بیڑی وچ پئے اوس دے پلنگ نوں کوئی ورت لوے تے اوس دا رنگ روپ نہیں گھٹدا تے بندے نوں نمانے لوکاں نال اینی کنجوسی نہیں کرنی چاہیدی جو اوہ اوہناں نوں اپنی اوہ شے وی ورتن نہ دیوے جیس نوں ورتن نال فرق کوئی نہیں پیندا۔ پر گل تے ایہہ ہے جو سماج وچ مالک طبقے دی تے مُڈھلی سوچ ہی ایہہ ہے جو اوہناں دی شے کوئی ہور ورت نہیں سکدا۔ اوہ آپ ورتن نہ ورتن، پر کوئی لنڈی بُچی وی نہ ورتے۔ ایسے گل نوں رانجھا پرتاوناں چاہندا ہے تے ہیر نوں کہندا ہے جو اوس نوں نمانے لوکاں نال انج دی کنجوسی تے بخیلی نہیں کرنی چاہیدی۔

تے اخیر تے وارث شاہ کہندا ہے جو بندہ تے مٹھی زبان نال ہی ذبح ہو جاندا ہے اوس لئی زور دابے دی کیہہ لوڑ ہے۔ مطلب یا تے مٹھی زبان تے رسیلے بولاں نال دنیا نال پیار پاؤ تے یا پھیر اوہناں نال زوراوری تے دابے دا رشتہ رکھو۔






Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels