Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 123

ہیر وارث شاہ: بند 123

December 25th, 2009

رانجھے آکھیا آ کھاں بیٹھ ہیرے کوئی خوب تدبیر بنائیے نی
تیرے ماں تے باپ دلگیر ہوندے کویں اوہناں تھوں بات چھپائیے نی
مٹھی نائن نوں سد کے بات گِنیے جے توں کہیں تیرے گھر آئیے نی
میں سیالاں دے ویہڑے وڑاں ناہیں ساتھے ہیر نوں نِت پہنچائیے نی
دینہہ رات تیرے گھر میل ساڈا ساڈے سریں احسان چڑھائیے نی
ہیر پنج مہراں ہتھ دتیاں نیں جویں مٹھیے ڈول پکائیے نی
کُڑیاں نال نہ کھولنا بھیت مُولے سبھا جیو دے وِچ لُکائیے نی
وارثؔ شاہ چھپائیے خلق کولوں بھاویں اپنا ہی گڑ کھائیے نی

اوکھے لفظاں دے معنے
دلگیر: اداس، تھوں:اوہناں توں؛ بات گنئیے:کوئی تدبیر بناؤنا؛ ساتھے: ساڈے کول ؛ مُہراں: اشرفیاں؛ ڈول: ڈھنگ ، منصوبہ؛سائیاں دا:مالکاں دا؛ ڈول پکانا: منصوبے نوں پورا کرنا؛ مولے: بالکل؛ سبھا: سب کجھ؛

سدھا مطلب
رانجھے نے ہیر نوں کہیا جو آ بیٹھ کے کوئی منصوبہ (پلان) بنائیے
تیرے ماں پیو بڑے ناراض ہوندے نیں، تے اوہناں کولوں گل لکائیے
مٹھی نائن نوں سد کے اوہدے گھر ملن دا پلان بنائیے
اوس نوں کہیئے جو میں سیالاں دے ویہڑے (صحن) وچ نہیں وڑاں گا تے اوہ ہیر نوں اوتھے سد لیا کرے
اوس نوں کہئیے جوساڈے اپنے گھر ملن دا پربندھ کرے دا ساڈے تے احسان کرے
ہیر نے مٹھی نائن نوں پنج اشرفیاں دتیاں تے کہیا مٹھئیے کوئی منصوبہ بنائیے
کڑیاں نوں ایس بارے کجھ نہیں دسنا تے سب کجھ دل وچ لکا کے رکھنا ہے
وارث شاہ دا کہنا ہے جو بھاویں اپنا ہی گڑ کھائیے لوکاں کولوں لکا کے کھانا چاہیدا ہے۔

کھلارواں مطلب
ایس بند وچ لگدا ہے جو وارث شاہ عشق دی جنگ دو پیر اگے پُٹ کے اک پیر پچھے کرن دا سجھا دے رہے ہین۔ ایسے لئی رانجھا کہندا ہے "جوکوئی تدبیر کریئے" اجے تیکر ہیر تے رانجھا لک چھپ کے ملدے تے سن پر رانجھا ہیر دے گھر ان جھک جاندا سی۔ چوچک تے ہیر دی ماں ملکی نوں گل وی سدھی کردا سی جو اوہ ہیر لئی چاکری کر رہیا ہے۔ پر ایتھے پہلی واری رانجھا چھڑے جذبے نوں چھڈ کے "تدبیر" دی گل کردا ہے۔وارث شاہ ہوریں دس رہے ہین جو عشق سدھی کھیڈ نہیں ایس وچ اکا دل ہی نہیں دماغ توں وی کم لینا پیدا ہے۔ ایسے گل نوں سچل سرمست ہوراں انج کہیا سی

پیر جُھوٹے تے محکم رکھنا، رہنا بے اختیار

مطلب پینگ جھوٹن لئی پیر تے پکا رکھنا پیندا ہے پر نال بے اختیار وی رہنا پیندا ہے۔

سو رانجھا وی تدبیر کر رہیا ہے تے ہیر نال ملنی لئی کوئی راہ لبھدا ہے۔ ایسے لئی اوہ ہیر نوں کہندا ہے جو ایہو جیہی صلاح کریئے جو میں سیالاں دے ویہڑے وی نہ وڑاں تے اسیں ملدے وی رہیئے۔ ایس وچ اوہناں نوں اپنی حامی ڈھانی تھلڑے میل دے نائی ہی نظر آؤندے نیں۔

وارث شاہ دی پوری لکھت وچ رانجھا جتھے وی جاندا ہے تھلڑے میل تے عام لوکائی اوسدے نال رل جاندی ہے۔ جے اوہ مسیت وچ ونجھلی وجاؤندا ہے تے پنڈ دے عام لوک مُلاں دے خلاف اوس دا ساتھ دیندے نیں۔ فیر پتن تے وی اوس دا ساتھ ملاح دیاں دو تیویاں دیندیاں ہین جیہڑیاں آپ مدھلولے ہوئی جنس تے میل وچوں ہین۔ اوہ ہیر دی سیج تے وی عام لوکاں نال رل کے مجلس لاؤندا ہے۔ فیر جدوں ہیر اوس نوں ملدی ہے تے اوہ اوس نوں وی ایہو کہندا ہے

"تیرے جیہے پیایاں ایہہ لازم، آئے گئے مسافراں پالیئے نی"

ایس لئی جد رانجھا تدبیر کردا ہے تے اوس نوں تھلڑے میل دے نائی اپنے مددگار دسدے ہین۔ رانجھے دے ہی کہن تے ہیر مٹھی نائن نال گل کردی ہے۔ مٹھی نائن سیالاں دے گھراں دی "خصمنی" ہے، اوہ اوہناں دے اندر دے سب بھید جاندی ہے۔ پر اوہ اپنے طبقے دی حاکم میل نال ازلی کاوڑ پاروں ہیر رانجھے دے عشق وچ مدد لئی تیار ہے، کیوں جو چاک رانجھا اوس دے طبقے دا ہے تے سیالاں دی حاکمی نوں سنھ لا رہیا ہے۔

ہیر اوس نوں پنج مہراں وی دیندی ہے ایس کم نوں کرن لئی پر ایہہ رقم اوس خطرے توں کتے ودھ ہے جیس وچ مٹھی نائن اپنے آپ نوں پا رہی ہے۔
اخیر تے وارث شاہ ہوریں ایہہ کہ کے جو اپنا گڑ کھاندیاں وی خلقت کولوں لکا کے کھایئے راہیں ایہہ کہہ رہے ہین جو بعضے ویلے سچ تے وی پردہ پیندا ہے۔ ہیر رانجھے دا عشق سچ تے حق ہے پر ایس ویلے اوس دا پردے پچھے ہوجانا ہی ٹھیک ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels