Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 124

ہیر وارث شاہ: بند 124

December 25th, 2009
5 / 5 (2 Votes)

پھَلے کول جِتھے منگو بیٹھدا سی اوتھے کول ہیئسی گھر نائیاں دا
مِٹھی نائن گھراں سندی خصمنی سی نائی کم کر دے پھرن سائیاں دا
گھر نائیاں دے حکم رانجھنے دا جویں ساہورے گھریں جوائیاں دا
چان بھان مٹھی پھرن والیاں دی، بارا کھلدا لیف تلائیاں دا
مٹھی سیج وِچھائی کے پُھل پُورے اتے آؤندا قدم خدائیاں دا
دونویں ہیر رانجھا راتیں کرن موجاں کھڑیاں کھان مجھیں سِر سائیاں دا
گھڑی رات رہندے گھریں ہیر جائے رانجھا بھات پُچھدا پِھرے دھائیاں دا
آپو آپنی کار وِچ جا رُجھن بُوہا پھیر نہ ویکھدے نائیاں دا

اوکھے لفظاں دے معنے
پھلا: ڈنگراں دی حویلی دے بوہے تے لگاگیٹ جیہڑا کنک گاہن والے پھلے ورگا ہوندا ہے۔ سندی: دی۔ خصمنی: مالکن۔ سائیاں: مالکاں، گھراں دے مالک مرد۔ چان بھان: ویکھ بھال، راکھی۔ مٹھی: ہولی۔ بارا:مقدر، بوہا۔ پھل پورے:پھل چڑھائے۔ دھائیاں:چاول۔ رجھن: مصروف ہون

سدھا مطلب
منگواں دی بیٹھن دی تھاں دے بوہے دے نال ہی نائیاں دا گھر سی
مٹھی نائن گھراں دے کماں دی موہری سی تے نائی باہر مالکاں دا کم کردے رہندے
نائیاں دے گھر رانجھے دا حکم انج ہی چلدا جیویں ساہوریاں دے گھر جوائیاں دا حکم چلدا ہے۔
جدوں لوکاں دی آواجاوی دیاں آوازاں گھٹ ہو جاندیاں تے لیف تلائیاں دے بھاگ لگ جاندے۔ مطلب ہیر تے رانجھا لیف تلائیاں ہیٹھ وڑ جاندے۔
مٹھی نائن بسترے تے پھل کھلاردی کیوں جو بڑے وڈے لوک (ہیر رانجھا) آؤندے سن۔
ھیر تے رانجھا رات موجاں کردے تے مجھاں دا کوئی دھیان کرن والا نہیں رہندا۔
جد رات مکن وچ کجھ چر رہ جاندا تے ہیر اپنے گھر نوں مڑ جاندی تے رانجھا چاولاں دا بھاء پچھدا پھردا ۔ ایتھے مطلب ہے جو اوہ اپنے کم وچ لگ جاندا۔
دوہیں اپنے اپنے کم وچ رجھ جاندے تے سارا دن نائیاں دا بوہا وی نہ ویکھدے

کھلارواں مطلب
پہلے مصرعے وچ صرف نائیاں دے گھر دا دسیا گیا ہے جو اوہ مجھاں دے واڑے دے نال ہی سی۔ ایس نال وارث شاہ ناٹک دے پکھ توں ایہہ دس رہیا ہے جو رانجھے نوں پورا پنڈ لنگھ کے نائیاں دے گھر نہیں سی جانا پیندا۔ ایہہ ہوندا تے ہیر رانجھے دا اوہناں دے گھر چوری ملنا پھڑیا جاندا۔ ایس توں پتہ لگدا ہے جو وارث شاہ دا وچار دھارا دے نال نال ناٹک دیاں لوڑاں ول وی ڈوہنگا دھیان ہے۔

دوجے مصرعے وچ وی ناٹک دی اوسے کلا نوں ورتدیاں مٹھی نائین تے اوس دے گھر والے دیاں رجھاں بارے دسیا گیا ہے۔ ایس مصرعے وچ ایہہ وی چانن کیتا گیا ہے جو مٹھی دے ساریاں گھراں وچ بڑا اعتبار سی تے اوسدی گل منی جاندی سی۔ ایس لئی اوس تے شک وی نہیں سی پے سکدا سی جے اوہ اپنے گھر چوری ملنیاں کروا رہی ہے۔ ایہہ وی دس دتا گیا ہے جواوس دا گھر والا پنڈ دیاں چوہدریاں دے کم وچ رجھا رہندا۔

اگلے ہی مصرعے وچ رانجھے تے نائیاں دے آپسی تعلق بارے چانن پائیا گیا ہے۔ اوہ رانجھے نوں جوائیاں وانگ جاندے ہین۔ مطلب اوہناں دی نظر وچ رانجھے تے ہیر دا عشق سچا ہے تے اوہ اوہناں نوں میاں بیوی ہی منندے ہین۔ایتھے وارث شاہ طبقاتی ویکھنی ول دھیان دوا رہیا ہے۔ اوہو رشتہ جیہڑا پنڈ وچ مالکی والے لوکاں لئی ناجائز ہے اوہ تھلڑے میل لئی جائز ہے۔ اوہ آپ وی رانجھے وانگ مالکی توں وانجھے ہوئے ہین تے اوہناں نال وی مالک سیالاں دا اوہو ورتارا ہے۔ ایس لئی اوہناں دی رانجھے نال نیڑتا ہے۔ ایسے لئی جد رانجھا اوہناں دے گھر جاندا ہے تے اوہ چوراں وانگ نہیں جوائیاں وانگ جاندا ہے۔ایس وچ ایہہ گل وی لکی ہوئی ہے جو اوہ ہیر سیالاں دی دھتکاری ہیر نوں دھی وانگ جاندے ہین۔

پھیر وارث شاہ ہیر رانجھے دے آپسی رشتے نوں کجھ کھولدا ہے ۔ ایہہ گل کہہ کے جو جدوں گلی وچ لوکاں دا آؤنا جانا بند ہو جاندا تے لیف تلائیاں دی قسمت کھل جاندی وارث شاہ سینت مار رہیا ہے جو اوہناں دا آپس وچ جُثے دا وی رشتہ سی۔ ایس نال وارث شاہ ایہہ وی پکا کر رہیا ہے جو بندے زنانی دا عشق سدا خیالاں وچ ہی نہیں ہوندا اوہناں دے سچے عشق وچ اک دوجے نال جنسی تعلق رکھنا وی ہوندا ہے۔ وارث شاہ اپنی لکھت وچ ہیر رانجھے دے جنسی رشتے نوں پھلاں دے کھڑن وانگ بیاندا ہے تے عشقوں باہر بندے جنسی رشتے نوں جانوراں دا عمل کہندا ہے۔ ایہہ گل اگے کئیاں تھاواں تے سینتاں وچ آوے گی۔ وارث شاہ بندے نوں فرشتہ نہیں بناوندا سگوں اوس نوں بندہ ہی رکھدا ہے۔ ایس لئی مرد زنانی دا سچا عشق جنسی تعلق نال مکدا نہیں جیویں وارث شاہ دے بہت سارے منن والے سمجھدے ہین۔

عشق دے جنسی پکھ نوں اگھیڑن تے اوس دے اچ پدھرے ہون نوں ہور پکا کرن لئی وارث شاہ اگلے مصرعے وچ دسدا ہے جو مٹھی نائین اوہناں دے سیج تے انج پھل کھلاردی ہے جیویں کسے پیارے لئی یا کسے پیر لئی کیتا جاندا ہے۔ پھیر ایہہ کہہ کے جو "اتے آوندا قدم خدائیاں دا" وارث شاہ ایس جنسی رشتے نوں روحانی ملاپ دا رنگ وی چڑھائی جاندا۔ اوہدے لئی ہیر رانجھے دا ملاپ خدائی عمل ہے ، ایہہ بندیاں دا وگاڑے ورتارے دا جانوراں والا ملن نہیں۔ انج وی تسیں پہلے بنداں وچ ویکھیا ہونا اوہ کیویں وارث شاہ ہیر رانجھے دے ساک نوں ربی تے قدرت دی جڑت دا حصہ منندا ہے۔ ایس لئی اوہناں دا مٹھی دے گھر سیج چڑھنا خدائی ورتارے دا ہونا ہے۔

اگلے مصرعے وچ اُتے دسے خدائی عمل دی مستی ول سینت ہے۔ جو ہیر تے رانجھا راتاں نوں موجاں کردے تے اوہناں نوں مجھاں یا دنیا داری دا کجھ خیال نہیں آؤندا۔ ایس گل نوں انج وی کہیا جا سکدا ہے جو اوہ ایس عمل راہیں دنیاداری دیاں باندھاں توں باہر نکلن دا تجربہ کردے۔

فیر رات دے مکن تے ہیر دے گھریں پرتن دا ذکر ہے۔ رانجھے بارے ایہہ کہہ کے جو رانجھا چاول آٹے بارے گلاں کردا پھردا ایہہ کہیا گیا ہے جو سارا دان عام دنیاداری دے عملاں وچ گذاردے۔ اوہ دن نوں گذار کے ہی رات نوں موجاں مان سکدے سن۔ جے اوہ دن نوں وی اوسے نشے وچ لگے پھرن تے ہر کسے نوں شک پے سکدا ہے تے اوہناں دی موج مک سکدی ہے۔

اخیری مصرعے وچ وی اوسے گل نوں ہور کھول کے کہیا گیا ہے جو اوہ سارا دن اپنے اپنے کم وچ رجھے رہندے تے نائیاں دے بوہے ول وی نہ ویکھدے۔ ایہہ وی اوہناں دی لُکے رشتے لئی ضروری سی ۔ جیویں پچھلے بند وچ کہیا گیا سی جو:

وارث شاہ چھپائیے خلق کولوں بھاویں اپنا ہی گڑ کھائیے جی


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels