Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 397

ہیر وارث شاہ: بند 397

February 3rd, 2010
5 / 5 (1 Votes)

ایس گھنڈ وچ بہت خرابیاں نیں اگ لائی کے گھنڈ نوں ساڑیے نی
گُھنڈ حسن دی آب چھپا لیندا لمے گھُنڈ والی رڑے ماریے نی
گھُنڈ عاشقاں دے بیڑے ڈوب دیندا مینا تاڑ نہ پنجرے ماریے نی
تدوں ایہہ جہان سبھ نظر آوے جدوں گھنڈ نوں ذرا اتاریے نی
گھنڈ انھیاں کر ے سجا کھیاں نوں گھنڈ لاہ توںمونہہ توں لاڑیے نی
وارثؔ شاہ نہ دبیے موتیاں نوں پُھل اگ دے وچ نہ ساڑیے نی

اوکھے لفظاں دے معنے:
آب: چمک، لشک۔ رڑے ماریے: جیہڑا رڑے میدان ماریا جاوے، مطلب ایویں ہی لٹیا جاوے۔ مینا: پکھو، طوطی۔ سجاکھا: جیس نوں نظر آؤندا ہووے۔ لاڑیئے:ووہٹیئے۔

سدھا مطلب
گھنڈ وچ بڑیاں خرابیاں نے تے ایس نوں ساڑ پھوک دینا چاہیدا ہے
گھنڈ حسن دی چمک نوں لکا لیندا ہے۔ لما گھنڈ لے کے توں مفت وچ ہی لٹی گئی ایں۔
گھنڈ عاشقاں نوں برباد کردیندا ہے ایس لئی توں ایس مینا نوں گھنڈ دے پنجرے وچ نہ تاڑ۔
ایہہ جہان اودوں ہی نظر آؤندا ہے جدوں گھنڈ نوں لاہ دیوے۔
گھنڈ چنگیاں بھلیاں ویکھن والیاں نوں انھا کر دیندا ہے، ایس لئی ووہٹیے گھنڈ مونہہ توں لاہ دے۔
وارث شاہ دا ایہو کہنا ہے جو (حسن) دے موتیاں نوں دبنا انج ہی ہے جیویں پھلاں نوں اگ وچ ساڑ دینا۔

کھلارواں مطلب
ایس بند دیاں کئی پرتاں ہین۔ ایہہ سماج دے اک خاص ورتارے تے وی ٹوک ہے، انساناں بروبری دے رشتیاں بارے وی گل ہے تے سینت دی پدھر تے ایس دنیا دی اصل حقیقت نوں نہ ویکھن ول وی اشارہ ہے۔

پہلاں اک سماج دے تاریخی تے سماجی رواج تے گل کر لئیے۔ ہندوستان دے بہتے سماجاں وچ خاص طورتے پنجاب، سندھ تے اتری ہندوستان دے ہور کئی علاقیاں وچ گھنڈ صرف ویاہی ہوئی زنانی کڈھدی ہے ۔ جد تیکر اوہ اوہ کواری ہوندی ہے اوس لئی گھنڈ کڈھنا ضروری نہیں پر ویاہ دے نال ہی گھنڈ وی آجاندا ہے۔ زنانی ایہہ گھنڈ چھڑا غیر مرداں کولوں ہی نہیں سگوں اپنے سوہریاں دے ہر مرد کولوں کڈھدی ہے، سوہرا، جیٹھ، تے کدی کدی دیور کولوں وی۔ مطلب ایہہ بئی ویاہ توں مگروں اوہ اک بندے دی مالکی وچ آگئی ہے تے صرف اوس دے خصم نوں ہی اوس نوں ویکھن دا حق ہے۔ ایس مالکی نوں باہرلیاں مرداں کولوں ہی نہیں گھر دیاں وڈیاں وڈیریاں تے سگے بھراواں ولوں وی خطرہ ہے۔ سگوں کدی کدی تے زنانی باہر دیاں مرداں سامنے ننگے منہ آ جاوے گی پر سوہرے تے جیٹھ دے ساہمنے نہیں ۔۔کیوں جو اوہ اوس دے لاگے رہندے نیں تے اوس تے اوہناں دے دھاڑے دا ہی سب توں وڈا ڈر ہے ایس مالکی دی مٹھ (زنانی ) نوں۔

سو گنڈھ نوں یا پردے نوں من لینا عورت دا اپنے آپ نوں مالکی دی اک شے منن والی گل ہے۔ اوہ گھنڈ یا پردہ سماج دے ڈر توں کرے یا اپنی مرضی نال، اوسدا سٹا اک ہی ہے۔ جو اوس نے من لیا جو کسے اک خاص مرد دی ہی ملکیت ہے۔ ایہہ روک مرد تے نہیں ہے کیوں جو مالک ہے تے اک توں ودھ مالکی جیہی شیواں زنانیاں رکھ سکدا ہے۔ جے کر عورت دا سماج وچ مرد نالوں بہتا زور ہوندا، مالکی والی اوہ ہوندی تے فیر اوہ مرد نوں پردہ کرواؤندی جو دوجیاں اوس دی شے تے بھیڑی اکھ نہ پاؤن۔ قدیم سماج وچ (رگ وید وچ ایس طرحاں بہت اشارے ملدے ہین) مرد اک مالکی دی شے سی جیس نوں زنانی اپنے زور نال جتدی سی تے سانبھدی سی۔

سو ہیر جدوں اپنے سوہریاں دے چلی گئی ہے تے ویاہ نال بنی مالکی نے اوس نوں گھنڈ پچھے لکا دتا ہے۔ ایس گھنڈ نے اوس نوں باقی جہان توں انھیاں کردتا ہے تے اینا انھا جو اوس کولوں رانجھا وی پچھانیا نہیں جا رہیا تے ٹاکم ٹوئیاں مار رہی ہے جو اوس نوں کسے طرحاں پتہ لگ جاوے۔ ایہہ وی ہو سکدا ہے جو وارث شاہ ناٹک دی پدھر تے ایہہ سین گڑھ رہیا ہووے۔ پر اسیں جاننے ہاں وارث شاہ ناٹک لئی فالتو سین کدی نہیں گھڑدا تے ہر سین دے پچھے اوس دا اک اجیہا وچار ہوندا ہے جیس نوں کسے ہور طرحاں نہیں کہیا جا سکدا۔

ایس بند وچ وارث شاہ گھنڈ دے پچھے قیدی زنانی نوں گھنڈ توں باہر دی دنیا وکھا رہیا ہے۔ ایہہ گل ایس توں پکی ہوندی ہے جو رانجھا جاندا ہے جو ہیر ویاہی ہوئی زنانی ہے پر جے اوہ عام لوکاں وانگ ہوندا تے اوہ عشق مکا کے اگے ٹر پیندا۔ ہیر دے ویاہ توں مگروں رانجھے دیاں بھرجائیاں وی ایہو صلاح دتی سی جو ہن ہیر ویاہی گئی تے ہن چھڈ کے آجاوے کیوں جو اوتھے ہن اوس دا کوئی کم نہیں۔ رانجھے دیاں بھرجائیاں وی ایہو گل کہندیاں ہن جو ہن ہیر کسے اک دی مالکی وچ چلی گئی ہے تے ہن اوہ کسے ہور ول ویکھ وی نہیں سکدی۔ پر وارث شاہ لئی کوارا یا ویاہیا ہونا اکو جیڈا ہے۔ جے کواری کڑی نوں سماج وچ کھل دی لوڑ ہے تے ویاہی ہوئی نوں ایس توں وی ودھ لوڑ ہے کیوں جو کواری کڑی تے فیر وی آزاد ہے پر ویاہی ہوئی تے ہر پاسیوں ہی قیدی بن جاندی ہے۔ ایس لئی وارث شاہ رانجھے نوں ہیر دے دے پچھے ٹوردا ہے جو اوہ اوس نوں کھل دواوے۔

سب توں وڈی خرابی تے ایہہ ہے جو ویاہ توں مگروں زنانی اوس گھنڈ دے پچھے انھی ہو جاندی ہے۔ ایسے لئی پہلے ہی مصرعے وچ وارث شاہ کہہ دیندا ہے جو گھنڈ وچ بہت خرابیاں نے تے ایس نوں ساڑ کے سواہ کردینا چاہیدا ہے۔ مطلب وارث شاہ عورت دے پردے پچھے ہون نوں اک قید منندیاں اوس نوں مکاؤن لئی کہندا ہے۔

گھنڈ دیاں خرابیاں دا ذکر اوہ ہیر دی اپنی ہوند توں ہی ایہہ کہ کے شروع کردا ہے جو گھنڈ حسن دی چمک نوں لکا لیندا ہے، جیویں ہیر بناں کجھ کیتے ایویں ہی گھنڈ دے پچھے اپنی چمک گوا بیٹھی ہے۔ جے کر سینت دی پدھر تے ویکھو تے بندے نے دنیا داری، لوبھ تے ہنکار دا گھنڈ کڈھیا ہویا ہے جیس کرکے نہ اوسدا اپنا حسن لوکاں نوں دسدا ہے تے نہ ہی اوس نوں دنیا دا۔ تے ایہہ سب کجھ بنا کسے خاص حاصل دے کیتا جاندا ہے۔ مطلب جیس لوبھ نوں بندہ لابھ سمجھدا ہے اور اصل وچ رڑا میدان ہے جتھے کجھ وی حاصل کرن لئی نہیں۔ گھنڈ یا پردہ وی ایس طرحاں دے رڑے وچ گواچن دا ناں ہے۔

گھنڈ عشقاں دیاں بیڑیاں وی ڈوب دیندا ہے۔ ہن عاشق دا مطلب چھڑا ویکھن والا مرد ہی نہیں ویکھے جان والی زنانی وی ہے جیہڑی گھنڈ دے پچھے لکی اپنے عشق نوں پچھان نہیں سکدی جیویں ہیر رانجھے نوں نہیں پچھان سکی۔ وارث شاہ مثال دیندیاں کہندا ہے جو عشق اک مینا وانگ ہے جیس دا کم باغ وچ چہکنا تے لٹکاں لینا ہے پر جے اوس نوں پنجرے وچ تاڑ دئیے تے اوہ مر جاندی ہے۔ ہیر یا ہر زنانی وی اک مینا ہے جیہڑی اک مرد دے پنجرے پئی مردی ہے۔ ایتھے مینا دا اشارہ ہیر تے ہور زنانیاں ول وی ہے تے آپ عشق ول وی جیہڑا مینا وانگ چہکن دا ناں ہے۔

اگلے دو مصرعیاں وچ مینا دی سینت نوں اک ہور طرحاں بیانیا گیا ہے۔ پہلے تاں ایہہ جو جنا چر گھنڈ لتھے نا اوہناں چر جہان نظر ہی نہیں آ سکدا تے اوسدا الٹ جو گھنڈ اوہناں ویکھن والیاں نوں وی انھا کردیندا ہے جیہڑے ویکھ سکدے سن۔ ہیر اوہناں ویکھن والیاں وچوں سی پر گھنڈ نے اوس نوں انھیاں کر دتا ہے۔ تے ہن جے اوہ "ذرا" وی گھنڈ نوں لاہ لوے تے اوس نوں پورا جہان نظر آونا شروع ہو جاوے گا۔

اخیر تے وارث شاہ ہوریں کہندے ہین جو گھنڈ وچ لکنا انج ہی ہے جیویں موتی دب دینا یا پھل اگ وچ ساڑ دینے۔ مطلب زنانی دے سب گن اوس گھنڈ دے کارن مک جاندے نیں۔ اوہ موتی تے پھل ورگی ہے تے گھنڈ ایہنا نوں مکا دیندا ہے۔ ایہدا ایہہ وی مطلب ہے جو جہان دے موتی تے پھل زنانی کولوں لک جاندے ہین۔ سو عورت اپنی مرضی نال یا جبر وچ گھنڈ یا پردے وچ آوے، اوسدا جوہر مک جاندا ہے تے جہان دا حسن وی اوس دی اکھ توں پروکھے ہو جاندا ہے۔


http://www.wichaar.com/videos/waris-shah/heer-say-no-to-burqa-video_3f0cc6c88.html


Share |


 

Depacco.com


 

 

Visitors Comments

Name:Taseer Cheema
Date:11th February

Comment: ترجمہ کرن والے نے بہت محنت کیتی اے اور اس واسطے مبارکباد دا مستحق وے . پر وارث شاہ ہوراں دے صوفی ذوق نوں سامنے رکھدے ہویاں اس بند نوں اک ہور نظر نال وی ویکھیا جا سکدا اے . وارث شاہ ہوراں ہیر دے اخیر اچ اک پورا ورقہ لکھیا اے جد ے اچ وہ سا رے کرداران د ا بیان اے جھڑے ہیر دی داستان اچ نظری پیندے نہیں .ایہناں نوں ویکہدیاں ہویان اینویں لگدا وے جویں ایہ کوئی مجازی داستان نہیں بلکہ عشق حقیقی دا بیان اے -میں کجھ ا شعار پیش کرن دی سعادت لوا ں گا-
heer roh tay chaak qulboot janoN, Baal Naath eh peer banaya ee
punj peer hawas eh punj tayray,jinhaN thapnaN tudh nooN laya ee
ایس توں معلوم ہویا کہ وارث شاہ ہوراں دے ہاں ہیر ، روح د ا استعا رہ وے .تے رانجھا جسم دا . وجودی فلسفے اچ جسم اک پردہ وے جدھے اچ روح قید اے .سالک دا کم اے کہ ایس پردے نوں ہٹا کہ روح نوں آزاد کرے تان جے اوہ اپنے اصل نال وصال کر سکے . پنجابی ادب دے اچ وجودی فلسفے نوں بہت اہمیت دتی جاندی اے . ہن ایہہ پہلو نظر اچ رکھدے ہویاں پیش نظر بند وال دھیان کرو تے لگدا اے کہ ایہہ سارا بیان فنافی الله دا اے .ایہہ پردہ یہنی جسم اور ایس دیان خواہشات اک بہت بڑی برائی نیں تے عشق دا تقاضا ایہ کہ ایس توں چھٹکارا حاصل کرنا چاہے دا اے اور اس آلائش نوں عشق دیاں یهنی سلوک دیاں منزلاں دیاں سختیاں، جہڑیاں کہ کسے اگ توں گھٹ نہیں، وچ پا کہ ساڑ دینا چاہۍ دا وے - ایہ گہنڈ روح دی خوبصورتی نوں لکا لیندا اے .دنیا داری جنی وداو گے روحانیت اور لولاکی توں اونان ہی دور ہوندے جاؤ گے اور پردے بندے اور خدا وچ لمے ہوندے جان گے -دیہاتی ماحول وچ رڑا میدان ہمیشہ پنڈ توں باہر ہندا وے جتھے کہ عام گزر نہیں ہندا، ایه اک اجاڑ بیابان وال اشارہ اے جتھے دنیا داری دا کاروبار نیں ہندا- خاموشی تے یکسوئی دا سامان ہندا اے-ایسی جگہ انسان یکسوئی نال دھیان گیاں کر سکدا وے -مطلب ایہ کہ مادیت نال ناتا توڑ کہ تے روح دی پرورش دا سامان کرو - گہنڈ یهنی جسمانی خواہشات تے دنیا داری دا دھیان صوفی واتے بہت مشکل منزلاں لے کے آوندیاں نیں ،اورہر پل ایہوخطرہ رہندا وے کہ کتے ساری ریاضت خاک نہ ہو جاوے -ایہنوں ہی بیڑی ڋبنے نال تشبیہ دتی گێی وے-.ا یہ روح اوہ مینا اے جہڑی جسم دے پنجرے اچ قید وے اوراس قید نین ایس دے حُسن نون نہ صرف لکایا ہویا وے بلکہ ایس دی آزادی نوں وی ختم کر دتا اے - تے جس دن اس قید توں چھٹکارا ہویا اوس دن اوہ نظارہ ہووے گا جہڑا اصل مقصود سی یهنی مقام فنافی الله نال آشنائی .ا یہ گہنڈ روح دی آکھاں دی روشنائی ختم کر دیندا وے ایس لای ایس توں روح نوں چھٹکارا کر لینا چاہیدا وے .وارث شاہ موتی دی آب تاب تدے نظری پیندی اے جدوں ا یہ مٹی اچ دبیا نہ ہووے .تے ایہو جے پھلان نوں اگ یہنی جسمانی خواہشات دی بُٹہی اچ نہیں بالنا چاہی دا -


Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels