Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 127

ہیر وارث شاہ: بند 127

February 6th, 2010
4 / 5 (1 Votes)

ملکی آکھدی سد توں ہیر تائیں جُھب ہو توں اولیا نائیا وے
الفو موچیا موجما واگیا وے دُھدی ماچھیا بھج توں بھائیا وے
کھیڈن گئی منہ سو جھلے گھروں نِکلی نِما شام ہوئی نہیں آئیا وے
وارث شاہ مائی ہیر نہیں آئی موہر منگواندی گھریں آئیا وے

اوکھے لفظاں دے معنے
سد: بلانا ؛ جھب:چھیتی۔ اولیا: نائی دا ناں۔ منہ سوہجلے: تڑکے۔ نماں شام: تھوڑی شام۔ الفو: اک موچی دا ناں۔ موجما: واگی چڑوہے دا ناں۔ ڈھڈی: ماشکی دا ناں۔ موہر منگواندی: لین وچ لگے سب توں اگلے ڈنگر

سدھا مطلب
(کیدو دیاں گل سن کے) پہلے دو مصرعیاں وچ ہیر دی ماں ملکی وکھو وکھ کمیاں، اولیا نائی، الفو موچی، موجما چڑوہیا تے دُھدی ماچھی نوں کہندی ہے جو اوہ چھیتی نال جان تے ہیر نوں لبھ کے لیاؤن۔
(تریجا مصرعہ) ہیر بہت ہی سویرے سویرے دی کھیڈن گئی سی پر چنگی بھلی شام ہوگئی پر اوہ مڑ کے نہیں آئی۔
(چوتھا مصرعہ) منگوواں مطلب ڈنگراں دی لائن دا اگلا پاسا گھر پہنچ گیا ہے پر ہیر اجے تیکر نہیں آئی۔

کھلارواں مطلب
ایس بند وچ لگدا ہے جو ہیر رانجھا اپنے نویں ڈھنگ نال ملن دے سپھل ہون نال لاپرواہ ہو گئے ہین تے اوس دے گھر والیاں نوں بہتا پتہ نہیں لگدا۔ پڑھیاراں نوں یاد ہووے گا جو جدوں ہیر دے پیو نے اوس نوں کڈھ دتا سی تے اوہناں دیاں مجھاں چارن والا کوئی نہیں سی۔ فیر ہیر دی ماں اوس نوں ترلے پا کے فیر موڑ کے لیائی سی۔ اوتھے رانجھے نے ہیر نال صلاح کیتی سی جو اوہ سیالاں دے ویہڑے نہیں وڑیا کرے گا تے ہن اوہ نائیاں دے گھر ملیا کرن گے۔ بند 125 وچ ایہہ وی پتہ لگدا ہے جو ہیر کیویں ندی تے جاندی ہے تے رانجھے نال موجاں مناؤندی ہے۔

ہوندا ایہو ہی ہے جو جد کدی نویں راہ تے ٹرن والیاں یا انقلابیاں دا کوئی ڈھنگ چل جاوے تے اوہ ڈھلے پے جاندے ہین تے آل دوال دی دنیا نوں بھل جاندے ہین۔ اوہ انج وی دنیاداری توں کافی باہر ہی ہوندے ہین تے جے تھوڑی جیہی وی وتھ ملے تے پورے ہی باہر ہو جاندے نیں۔ سو ایتھے وی اوہو ہو رہیا جو ہیر تے رانجھا اپنے آپ وچ مست بھل گئے ہین جو باہر دی دنیا اوہناں نوں ویکھ رہی ہے تے اوس دنیا وچ کیدو ورگے وی ہین جیہڑے ہر ویلے اوہناں دا ہی پچھا کردے نیں۔ ہن ہیر بہت سویلے گھروں نکل جاندی ہے تے سارا دن رانجھے نال لنگھاؤندی ہے۔ مجھاں وی گھر آؤنا شروع ہو جاندیاں نیں پر ہیر تد تائیں وی نہیں پجدی۔ ایس توں ظاہر ہوندا ہے جو اوہ اپنی موج وچ دنیا دے ورتارے نوں کناں اک بھل گئی ہے۔

ایس بند وچ ہیر دی ماں جیویں سارے کمیاں نوں سد دی ہے اوس توں پتہ لگدا ہے جو جاگیرداری سماج وچ پیشہ کوئی وی ہووے ہر ہنری بندہ حاکم میل دا گھروکی نوکر ہی ہوندا ہے۔ ایتھے وارث شاہ کمیاں دے ناں پکار کے ناٹک وچ سواد وی لیا رہیا ہے پر نال ہی اوہ دس رہیا ہے جو کاریگر بندے دی وی جاگیرداری سماج وچ کوئی ہستی نہیں ہوندی۔

ظاہر گل ہے سرمایہ داری نظام وچ ایہہ کاریگر رہندے تے ماڑے ہی ہین پر اوہ حاکم میل دے ذاتی نوکر نہیں ہوندے۔ موچی جتیاں بنا کے ویچدا ہے تے نائی اپنا کم کرکے محنت لیندا ہے۔ اوہناں نوں حاکم میل دے ذاتی گھروکی کماں دا نہ پتہ ہوندا ہے تے نہ ہی اوہناں نوں کوئی گھروکی کم کہندا ہے۔ ایس لئی ایہہ سدھا جیہا بند پرانے جاگیرداری نظام وچ خلقت دی حیثیت دی چنگی جھلک دیندا ہے تے اسیں اج نال مقابلہ کرکے ویکھ سکدے آں جو اوہ ہیر دا کیہو جیہا سماج سی یا وارث شاہ کیس سماج نوں مکھ رکھ کے لکھ رہیا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels