Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 130

ہیر وارث شاہ: بند 130

February 12th, 2010

اماں چاک بیلے اسیں پینگھ پینگھاں کیہے غیب دے طوطیے بولنی ہیں
گندا بہت ملھوک منہ جھوٹھڑے دا ایڈا جھوٹھ پہاڑ کیوں تولنی ہیں
شعلہ نال گلاب تیار کیتا وچ پیاز کیوں جھوٹھدا گھولنی ہیں
گدّاں کسے دی نہیں چراآندی دانی ہوئی کے غیب کیوں بولنی ہیں
اَن سنیاں نوں چاء سنایائی موئے ناگ وانگوں وِس گھولنی ہیں
وارثؔ شاہ گناہ کیہ اساں کِیتا ایڈے غیب طوفان کیوں تولنی ہیں

اوکھے لفظاں دے معنے
غیب دے: جیہڑے کسے نے ویکھے سنے نہ ہون۔ طوطیے: الزام۔ ملھوک:گند وچ پلن والا کیڑا۔ وِس: زہر۔ طوفان تولنا: الزام لاؤنا۔ گداں کسے دی نہیں چرا آندی: میں کسے دی کھوتی نہیں چوری کیتی، میرا کوئی قصور نہیں

سدھا مطلب
ماں چاک بیلے وچ سی تے اسیں تے [کتے ہور] پینگھاں جھوٹ رہیاں ساں۔ توں ایویں مینوں گھڑ کے گالہاں کڈھ رہی ایں۔
جھوٹ بولن والے دا منہ کیڑے وانگ گندا ہوندا ہے تے توں کیوں جھوٹ دی پہاڑ کھڑے کر رہی ایں۔
توں انج کر رہی ایں جیویں گلاب نال ملا کے انگوری شراب بنائی جاوے یا شعلے دی ڈش تیار کیتی جاوے تے اوس وچ گنڈھے پا دتے جان۔ جھوٹ پیاز دے گنڈھے وانگ (بدبو) والا ہے۔
میں کسے دی کھوتی چوری کیتی آ؟ مطلب کسے دا کجھ چرایا ہے جو توں بھیڑیاں گلاں گھڑ کے میرے ذمے لا رہی ہیں۔
توں رولا پاکے اوہناں نوں وی سنا دتا جیہناں ایہہ سنیا نہیں سی۔ ایہہ تے انج کر رہی ایں جیویں سپ مر کے وی وس گھولدا رہندا ہے (ڈنگ مارن تے زہر دین دے جتن کردا رہندا ہے)
میں کیہڑا گناہ کیتا ہے جو توں ایڈا طوفانی عیب میرے ذمے لا رہی ہیں۔

کھلارواں مطلب
ایس بند دیاں وی کئی پرتاں ہین۔ اک تے سدھی سادی ایہہ ہے جو ہیر ایس الزام توں انکار کر رہی ہے جو اوہ باہر اینا ویلا رانجھے نال گذاردی ہے۔ اوہ اپنی ماں دیاں گلاں نوں جھوٹ کہہ کے اپنی کیتی تے پردہ پا رہی ہے جیویں پہلے تے دوجے مصرعے توں ظاہر ہوندا ہے۔

تریجے مصرعے وچ اک ہور پرت ساہمنے آؤندی ہے۔ شعلہ ناک گلاب تیار کرن دا مطلب ہیر دا سہلیلیاں نال پینگھاں جھوٹنا وی ہو سکدا ہے جیس وچ ماں پیاز گھول رہی ہے۔ پر ایس دا ایہہ وی مطلب ہو سکدا ہے جو اوس نے رانجھے نال میل کر کے جو بندیائی دا ساک جوڑیا ہے اوہ سوہنا تے اچیچا ہے جیس نوں اوس دی ماں گالہاں وچ گندا کہہ رہی ہے۔ مطلب اوہ پہلے بند وچ دسیاں عورت دیاں برائیاں وچوں کسے وچ وی نہیں ہے۔

چوتھے مصرعے وچ وارث شاہ پنجابی دا بڑا ٹھکواں عوامی محاورہ ورت رہے ہین۔ کسے دی گدوں یا کھوتی نہ چراون دا مطلب ہوندا ہے اپنی کیتی دا کسے دوجے نال کوئی تعلق نہیں۔ سو ہیر وی کہہ رہ رہی ہے جو اوس نے کسے دی چوری نہیں کیتی ۔۔جے اوس کجھ کیتا ہے تے اوہ اپنے حق دے اندر ہی رہ کے کیتا ہے۔مطلب اپنے عورت دے حق ہون نوں ورتیا ہے۔

پنجواں مصرعہ بڑا خاص ہے۔ اپروں ویکھن نال تے لگدا ہے جیویں ماں نوں مرے ہوئے سپ دا وس گھولنا کہہ کے اوہ صرف اوس دے رولا پاؤن ول اشارہ کر رہی ہے پر ایس دا گجھا مطلب ایہہ وی ہے بئی ہیر نے رانجھے نال آپ ساک جوڑ کے ماں دی ریت نوں مار چھڈیا ہے۔ ہن ایس دا کجھ ہو نہیں سکدا سوائے ماں دے وس گھولن تے رولا پاؤن دے تے جہان وچ بھنڈن بھنڈاؤن دے۔

اخیری مصرعے وچ وی دوہیں پرتاں ہین۔ ایہہ کہہ کہ جو میں کیہڑا گناہ کیتا ہے جو توں ایڈے من گھڑت الزام لا رہی ہیں۔ ہیر دا رانجھے نال ملن توں انکار تے اپنے بھیڑے ورتارے دی نفی کر رہی ہے۔ ایہہ وی ہے جو سماج تے ہیر دی ماں موجب گناہ ہے اوہ ہیر لئی گناہ نہیں ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels