Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 132

ہیر وارث شاہ: بند 132

February 15th, 2010

اماں بس کر گالیاں دے ناہیں گالی دِتیاں وڈڑا پاپ آوے
نیو رب دی پٹنی کھری اوکھی دھیاں ماریاں وڈا سراپ آوے
لے جائے میں بھیڑا پٹنی نوں کوئی غیب دا سُول کہ تاپ آوے
وارثؔ شاہ نہ مُڑاں رنجھٹیڑے توں بھاویں باپ دے باپ دا باپ آوے

اوکھے لفظاں دے معنے
دبھ:کھروی گھاہ۔ وڈڑا:وڈا۔ سراپ: گناہ ، عذاب

سدھا مطلب
ہیر ماں نوں آکھدی ہے جو توں گالہاں نہ کڈھ کیوں جے ایس نال بڑا گناہ ہوندا ہے۔
رب دی بنائی ہوئی نیہہ پٹی نہیں جا سکدی ، تے دھیاں قتل کرن نال بہت وڈی سزا ملدی ہے ۔
مینوں بھرا پٹنی نوں کوئی ان ڈٹھی پیڑ یا تاپ چڑھے تے میں مر جاواں۔
پر میں رانجھے توں نہیں مڑ سکدی بھاویں میرا دادا پردادا وی آکے کہن۔

کھلارواں مطلب
پہلے مصرعے وچ ہی اک طرحاں ہیر ماں دی ہی منطق اوس تے ورتدی ہے۔ ہن تیکر ماں اوس دے گناہاں تے عیباں دا رولا پا رہی سی، ایتھے ہیر اوسے دی سمجھ نوں ورتدیاں کہندی ہے جو گالہاں کڈھناں بھیڑی تے گناہ والی گل ہے۔ ایس طرحاں ہیر اپنی ماں دی سمجھ مت دے اندرلے پاڑ نوں ساہمنے لیا رہی ہے۔ جو جے اوہ گناہاں توں ایڈی ہی اُتے ہے تے فیر گالہاں کڈھنا وی گناہ ہے۔

ہر سماج دی چلت وچ ایہہ پاڑ ہوندے نیں۔ حاکم تے نظام دے چلاؤن والے جیس گل دا پرچار کر رہے ہوندے نیں اوسے دا عمل وچ ورودھ وی کر رہے ہوندے نیں۔ اوہناں دا خیال ہوندا جو اوہ آپ ہر اصول توں اُتے ہین۔ ہیر اوس نوں شیشہ وکھا رہی ہے جو اوہ کیویں اپنے ہی اصولاں دی النگھنا کر رہی ہے۔

دوجے مصرعے وچ ہیر اصول والی گل نوں ربی اصول دے طور تے پیش کردی ہے۔ "نیو رب دی پٹنی کھری اوکھی" دا ایہہ مطلب وی ہے جو جیہڑے اصول قدرت یا فطرت نے بنا دتے اوہناں نوں مرضی نال تروڑیا مروڑیا نہیں جا سکدا۔ جے گاہلاں کڈھنا گناہ ہے تے فیر ہیر دی ماں لئی وی ایہہ کرنا گناہ ہے ، ہیر دی ماں مرضی نال ایس اصول نوں بھن نہیں سکدی۔

ہیر ایس مصرعے وچ رب دی بنائی نیہہ نوں دھیاں مارن نال وی جوڑ رہی ہے۔ رب نے زنانیاں نوں پیدا کیتا ہے انسانی نسل نوں اگے ودھاؤن لئی۔ ایس لئی جے کوئی اوہناں نوں مارے تے اوہ رب دی بنائی بنیاد دی نفی کر رہیا ہے جیس دی وڈی سزا ملے گی۔ ایس وچ ہیر ماں نوں ایہہ وی جتا رہی ہے جو جے اوہ اوس نوں مار دین دا سوچ رہے ہین تے ایہہ وی گناہ ہے۔ ایتھے وی ہیر اپنی ماں دی منطق نوں ہی اوس اتے ورت رہی ہے۔ جو جے کسے مرد نال حیاتی لنگھاؤن دا فیصلہ گناہ ہے تے فیر گالہاں کڈھنیاں تے دھیاں مارنیاں وی اوڈا وڈا گناہ ہے۔

تریجے مصرعے وچ ہیر اپنی لاچاری ظاہر کردیاں کہہ رہی ہے جو ایہناں سب دا حل ایہو ہی ہے جو اوس نوں کوئی ان ڈٹھی بیماری پے جاوے تے اوہ مر جاوے۔ جے اوہ مردی نہیں تے فیر ماپیاں دی نگاہ وچ اوہ گناہگار ہے تے ماپے اوس دی نگاہ وچ۔ اخیر کہانی تے اوہ ہیر نوں قتل کر کے گناہ ہی کردے ہین۔ پر حاکماں دا گناہ ثواب دا نظریہ وکھاؤن لئی ہوندا ہے۔ اوہ کردے اخیر اوہو نیں جیس نال اوہناں دا نظام چالو رہوے۔

تریجے مصرعے وچ لگدا ہے جیویں ہیر ڈھلی پے کے اپنے آپ تے رحم کھا رہی ہے پر چوتھے مصرعے وچ اوہ تلوار وانگوں چمکدی ساہمنے آؤندی ہے تے کہندی ہے جو رانجھے توں نہیں مڑنا بھاویں دادا پردادا وی آ جاون۔ ایس اعلان نال اوہ ماں دے سارے سوالاں دا جواب دے دیندی ہے۔ ہیر نے جدوں رب دی نیہہ دی گل شروع کیتی سی تے گل صاف نہیں سی پر ایس مصرعے تے کھل کے پتہ لگ جاندا ہے جو ہیر لئی رب دی نیو کیہ ہے۔!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels