Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 133

ہیر وارث شاہ: بند 133

February 20th, 2010

کیدو آء کے آکھدا سوہریو وو میتھوں کون چنگا مت دیسیا او
مہیں موہیاں تے نالے سیال مُٹھے اَج کل وگاڑ کریسیا او
ایہہ نِت دا پیار نہ جائے خالی پنج گڈ دا پاس نہ ویسیا او
ستھوں مار سیالاں نے گل ٹالی پرہاں چھڈ جھیڑا بہو بھیسیا او
رگ اِک ودھیک ہے لنگیاں دِی کِرت گِھن فرفیج ملکھیسیا او

اوکھے لفظاں دے معنے
موہیاں: مسخر کر لئیاں محبت دے دھوکے وچ۔ مُٹھے: مسحور کر لئے۔ پنج: پہیہ۔بھیسیا: بہت سارے بھیس بدلن والا۔ کرت گھن: احسان بھل جانا۔ فرفیج: فریبی،دغا باز،دھوکے باز۔ ملکھیسیا : ضدی، ٹیٹھ، ناپاک

سدھا مطلب
کیدو نے سیالاں نوں کہیا اوئے بھائی بنیو میرے نالوں ودھ چنگی مت کون دیوے گا؟
رانجھے نے مہیاں تے ہیر دوہاں نوں موہ لیا ہے، پچھے لا لیا ہے، تے اجکل ہی کوئی فساد پوے گا۔
ایہہ ہیر رانجھے دا نت دا پیار خالی نہیں جانا، کیوں جو جیس پاسے شیواں دا ریہاڑ ہووے اوہناں اوتھے ہی جانا ہے۔ مطلب جو ہو رہیا ہے ایس دا کوئی نہ کوئی نتیجہ ضرور نکلنا ہے۔
محفل وچ سیالاں نے کیدو دی گل ٹال دتی تے اوسنوں کہیا جا ایس جھیڑے نوں چھڈ توں تے آپ کئی بھیس بدلدا رہنا ایں (تیرے تے کیہ اعتبار)۔
مشہور ہے جو لنگیاں دی اک رگ ودھ ہوندی ہے مطلب اوہناں نوں ودھ شرارتاں کرنیاں آؤندیاں ہین۔ توں احسان بھلاؤن والا فریبی تے ناپاک والاں والا بندہ ہیں۔

کھلارواں مطلب
پہلے ہی مصرعے وچ جیویں کیدو سیالاں نال گل کردا ہے اوس توں لگدا ہے جو اوہ اوہناں دے برابر یا اوہناں توں اتے ہے۔بندہ اپنے ہانیاں یا تھلے دے لوکاں نوں ہی"سوہریو وو" کہہ کے بلا سکدا ہے۔ کیدو وی ظاہر کر رہیا ہے جو اوہ سیالاں وچوں سب توں ودھ عقلمند ہے تے اوس توں چنگی کوئی مت نہیں دے سکدا۔

دوجے تے تیجے تے تیجے مصرعے وچ آپ اپنی مت دیندیاں کہندا ہے جو رانجھے نے مجھاں تے ہیر دوہیں اپنے پچھے لا لئیاں ہین۔ اوہ مجھاں دا ایس لئی ذکر کردا ہے جو اوہ سیالاں دی معیشت دی بنیاد ہے تے ہیر عزت تے ریت رواجاں دی۔ مطلب رانجھے نے پورے نظام نوں اپنے ولاویں وچ لے لیا ہے۔ فیر اوہ ایہہ وی دس پاؤندا ہے جو جے ایس طرحاں دے قبضے دے اپنے نتیجے ہوندے نیں جیہڑے لازمی طور تے نکلدے ہین۔ مطلب رانجھے دیاں کرنیاں سیالاں دے نظام نوں ڈھاہ کے رہن گیاں۔

وارث شاہ دے ویلے وچ باہر سماج وچ وی ایہو ہو رہیا سی۔ نابر جٹالی نے نہ چھڑا ریت رواج مننے چھڈ دتے سن اوہناں مغلاں دے مقرر کیتے ٹیکس دین توں وی لوکاں نوں آزاد کردتا سی۔ اوہ آپ نکی جیہی راکھی دی جیس لیندے سن تے باقی زمیندار اپنی پیداوار اپنے کول رکھدا سی۔ ایس توں پہلاں مغل شاہی ادھ یا تیجا حصہ لے لیندی سی۔ ایس لئی زمیندار نوں وی سکھ نابراں موہ لتا سی۔ فیر اوہناں ذات پات دا نظام مکا کے برابری دی گل کرکے پرانے ریت رواج وی بھننے شروع کر دتے سن۔ ظاہر گل ہے ایہناں دا نتیجہ مغل شاہی دے مکا تے ہی ہونا سی۔ ایتھے کیدو وی ایہو کہہ رہیا ہے جو جے رانجھے تہاڈے معاشی تے سماجی نظام نوں اپنے رنگ وچ ڈھال لیا ہے تے سیالاں دا نظام وی نہیں رہ سکدا۔

پر سیال اوسنوں اپنے برابر دا نہیں سمجھدے یا مننا چاہندے۔ ایس لئی چوتھے مصرعے وچ پتہ لگدا ہے جو سیالاں اوہدی گل ٹال دتی تے سگوں اوس نوں تھلے لاہون لئی کہیا جو توں ایویں ایس طرحاں دے جھیڑے پیدا کرنا ہیں تے کئی کئی بھیس بدلنا ہیں۔ تیرے تے اعبار نہیں کیتا جا سکدا۔

اخیری مصرعے وچ وارث شاہ ہوراں اوس سوڑے وچار دی گل کیتی ہے جیہڑی جاگیرداری سماج وچ عام ہے۔ مطلب انگاں توں ہینے لوک (کنگے، انھے وغیرہ) شرارتی تے فسادی ہوندے نیں۔ ایہہ محاورہ ایس لئی بنیا جو جاگیرداری تے واہی وسوں وچ عزت صرف ہتھیں پیریں واہی کرن والے دی ہوندی ہے۔ جے کر کوئی سدھا واہی بیجی دے کم وچ نہ لگا ہووے تے اوس بارے جگتاں تے ہور بھیڑیاں گلاں کیتیاں جاندیاں ہین۔ ہینے لوک واہی بیجی نہیں کر سکدے تے بہہ کے سوچدے رہندے ہین ایس لئی اوہ جو گلاں کردے ہین اوہ واہی واناں لئی فسادی ہوندیاں نیں۔ ایہہ وی ہے جو ہینے لوک بیٹھے سوچدے گلاں کردے ہین جیس نال چالو ورتارے وچ فساد پیندے ہین۔

اک گل جاگیرداری تے واہی وان وسوں بارے بڑی اچیچی ہے۔ ایہو جیہی وسوں وچ واہی ہی اجیہا پیشہ ہے جیس وچ بہتا دماغ نہیں لگدا۔ ہور دست کاراں، ترکھان، لوہار، نائی، جولاہا ، سنیارا یا ہور دوجیاں دے کم وچ بہتے ذہن دی لوڑ پیندی ہے۔ ایہو اوہ پیشے ہین جیہڑے صنعتی انقلاب دی نیہہ بناؤندے ہین تے سماج نوں اگلی پوڑی تے لے کے جاندے ہین۔ پر واہی وان گنتی وچ اوہناں نالوں ودھ سن تے طاقت اوہناں دے ہتھ وچ سی ایس لئی اوہناں اجیہیاں پیشیاں نوں گھٹیا سمجھیا تے اوہناں بارے جگتاں تے مذاق بنائے (مثلاً، جولاہے دیاں مشکریاں ماں بھین نال)۔

واہی وان وسوں نوں وچار کرن والے لوکاں تے اوہناں دے کماں نال ویر سی یاں اوہ اوہناں نوں بڑا گھٹیا سمجھدے سن۔ ہینے لوکیں ایہناں کمیاں دے خانے وچ نہیں آؤندے پر اوہناں دے خلاف کرودھ سوچن دی وجہ توں ہی سی۔ "رگ اک ودھیک ہے لنگیاں دی " دی وچ وی ایہو گل ہے جو لنگے کدی کدی اوہ گل وی سوچ لیندے نیں جو عام واہک دے وہم خیال وچ وی نہیں ہوندی۔ ظاہر گل ہے سماج وچ بھارو ستھ دے دماغ وچ کوئی گل نہیں آؤندی تے اوہ فساد ہی سمجھی جاندی ہے۔


Share |


 

Depacco.com


 

 

Visitors Comments

Name:Waseem
Date:2nd August

Comment: Salaam Sir G. this is very nice link Ap ko Mubarak ho I love Heer Waris Shah


Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels