Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 134

ہیر وارث شاہ: بند 134

February 25th, 2010

کوئی روز نوں ملک مشہور ہوسی چوری یاری جے عیب کواریاں نوں
جنہاں پان ہے نچنے کُدّنے دِی رکھے کون رناں ہریاریاں نوں
ایس پاء بھلاوڑا ٹھگ لیتے کم پہنچسی بہت خواریاں نوں
جدوں چاک اُودھال لیجاگ نڈھی تدوں جھورسوبازیاں ہا ریاں نوں
وارثؔ شاہ میاں جنہاں لائیاں نیں سئی جاندے داریاں یاریاں نوں

اوکھے لفظاں دے معنے
پان: عزت۔ ہر یاریاں : آزاد، بیباک، منہ زور۔ بھلاوڑا: بھل۔ اودھال لیجاگ:اغوا کر کے لے جاوے گا۔ جھورسو: پچھتاؤ گے ۔ لائیاں نیں: پریت لائی ہے۔ داری: لحاظ ،نموشی

سدھا مطلب
کیدو جواب وچ آکھدا ہے جو ایہہ گل اک دن مشہور ہووے گی کہ کواریاں لئی چوری نال لائی یاری عیب ہے
جیہناں نوں نچن کدن دی عادت ہووے اوہناں ہر اک دیاں یار (چالو) زنانیاں نوں کون سنبھال سکدا ہے۔
ایس (رانجھے نے) بھلاوا دے کے سب ٹھگ لئے ہین تے ایس دا نتیجہ بڑی وڈی خواری ہوسی۔
جدوں چاک کڑی نوں کڈھ کے لے جاوے گا اودوں تسیں ہاری ہوئی بازی تے جھورو گے۔
وارث شاہ ہوریں کہندے ہین جو جیہناں یاریاں لایاں نیں اوہو یاریاں تے اوہناں دی پاسداری کرنا جاندے ہین۔

کھلارواں مطلب
کیدو جو پہلے مصرعے وچ کہندا ہے جو اک دن ملک وچ مشہور ہووے گا کہ کواریاں لئی چوری دی یاری لاؤنا عیب ہے کجھ تھوڑا عجیب ہے۔ ہن عام طور تے ایہہ سمجھیا جاندا ہے جو کواری لئی چوری دی یاری اوڈی بری نہیں جڈی ویاہی ہوئی زنانی دی ہے۔ ایس دا مطلب ایہہ ہے جو وارث شاہ اجیہے دور ول سینت مار رہیا ہے جدوں کواری لئی چوری دی یاری کوئی ایڈی بری گل نہیں سی یا ایہہ کہ ویاہیاں ہوئیاں لئی چوری دی یاری عیب نہیں۔

ایہہ گل تے اسیں تاریخ توں جاننے ہاں جو سب توں پہلاں عشق دا تصور روم شہنشاہی دے زمانے وچ آیا۔ اوس ویلے عشق دا مطلب ہی غلام بندے دا ویاہی ہوئی زنانی نال تعلق سی۔ فیر اسیں ہندوستان دے رگ وید دے زمانے دی تاریخ توں وی پتہ لاؤنے ہاں جو زنانی اپنی مرضی نال مرد رکھدی سی تے اوہ مرد نوں اوویں ہی جتدی سی جیویں اج مرد جتدا ہے۔ فیر ایہہ گل وی اج تایئں چلی آ رہی ہے جو صرف ویاہیاں زنانیاں ہی گھنڈ کڈھ دیاں ہین کواریاں بنا گھنڈ دے ہی رہندیاں ہین۔ ایس توں لگدا ہے جو عورت دے بھارو ہون توں مرد دے بھارو ہون دے زمانے دے وچکار اجیہا ویلا وی سی جد کواریاں کڑیاں لئی چوری نال یاری لاؤنا کوئی وڈا عیب نہیں سی۔

ایہہ تے اسیں اپنی ہوش وچ ویکھیا جو پنڈاں وچ کواریاں کڑیاں منڈیاں دی یاری تے لوکیں چپ ہی رہندے سن۔ایس گل تے کڑیاں دے ویاہ وی نہیں رکدے سن تے کڑیاں وی پرانے یرانے بھل بھلا کے ویاہی ورہی زندگی وچ لگ جاندیاں سن جیس تے وارث شاہ دا ہی مصرعہ ہے "وارث شاہ وساہ کیہ کواریاں دا، ایویں لوک نکمڑے کرن جھیڑے"مطلب کواری کڑی دا عشق کچا ہوندا ہے کیوں جو ویاہی جان مگروں سب کجھ بھل جاندی ہے۔

کیدو دا کہنا جو "کوئی روز نوں ملک مشہور ہوسی" دا ایہو مطلب ہو سکدا ہے جو اوس ویلے تیکر کواریاں لئی چوری دی یاری کوئی وڈا عیب نہیں سی۔ جے ایس پکھ توں ویکھو تے کیدو خبردار کر رہیا ہے جو ہیر رانجھے دا عشق عام کڑیاں منڈیاں ورگا نہیں، ایہہ بہت ڈوہنگا تے پواڑے پاؤن والا ہے۔

دوجے مصرعے وچ کیدو اوہو جیہاں کڑیاں تے زنانیاں دے وصف دسدا ہے جو چوری یاری کردیاں ہین۔ کیدو کہندا ہے جو جیہڑیاں زنانیاں نچدیاں کددیاں ہین اوہ ہر اک نال یاری لا لیندیاں ہین تے اوہناں نوں کوئی رکھ نہیں سکدا۔ مطلب عورت دا نچنا کدنا اوس دے کردار نوں خراب کر دیندا ہے۔

اک پکھ توں کیدو ٹھیک وی کہندا ہے جو اوہ زنانیاں جو نچن ورگے آرٹ وچ دل لاؤندیاں ہین اوہناں دا مرد بارے روایتی ڈھنگ بدل جاندا ہے۔ اوہ مرد وچ اوہ صفتاں نہیں لبھدیاں جو سماج وچ چالو ہوندیاں ہین، اوہ سگوں مرد وچ نویں جیون دی امنگ لبھدیاں ہین۔ ایس کھوج وچ اوہ اک توں ودھ مرداں نال دوستی کردیاں ہین تے اپنی اصلی پسند بھالدیاں ہین۔ ایہو جیہیاں زنانیاں اوہ نہیں ہوندیاں جو سماج دے ٹھپے وچ رہندیاں اوس اک مرد نال ٹر جاندیاں ہین جو اوہناں دے ماپیاں لبھیا۔ ایہہ اوہ عورتاں ہین جو اپنی اکھیں ویکھ کے تے جاچ کے پسند کردیاں ہین۔ ایہو کم ہیر نے کیتا ہے۔ ایہو گل ہے جو کیدو ہضم نہیں کر سکدا تے سمجھدا ہے جو ایہہ سماج نوں اتھل پتھل کر دیوے گی۔ اوس دی سوچ پٹھی ہے جو اوہ ایس نوں روکنا چاہندا پر اوہ گل نوں سمجھ ضرور رہیا ہے۔

تریجے مصرعے وچ کیدو گل نوں کھولدیاں کہندا ہے جو رانجھے نے بھلاوا دے کے سب نوں ٹھگ لیا ہے۔ اوس دا خیال ہے جو رانجھا صرف ناٹک کر رہیا ہے یا رانجھے دا ورتارا تے سبھا اک بھل ہے۔ اوہ ایہہ منن نوں تیار نہیں جو رانجھا اک اجیہا مرد ہے جو زنانی نوں آزاد کروا رہیا ہے تے زنانی ایس لئی اوس دے نال لگ گئی ہے۔ کیدو سمجھدا ہے ایہہ سب ٹھگی ہے اک کڑی نوں ادھالن دی۔ اوہ ایس گل تے گوہ نہیں کرنا چاہندا جو رانجھا آپ چودھری دا پتر سی تے ایہو جیہے گناں والا سی جو اوس دے وطن تخت ہزارے وی کڑیاں اوس تے مردیاں سن۔ جے اوس نوں اک کڑی ہی چاہیدی ہوندی تے اوہ تخت ہزارے وچ وی مل سکدی سی۔ کیدو لئی سیالاں دے سماج نوں بھنن والی ہر صفت ٹھگی ہے۔

کیدو ہی نہیں اج وی جے کوئی سماج بدلو ہووے تے اوس تے پہلا الزام ایہو لگدا ہے جو اوہ کوئی ٹھگی کر رہیا ہے تے کم خواری تیکر اپڑے گا۔ اصل وچ کیدو ورگے سماج دیاں ریتاں دے سنبھالو ایہہ سمجھ ہی نہیں سکدے جو سماج بدلن والے جمدے وی نیں تے اوہناں وچ کجھ اچیچیاں صفتاں ہوندیاں ہین جو رانجھے وچ ہین۔

چوتھے مصرعے وچ کیدو سیالاں نوں خبردار کردا ہے جو جدوں چاک کڑی نوں کڈھ کے لے جاوے گا اودوں تسیں ہاری ہوئی بازی تے پچھتاؤ گے۔ مطلب کڑی دا مرد نال ملاپ سماج دی اک بازی ہے جیس نوں ہمیشہ اپنے مطابق جتنا چاہندا ہے۔ کیدو اپنے آپ نوں سماج دا راکھا سمجھدیاں وچاردا ہے جو سیال سرداراں نوں کوئی پتہ نہیں جو اوہناں تے حملہ کیس پاسیوں ہون والا ہے۔ ہیر دا پیو تے دوجے سیال اپنے اجوکے مفاد نوں ویکھ رہے ہین تے اوس تے چل رہے ہین کیوں جو اوہناں نوں یقین ہے جو ایہہ سماج سدا چالو رہوے گا۔

پر کیدو دا سماج وچ باقیاں ورگا مفاد نہیں اوس نے اپنے آپ نوں اللہ واسطے سماج دا چوکیدار بنا لیا ہے ایس لئی اوہ آؤن والیاں خطریاں نوں بہتا سنگھدا ہے۔ کیدو اجکل دے اوہناں سوجھواناں وانگ ہے جیہڑے طبقاتی سماج نوں آؤن والے حملیاں دی دس پاؤندے رہندے ہین۔ اوہ آپ سرمایہ دار یا جاگیردار نہیں ہوندے پر ایس طرحاں دے نظام نوں اپنا مذہب سمجھ کے اوس دی راکھی کردے ہین۔سرمایہ دار جاگیرداراں کول اپنے وقتی مفاداں نوں سانبھن توں ویہل نہیں ہوندی ایس لئی اوہ دوروں آؤن خطریاں نوں سنگھ نہیں سکدے۔ کیدو ورگے سوجھوان ایہناں دے کمی ہوندے ہین تے اوہناں دے سینگھے دا کم کردے ہین۔

ایس بند دے اخیری مصرعے ویکھن نوں وارث شاہ کیدو دے الٹ گل کر رہیا ہے، مطلب عشق نوں نبھاؤن تے اوس دی پاسداری اوہو کردے ہین جیہڑے عشق کردے ہین۔ پر گوہ نال ویکھو تے اوہ کیدو دی گل دا سٹا اک ہور پاسیوں کڈھ رہیا ہے۔ مطلب کیدو نوں پتہ ہے جو عاشق کیس حد تائیں اپنی یاری تے کھڑے رہن گے۔ اوس نوں افسوس ایہہ ہے جو باقی سیال مطلب سماج دے عام بندے ایس گل نوں نہیں سمجھدے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels