Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 135

ہیر وارث شاہ: بند 135

December 3rd, 2010
4 / 5 (1 Votes)

قصہ ہیر نوں تُرت سہیلیاں نیں جا کن دے وچ سنایا ای
تینوں مہناں چاک دا دے کیدو وچ پرہے دے شور مچایاای
وانگ ڈھول حرام شیطان دے نی ڈَگا وِچ بازار دے لایا ای
ایہہ گل جے جائےسی اَج خالی تنے ہیر کیوں ناؤں سدایاای
کر چھڈنی ایس دے نال ایسی سنے دیس جو کیتڑا پایا ای
وارثؔ شاہ اپرادھ دیاں رہن جُڑیاں لنگے رِچھ نیں معاملہ چایاای

اوکھے لفظاں دے معنے
ترت: فوراً ؛ ڈگا: ڈھول تے مارن والی لکڑ؛ تیں: توں؛ کیتڑا: کیہہ؛ اپرادھناں:فسادی

سدھا مطلب
ہیر دیاں سہیلیاں نیں اوہنوں جھبدے جا کے کن وچ قصہ سنایا
اوہناں دسیا جو کیدو نے پرہیا وچ رولا پایا ہے تے تینوں چاک دا مہنا ماریا ہے
اوس نے حرام شیطان وانگوں بازار وچ ڈھول وجایا ہے
جے ایس گل دا کجھ نہ کیتا گیا تے تیرا ناں ہیر نہیں ہے۔
ایس دے نال ایہو جیہی کرنی ہے جو پورے ملک نوں پتہ لگے جو جیہو جیہی اوس (کیدو) کیتی اوہو جیہی اوہنوں سزا ملی۔
وارث شاہ کہندا ہے جو ویر دے جذبے نال بھرے لنگے رچھ نے معاملے نوں پھیر ہوا دتی ہے۔

کھلارواں مطلب
پچھے وی کجھ بنداں وچ وارث شاہ ہوراں ہیر دیاں سہیلیاں دا اک خاص ڈھنگ نال ذکر کیتا ہے۔ ایس لئی ایس بند دی پڑھت توں پہلاں اسیں ایہہ ویکھیئے جو وارث شاہ ہوریں ناٹک وچ سہیلیاں نوں گھڑی گھڑی لیا کے کرنا کیہ چاہوندے ہین کیوں جو سانوں ایہہ پتہ ہے جو وارث ہوریں کہانی وچ ایویں وادھے لئی کجھ نہیں کردے سگوں وڈیاں وڈیاں واپریاں تے ادھے مصرعے وچ گل کرکے اگے ٹُر پیندے ہین۔ ایہہ ڈھنگ دمودر داس ہوراں کولوں وکھ ہے کیوں جو دمودر داس ہوریں اک اک موڑ نوں ایویں بیان کردے ہین جیویں ڈرامے یاں فلم دا سکرپٹ ہووے۔ وارث شاہ ہوریں بڑے صرفے توں کم لیندیاں کہانی چھیتی نال اگے ٹور دیندے ہین۔ ایس لئی اوہناں جو کردار وی اپنی کہانی وچ لیاندے ہین اوہ بڑے سوچ سمجھ کے لیاندے ہین۔

ہیر دیاں سہیلیاں آپ وی زنانیاں ہین تے اوہ ہیر دے مسئلے نوں اپنا سمجھ کے اوس دی امداد کردیاں ہین۔ ہیر اوہناں دے نال ہی کھیڈدی کھڈاؤندی سی تے اوہناں نوں پتہ سی جو اوہ کڈے غرور والی ہے تے کیویں کسے مرد نوں کجھ نہیں سمجھدی۔ پھیر اوہناں ہیر دا عشق لگدا ویکھیا تے اوس نوں رانجھے نال نمانا بن دیاں ویکھیا ، ایس لئی اوہ اوہناں دے عشق نوں اگے ودھاؤن وچ اوہدی امداد کرن لئی ہر ویلے تیار رہندیاں ہین۔ اوہ ہیر لئی اوہ ہین جو رانجھے لئی پنج پیر ہین۔ اوہ ہیر د ے کن تے سُنگھن دی طاقت ہین یاں کہہ لوو اوپدیاں اپنے اندر دیاں شکتیاں وی ہین۔ ایس لئی جیویں پیر اوکھے ویلے رانجھے کول پہنچ جاندے ہین ایویں ہی سہیلیاں وی آ جاندیاں ہین۔

پچھلے اک بند وچ وارث شاہ ہوراں دریا وچ رانجھے نوں ہیر تے اوہدیاں سہیلیاں نال رنگ رنگ دیاں کھیڈاں کردیاں وکھایا سی۔ مطلب نہ ہیر اوہناں توں سڑدی ہے تے نہ ہی اوہ رانجھے نوں اپنے مرد وانگ سمجھ دیاں ہین۔ اوہ رانجھے نوں دوست وانگ جاندیاں ہین۔ ایس نال وارث شاہ ہوریں ایہہ وکھا رہے سن جو بندے تے زنانی وچکار صرف جنس دا ہی نہیں ساتھی تے دوست دا ساک وی بن سکدا ہے۔ سماج تے اوس دے پالن والے عورت تے مرد دے صرف جنسی رشتے نوں منندے نیں تے ایسے لئی عورت کولوں گھر والیاں (سوہریاں) کولوں وی گھنڈ کڈھواندے نیں۔ اوس نوں برقعے پواؤندے تے اوس نوں پردے پچھے ڈکدے نیں۔ وارث شاہ ہوراں ہیر دی سہلیاں دا رانجھے نال جو ساک بنایا ہے اوہ ایہناں ساریاں دا توڑ ہے۔ایس بند و چ وی جدوں کیدو گل نوں بہت خراب کر دیندا ہے تے اوہ آ کے ہیر نوں چپ کرکے دس دیندیاں ہین جیویں پہلے مصرعے توں پتہ لگدا ہے۔

دوجے مصرعے وچ ہی کہندیاں ہین جو کیدو نے پرہیا وچ ہیر دا ناں چاک نال لا کے بھنڈن دا جتن کیتا ہے۔ مطلب ہیر دیاں سہیلیاں نوں وی ایہہ گل بھیڑی لگی ہے کیوں جو اوہ وی عورت ہوندیاں چاہندیاں ہین جو اوہناں نوں اپنی مرضی دا مرد لبھن دی کھل ہونی چاہیدی ہے۔ بھانویں ایہہ مرد پرائی ذات دا یا تھلڑے طبقے دا ہووے۔

تیجے مصرعے وچ سہیلیاں دا غصہ ودھیا ہویا دسدا ہے جتھے اوہ کیدو نوں شیطان تے اوس دی بکواس نوں حرامی شیطان دا ڈھول تے اعلان کرنا کہندیاں ہین۔ جے کر اسیں قدیمی کہانی تے جایئے تے اک پاسے رب سی تے دوجے پاسے شیطان۔ رب بندے نوں کُھل دے کے گھلیا سی جو چنگا تے بھیڑا کرن جوگا ہووے۔ شیطان بندے دا دشمن بن گیا تے اوس بندے نوں بھلاوے دین دی سونہہ کھا لئی۔ ہیر دیاں سہیلیاں کیدو نوں شیطان منندیاں ہین جیہڑا بندے نوں سدھی راہ یعنی مرد تے عورت دی مرضی نال رشتے بناؤن دا راہ روک رہیا ہے۔ اوہ رنگ رنگ دے بہانے بنا کے تے ڈراوے دے کے سیالاں نوں ہیر رانجھے دے ربی عمل مطابق بنے رشے دا ویری بنا رہیا ہے۔

چوتھے مصرعے وچ کیدو نوں روکن دا پک وی ہے تے ہیر نوں للکر وی ہے جو اوہ کیدو دا ایتھے ہی مکو ٹھپ دیوے۔ جے اوس کیدو دی برائی نوں ایتھے نہ روکیا تے پھیر ہیر دی ہوند نوں خطرہ پے جاوے گا۔ تے اگلے ہی مصرعے وچ اوس نوں سجھا دیندیاں ہین جو کیدو نال ایہو جیہی کرنی ہے جو باقی دیس دے لوک وی اوس کولوں سبق لین۔ مطلب ہیر دیاں سہیلیاں چاہندیاں ہین جو پورا دیس ایس گل نوں منے جو عورت مرد مرضی نال تعلق بنا سکدے ہین۔

اخیری مصرعے وچ کیدو دی شرارت نوں " لنگے رچھ نے معاملہ چائیا ای " کہ ایس نوں ہور بھیڑے رنگ وچ پیش کیتا جا رہیا ہے۔ پر ایس مصرعے وچ ایہہ وی گل لکی ہوئی ہے جو ایہہ ایڈا وڈا معاملہ نہیں سی پر کیدو نے شیطانی دماغ نال ایس نوں ودھا دتا۔

پر جے اسیں وارث شاہ ہوراں دی اپنی سینت نوں لیئے تے معنے کجھ بدل جاندے ہین۔ اوہناں سیاں دی سینت بارے آپ کہیا:

سیاں ہیر دیاں رن گھر بار تیرا جیہناں نال پیوند بنایا ای

مطلب ہیر دیاں سہیلیاں اوس دی دنیاداری ہے جیہڑی اپنیاں کھیڈاں کھیڈدی ہے۔ ایتھے اوس دی دنیا داری دی میں اوس نوں چکدی ہے جو اوہ کیدو ورگے شیطان نوں سبق سکھاوے۔ دنیاداری دی ہی سمجھ اوہنوں ایہہ سوچن تے مجبور کردی ہے جو سارا معاملہ کیدو دی وجہ توں خراب ہو رہیا ہے۔ اوس نوں دنیا داری ایہہ سمجھن نہیں دیندی جو کیدو سماج تے ویہار دا اک نکا جییا پاتر ہے جیہڑا ایڈے وڈے معاملیاں نوں نہ بنا سکدا ہے تے نہ ہی وگاڑ سکدا ہے۔ مطلب کیدو نہ وی ہووے تے سیالاں نے اپنی دھی اک کامے نال نہیں ویاہونی۔ پر ہیر روز بروز دی دنیا داری دی سمجھ نال کیدو نوں ہی وڈی روک سمجھدی ہے تے پورے نظام نوں اجے نہیں ویکھ سکدی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels