Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 137

ہیر وارث شاہ: بند 137

December 7th, 2010

سیاں نال رل کے ہیر متّا کیتا کھنڈ پُھٹ کے گلیاں ملیاں نیں
کیدو آن وڑیا جدوں پھلے اندر خبراں تُرت ہی ہیر تھے گھلیاں نیں
ہتھیں پکڑ کانباں وانگ شاہ پریاں غصہ کھائی کے ساریاں چلیاں نیں
کیدو گھیر جیوں گدھا گھمیار پکڑے لاہ سہلیاں پکڑ پتھلیاں نیں
گھاڑ گھڑن ٹھٹھیار جیوں پون دھمکاں دھائیں چھڑدیاں مہلیاں چلیاں نیں

اوکھے لفظاں دے معنے
متا: مشورہ، صلاح ، تجویز ، منصوبہ؛ کھنڈ پھٹ کے: کھلر کے،اک اک ہو کے؛ کانباں : چھمکاں، رُکھاں توں توڑیاں پتلیاں ٹہنیاں؛ دھائیں چھڑدیاں: چاول چھڑ دیاں؛ ٹھٹھیار: دھات دے بھانڈے بناؤن والا؛ مہلیاں: اوکھلی وچ کٹن والا وڈا ڈنڈا (اوکھلی میں سردیا تو موسلوں سے کیا ڈرنا)

سدھا مطلب
سہیلیاں نال رل کے منصوبہ بنایا تے منصوبے مطابق کھلر کے پنڈ دیاں گلیاں مل لئیاں (تاں جو کیدو دے آؤن دا پتہ لگ سکے)۔
جدوں کیدو آپ پھلے اندر (جاسوسی کرن لئی وڑ گیا) تے سہیلیاں نے چھیتی نال ہیر نوں اوہدی خبر کر دتی۔
اوہناں ہتھ وچ چھمکاں پھڑ لئیاں تے غصہ کھا کے ٹر پیاں۔
اوہناں کیدو نوں ایویں گھیریا جیویں گھمیار اپنے کھوتے نوں گھیردے ہین، تے اوہناں اوہدے گلوں گانیاں لاہ کے اوس نوں کٹ چاڑھنی شروع کر دتی۔
اوہناں کیدو نوں انج گھڑیا جیویں لوہے دے بھانڈے بناون والے بھانڈیاں نوں گھڑدے ہین تے اوس دی دھمک دور دور جاندی ہے۔ اوہناں اوس نوں انج کٹیا جیویں چولاں نوں اوکھلی وچ پا کے کٹیا جاندا ہے (پرانے زمانے وچ چاولاں نوں چھڑن دا ایہو طریقہ سی)

کھلارواں مطلب

ہیر دیاں سہیلیاں دا جتھہ اک جڑی ہوئی ستھ ہے۔ جیس دا مطلب ہے جو ہیر دی "میں" بڑی پکی تے ڈوہنگی ہے۔ اوہ اپنا بدلہ لین لئی پوری منصوبہ بندی کردی ہے۔ اوہدا سب گلیاں دے رستے بند کرواؤن دا مطلب ہے جو اوہ نظام دے اندر رہندے اپنے ویری دے سارے راہ روک سکدی ہے۔
دوجے مصرعے وچ پتہ لگدا ہے جو ہیر نوں پتہ ہے جو کیدو روز اوہدی جاسوسی کردا ہے تے اوہنوں پتہ ہے اوہنوں کتھوں پھڑنا ہے۔ جے کیدو اوہدے اپنے اندر دا اک سماج بچاؤ انگ ہے تے پھیر وی اوہنوں ایہدا پتہ ہے۔ جیویں سچل سرمست ہوراں کہیا ہے:

رانجھو کھیڑا دوہیں میں ہاں ، ہیر گئی ونج کتھے کتھے

سو اک طرحاں کیدو اوہدے اندر دی ہی حالت ہے جیہڑی اوہنوں سماج دیاں حداں نوں توڑن نہیں دینا چاہوندی۔ اوہ اپنے ماں پیو دیاں ریتاں دی پالنا کرنا چاہوندی ہے۔اوہنوں ہر ویلے اپنے اندر دی ایس حالت نال لڑنا پیندا ہے۔ کیدو اوہدی حالت دی دنیاوی شکل ہے۔ ایہہ بڑی دکھانت والی حالت ہے تے ہیر دیاں سہیلیاں دا چھمکاں نال مارن لئی تیار ہونا اوس دا اپنے اندر دی ودھدی پیڑ دیاں سینتاں وی ہو سکدا ہے۔

اخیری دو مصرعیاں وچ پہلاں تاں کیدو نوں گھمیار دے کھوتے ورگا جانور دسیا گیا جس نوں اوسے طرحاں کٹیا جانا ہے تے اوہدی سزا نوں لوہے دے بھانڈے گھڑن نال ملایا گیا ہے۔ کھوتے وچ بڑی اڑی ہوندی ہے تے اوہ تھوڑی کیتیاں سدھا نہیں ہوندا۔ لوہا وی بڑی سخت دھات ہے تے اوس لئی وی سخت گھڑائی دی لوڑ ہے۔ مطلب ہیر دی منفی "میں" تے اوہدے اندرلے پچھونہے الار کڈے سخت ہین۔ اوہناں دے اندر جنگ (کیدو تے ہیر دی میں ) کڈی کرڑی ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels