Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 139

ہیر وارث شاہ: بند 139

December 12th, 2010

اِک مار لتاں دوئی لا چھمکاں تِرئی نال چٹاکیاں مار دی ہے
کوئی اِٹ وٹا جُتی ڈھیم پتھر کوئی پکڑ کے دھون بھوئیں مار دی ہے
کوئی پُٹ داڑھی دُبر وِچ دیندی کوئی ڈنڈکا وِچ گزاردی ہے
چور ماری دا ویکھئے چلو سادھو وارث ؔشاہ ایہہ ضبط سرکاردی ہے

اوکھے لفظاں دے معنے
چٹاکیاں: چپیڑاں؛ ڈھیم: کچی مٹی داڈھیلا؛ دُبر : پیٹھ؛ ڈنڈکا:نکا جیا سوٹا؛ سادھ: شریف شہری

سدھا مطلب
اک کڑی لتاں نال کیدو نوں مار دی ہے تے دوجی پتلیاں سوٹیاں (چھمکاں) نال تے تیجی اوہدے سر وچ چپیڑاں مار رہی ہے۔
کوئی اوس نوں اٹ مار دیندی ہے تے کوئی ڈھیم یاں پتھر۔ پھیر ہور آؤندی ہے تے اوہ اوہنوں دھون توں پھڑ کے اوہنوں بھوئیں تے سٹ دیندی ہے۔
کوئی اوہدی داڑھی پٹ کے اوس دی پِٹھ وچ تُندی ہے تے کوئی پٹھ وچ ڈنڈا واڑ دیندی ہے یاں ڈنڈے نال چتڑ کٹدی ہے۔
وارث شاہ ہوریں کہندے نیں آؤ سادھو چور نوں کٹ پیندی ویکھئے کیوں جے ایہہ ایویں ہے جیویں سرکار نے کسے نوں پھڑیا ہووے یا قبضے وچ کیتا ہووے۔

کھلارواں مطلب
ایس بند وچ وی پہلے بنداں وانگ اک جنگ دا نقشہ دِسدا ہے۔ انج لگدا ہے جیویں ہر کڑی نوں کیدو تے اکو جیہا کرودھ ہے تے اوہ جیس طرحاں وی اوس نوں مار سکدی ہے ماردی ہے۔ ایس توں پہلے بند وچ کیدو دے نک سک دی بربادی دا بہتا ذکر سی پر ایہہ بند پورا اوس دے جثے دے وکھ وکھ انگاں تے سٹ ماردا دِسدا ہے۔

ایس بند وچ وی کڑیاں کیدو دی آدر تے مردانگی تے سٹ ماردیاں ہین۔ اوہدے سر تے چپیڑاں وی پیندیاں ہین تے اوہدی داڑھی وی پٹ کے پٹھ وچ دتی جاندی ہے تے نال ڈنڈا وی۔ ایہہ زنانی دا یاں کسے وی ماڑے بندے دا اوہ کرودھ ہے جیس نوں وس چلن تے کڈھدا ہے۔

اخیری بند وچ وارث شاہ ہوریں کیدو نوں چور تے کڑیاں دے جتھے نوں سرکار یا حکومت کہندے ہین۔ شاید وارث شاہ ہوریں ایہہ وی دس رہے ہین جو جے کوئی بھول انبھول سرکار دے ہتھے چڑھ جاوے اوس نال انج ہی ورتارا کیتا جاندا ہے۔ کڑیاں کولوں کیدو کولوں پیندی کُٹ دے ڈرامے نال اوہ سرکار دے ظلم ساہمنے لیاؤنا چاہوندے نیں۔ ایتھے کڑیاں دے دے مارن دے ناٹک وچ وارث شاہ ہوراں نوں اک دم سرکار دا خیال آجانا بے معنی نہیں ہے۔ ایہہ ایویں مصرعہ جوڑن لئی نہیں کیتا گیا کیوں جو وارث شاہ ورگا کمال ہنری شاعر سرکار دا ناں لئے بغیر وی مصرعہ بنا سکدا سی۔ ایس لئی اسیں جو پہلے کہیا سی جو وارث دی کڑیاں دے حملے وچ اپنے ویلے دیاں جنگاں دے کھڑاک سنا رہے ہین اوہ ایس مصرعے توں ثابت ہو جاندا ہے۔

جے کر ضبط سرکار دا معنہ ایہہ لیا جاوے جو سرکار تے کسے دے قبضے توں مگروں پرانے اہلکاراں نال کیہ ہوندا ہے تے گل وارث شاہ دے ویلے دی تاریخ جیہی ہو جاندی ہے جدوں پنڈاں دی ماڑی جٹالی مغل سرکار تے قبضہ کر رہی سی تے پرانے اشراف نال ایہو کجھ کر رہی سی جو کڑیاں کیدو نال کر رہیا ہین۔ اک طرحاں کیدو وی ریت دا راکھا ہوندیاں اشراف دا ہی حصہ ہے بھاویں اوہ آپ فقرا ہے۔ہیر رانجھے دا عشق آؤن والے دن دی سینت ہے تے کڑیاں چڑھدی دھر نیں جیہڑیاں پرانے نوں کُٹ پھاٹ کے اک پاسے کر دینا چاہوندیاں ہین۔

بعضے پڑھن ہار سدھے ڈرامے وچ اوس ویلے دی تاریخ تے سیاست دے ذکر نوں دھگانہ کہن گے۔ پر سانوں ایہہ نہیں بھلنا چاہیدا جو ہر وڈی لکھت اپنے ویلے دے کل حالاں دا وکھالا ہوندی ہے۔ وارث شاہ ہوریں اک سماج وچ اک خاص ویلے وچ جیوں رہے سن۔ ایسے لئی اوہناں دے تصور دی بنتر وچ اوس ویلے دیاں واپریاں دا بہتا ہتھ ہووے گا۔ وارث شاہ ہوریں تے تاریخ تے سیاست دی رمز مارن توں جھکدے وی نہیں۔ ایس لئی اسیں ایہہ عام جیہا ڈرامہ اوس ویلے دی تاریخ تے سیاست توں وکھ کر کے نہیں ویکھ سکدے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels