Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 140

ہیر وارث شاہ: بند 140

December 19th, 2010

پاڑ چُنیاں سُتھناں کُڑتیاں نوں چک وڈھ کے چیکدا چور وانگوں
وتّے پھرن پروار جیوں چن دوالے گرد پائیلاں پاؤندیاں مور وانگوں
ساہو کار دا مال جیوں وچ کوٹاں دوالے چونکیاں پھرن لاہور وانگوں
وارثؔ شاہ انگیاریاں بھکھدائی اس دی پریت ہے چند چکور وانگوں

اوکھے لفطاں دے معنے
چک:دندیاں وڈھنا؛ وتے پھرن: پھردے رہن؛ پریت: پیار، محبت ؛ چکور: اک پکھو دا ناں


سدھا مطلب
کیدو کڑیاں دیاں چنیاں، ستھناں تے کڑتیاں نوں پاڑ دیندا ہے۔ اوہ کڑیاں نوں دندیاں وڈھدا ہے تے انج چیکاں ماردا ہے جیویں کوئی چور کٹ کھا کے رولا پا رہیا ہووے۔
کڑیاں اوہدے دوالے مور وانگ پیلاں پاؤندیاں انج پھر رہیاں ہین جیویں (تاریاں دے ) پروار چن دوالے گھمدے ہین۔
کڑیاں اوہدے دوالے انج گھم رہیا ہین جیویں ساہوکار دے دے قلعے وچ رکھے مال دے دوالے لاہور سرکار دیاں سپاہیاں دیاں چونکیاں گھم رہیاں ہوون۔
وارث شاہ نوں لگدا ہے جو جیویں اوہ انگیارے پھک رہیا ہووے یاں انگیارے وانگ بھکھ رہیا ہووے تے اوہدی پریت چند تے چکور ورگی ہے۔ چکور لکھ چن ول اڈاریاں مارے اوہ چند نال ملاپ نہیں کر سکدی۔ مطلب اوہدے جتن لا حاصل ہین۔

کھلارواں مطلب
ایس بند وچ کڑیاں تے کیدو دی جنگ دا نقشہ ہارن تے جتن والے دے پکھ توں الیکیا گیا ہے۔ کیدو مار کٹ کھا کے ہار چکیا ہے تے اوہ کڑیاں دیاں چنیاں، ستھناں تے کڑتیاں پاڑدا تے چیکاں ماردا دسدا ہے۔ ایہہ اک ہارے ہوئی دھر دی حالت ہے۔ دوجے پاسے جتی ہوئی دھر، مطلب کڑیاں، اوس دے دوالے انج گھم رہیاں ہین جیویں تارے چن دوالے گھمدے ہین یا جیویں مور مستی وچ پیلاں پاؤندے ہین۔ ایہہ جتن والی دھر دی مستی ہے۔
ایس مستی توں اڈاری مار کے وارث شاہ سیاست ول مڑ جاندا ہے۔ اوہ کڑیاں تے کیدو دے سین نوں کاروبارتے ریاست دی سانجھ تیکر لے جاندا ہے۔ساہوکار دا مال قلعے وچ ہے تے تخت لاہور دیاں فوجاں اوس دوالے پہرہ دے رہیاں ہین۔ ایس وچ اک گنڈھی تے ایہہ ہے جو ساہوکار تے سیاسی راج وچوں اک دوجے دے سانجھی ہین۔ ساہوکار نوں اپنے وپار دی سانبھ لئی راج دیاں دیاں فوجاں دی سدا لوڑ ہے۔ یا انج کہہ لوو جو راج دیاں فوجاں بنا ساہوکار دا کم نہیں چل سکدا تے فوجاں دے خرچے ساہوکاراں دے منافعے بنا پورے نہیں کیتے جا سکدے۔ دوہیں اک دوجے دی مڈھلی لوڑ ہین۔

ایس مصرعے توں ایہہ وی اگھڑدا ہے جو پنجاب وچ اینا پھردول پے چکیا ہے جو ساہوکار دے مال دی سنبھال لئی سرکار نوں فوجاں گھلنیاں پے رہیاں ہین۔ اصل وچ حال تے انج ہی سی کیوں جو جٹالی جتھے ساہوکاراں دا مال دن دیہاڑے لٹ لیندے سن۔ ایس نال سرکار دی معاشی چلت وی تباہ ہوندی سی تے اوس دی آمدن وی مکدی سی۔ ایس لئی اوہ اپنے بچا لئی ساہوکاراں دے مال رکھوالی کردی سی۔

ایس مصرعے دا مطلب ایہہ وی کڈھیا جا سکدا ہے جو ساہوکاراں دا مال لہور سرکار نے ضبط کرکے اوس تے پہرے لا دتے ہین۔ پر ایہہ گل اوس ویلے دے حالاں موجب ٹھکویں نہیں۔

کیدو دوالے کڑیاں دا گھمن گھیرے نوں سرکار دیاں چونکیاں کہنا تے کیدو نوں ساہوکار دا مال کہنا کجھ اچرج جیہا ہے۔ کیدو تے ساہوکار دا مال کہیا جا سکدا ہے کیوں جو ساہوکارے دے پرانے نظام دی ریت دا راکھا ہے۔ پر کڑیاں نوں سرکار دیاں چونکیاں کہن توں صرف ایہہ اگھڑدا ہے جو نویں ابھردی طاقت سرکار جنی تگڑی ہو گئی ہے۔ یا وارث شاہ ایس رمز نال صرف اوس ویلے دی بے اعتباری دی حالت ول اشارہ کرنا چاہوندے سن۔

اخیری مصرعہ بڑا ولاویں والا ہے۔ ایس وچ ایہہ پتہ نہیں لگدا جو وارث شاہ ہوریں اپنی گل کر رہے ہین یا کیدو دی۔ جے اوہ کیدو دی گل کر رہے ہین تے پھیر ایہہ مطلب ہویا جو اوہ کڑیاں وچ پھسیا اگ دے انگیاریاں وانگ بھکھ رہیا ہے یا انگیارے پھک رہیا ہے۔ اوس دا رہت دی راکھی دا پیار انج ہی ہے جیویں چند تے چکور دی پریت ہووے جیہدا کدی کوئی حاصل نہیں۔ جے وارث شاہ اپنی گل کر رہے ہین یاں عشق دی گل کر رہے ہین تے پھیر ایہدا مطلب ایہہ ہووے گا جو عشق اگ دے انگیارے وانگ ہے۔ تے ایہہ وی بئی ہر عشق (وارث شاہ دا ہووے یا رانجھے دا) چند تے چکور دی پریت وانگ ہے جیس وچ وصل نہیں ہوندا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels