Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 142

ہیر وارث شاہ: بند 142

March 8th, 2011

142
کیدو لتھڑے پتھڑے خون ویہندے کُو کے باہوڑی تے فریاد میاں
مینوں مار کے ہیر نیں چُور کیتا پینچو پنڈ دیو، دیو کھاں داد میاں
کفنی پاڑ بادشاہ تے جا کوکاں میں تاں پُٹ سٹاں بنیاد میاں
میں تاں بولنوں ماریا سچ پچھے شیریں ماریا جیویں فرہاد میاں
چلو جھگٹریے بیٹھ کے پاس قاضی ایہہ گل نہ جائے برباد میاں
وارثؔ احمقاں نوں بناں پھاٹ کھادے نہیں آؤندا عشق دا ساد میاں

اوکھے لفظاں دے معنے
لتھڑے پتھڑے:مندے حال، لت پت ہونا، خونو خون ہونا
; باہوڑی:امان طلبی، اپڑنا، مدد لئی آونا; پینچو:پنچائتی
کفنی: فقیروں دا لما کرتہ ؛ پھاٹ: مار

سدھا مطلب

کیدو کڑیاں کولوں مار کھا کے خونوں خون  تریا جاندا ہے تے دہائی دے رہیا تے فریاد کر رہیا ہے۔

اوہ پنڈ دیاں پینچاں نوں کہندا ہے جو اوس نوں  ہیر نے مار مار کے چکنا  چور کردتا ہے تے اوس نوں انصاف ملنا چاہیدا۔

اوہ ایہہ وی دھمکی دے رہیا جو اوہ اپنا فقیراں والا لما جھگا پاڑ کے بادشاہ دے کول فریاد کراں گا تے بادشاہ   سب دی بنیاد پٹ دیوے گا مطلب سارے گراں نوں برباد کردیوے گا۔

اوہ کہندا ہے جو مینوں سچ بولن دی سزا ملی ہے جیویں شریں دے ہتھوں فرہاد مریا۔

پھیر اوہ ایہہ وی کہندا ہے جو ایہہ مقدمہ قاضی دے سامنے پیش کیتا جاوے تے دلیلاں دتیاں جاون

وارث شاہ کہندا ہے جو بے عقلاں تے بیوقوفاں نوں مار کھاہدے بنا عشق دا سواد نہیں آونا۔

 

کھلارواں مطلب

ایس بند وچ کیدو کٹیا پھاٹیا سپہلاں تے لوکاں سامنے فریاد  کردا نظر آوندا ہے  تے پھیر اوہ سیالاں دی پنچائیت  کول اپنا مقدمہ پیش کردا ہے۔  ایس بند وچ ایہہ وی پتہ لگدا ہے جو اوس ویلے دا عدالتی نظام کیہہ سی۔ کیدو سیالاں نوں انصاف کرن لئی کہہ رہیا ہے ، ایس لئی پہلی پوڑی تے پنچایت ہے۔ مطلب پنچائیت جگھڑیاں دا فیصلہ کرے۔ جے کر کسے دھر نوں ایہہ نیاں منظور نہ ہووے تے پھیر مقدمہ قاضی دے سامنے جاوے گا جیہڑا دلیلاں سن کے فیصلہ دوے گا۔ جے کوئی دھر قاضی دے فیصلے توں وی راضی نہ ہووے تے اوہ بادشاہ دے دربار وچ جاکے فریاد کر سکدا ہے۔

کیدو قاضی دے سامنے مقدمہ لے جان دی دھمکی دیندا ہے کیوں جو اوس دا خیال ہے جو قاضی ہیر یا کڑیاں دے حق دی گل نہیں کرے گا۔ اوہ کیدو دی طفداری کرے گا تے سیال جھوٹے پے جان گے۔ قاضی کول مقدمہ لے جان وچ ایہہ وی ہے جو اوہ سیال چوہدریاں دے برابر آ جاوے گا۔ اوس نوں وہم ہے جو سیال اوتھوں تیکر گل اڑاون توں ڈرن گے تے آپ ہی ہیر تے دوجیاں کڑیاں نوں سزا دے دیون گے۔

ایسے طرحاں  اوہ  جیویں بادشاہ دے دربار وچ جان دی دھمکی دیندا ہے اوس توں لگدا ہے جو اوس ویلے بادشاہ پیراں فقیراں دی گل بہتی سنندے ہوون گے۔ دوجے بادشاہ ظلم دے خلاف صرف دوشی نوں ہی نہیں سارے پنڈ نوں یا قبیلے نوں سزا دے سکدا ہے یا دیندا ہووے گا۔ ایسے لئی کیدو کہندا ہے جو " میں تاں پُٹ سٹاں بنیاد میاں"

اوہ اپنے آپ نوں فرہاد بنا کے وی پیش کردا ہے جیس نے پہاڑ وچوں نہر کڈھ دتی سی۔ اوہ وی سمجھدا ہے جو ہیر تے رانجھے دے عشق نوں پھڑنا فرہاد دے پہاڑ کھٹن جیڈا ہی اوکھا سی۔ ایسے لئی اوہدا دعوی ہے جو اوس نال وی اوہو ہو رہیا جو فرہاد نال ہویا سی۔ مطلب فرہاد نے جدوں نہر کڈھ دتی تے  بادشاہ نے جھوٹ بول دتا جو شریں تے مر چکی ہے تے فرہاد اپنے سر وچ تیسہ مار کے مر گیا۔ سو کیدو دا وی دعوی ہے جو جیویں شیریں پچھے فرہاد ماریا گیا ایویں ہی اوہ وی سچ بولن پچھے ماریا گیا ہے۔

اخٰری مصرؑے وچ وارث شاہ ہوریں ظاہرا طور تے  ٹچکر لا کے سواد لے رہے نیں جو احمقاں نوں مار کھاہدیاں عشق دا سواد نہیں آوندا۔ پر ٹچکر وچ اوہ ایہہ رمز وی مار رہے ہین جو کیدو احمق ہے جیس نوں ایہہ نہیں پتہ اوس نال سیالاں، قاضی تے باشاہ وچوں کسے نے وی نیاں نہیں کرنا۔ سیالاں اپنیاں دھیاں دا پکھ پورنا ہے تے قاضی نے سیال سرداراں دا۔ بادشاہ نے وی اوہو کرنی ہے جو سرداراں کہنی ہے۔ ایس لئی وارث شاہ دی نظر وچ کیدو احمق ہے جیس نوں پتہ ہے جو ایہہ نظام  نیاں  دیون لئی بنیا ہی نہیں۔

وارث شاہ دی نظر وچ کیدو ایس لئی وی احمق ہے جو عشق دے راہ وچے ڈکے لا رہیا ہے۔ عشق اک قدرتی لہر یا جذبہ ہے  جیس نوں روکنا احمقاں دا کم ہے۔ ایسے لئی وارث شاہ ہوریں  کہندے نیں جو احمقاں نوں پھاٹ کھاہدیاں بنا عشق دا سواد نہیں آوندا۔ مطلب اوہناں نوں عشق دے زور دی سر نہیں لگدی جو  اوہ اپنے اگے ڈکے لاون والے دے خلاف کیہہ کجھ کر سکدا ہے۔ ایتھے کیدو ایس لئی وی وڈھا احمق ہے جو جنہاں سیال سرداراں دی کڑی عشق کر رہی ہے اوہناں نوں تے پہلاں ہی پتہ ہے کہ کیہہ ہو رہیا ہے، تے اوہ ایویں بنا  لوڑ دے ایس پچھے پیا ہویا اے۔

 

 


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels