Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 143

ہیر وارث شاہ: بند 143

وچار ڈیسک
March 13th, 2011

چوچک آکھیا لنگیا جا ساتھوں تینوں ول ہے جھگڑیاں جھیڑیاں دا
سردار ہیں چور اُ چکیاں دا سونہاں بیٹھا ہیں ساہواں پیڑیاں (ساہیاں پھیڑیاں) دا
تینوں ویر ہے نال انجانیاں دے تے وَل ہے دب دریڑیاں دا
آپ چھیڑ کے پچھوں دی پھرن روندے ایہوچج ہے ماہنواں بھیڑیاں دا
وارثؔ شاہ ابلیس دی شکل کیدو ایہو مول ہے سب بکھیڑیاں دا

اوکھے لفظاں دے معنے
ساہواں پیڑیاں دا: سدھیاں راہواں دا؛ ایانیاں: نکے نیانے؛ ول: چج؛ دب دریڑیاں: ڈراؤڻا، تڑھیاں لاوڻا، دکھ تکلیف؛ بھیڑا: ناجائز لڑن والا

سدھا مطلب
ہیر دے پیو چوچک نے کیدو نوں کہیا جو لنگیا ساڈے توں دفع دور ہو جا کیوں جو تینوں بس لڑن جھگڑن دے طریقے ہی آؤندے نیں۔
توں چوراں تے اچکیاں دا سردار ہیں تے سدھے راہ جاڻ والیاں دی بنا وجہ دے ٹوہ لیندا رہنا ایں۔ جے ساہواں پیڑیاں نوں "ساہیاں پھیڑیاں" دا پڑھیا جاوے تے ایس دا مطلب ہے جو توں فسادی ساہی جٹاں دا جاسوس ہیں۔
تینوں اوہناں لوکاں نال وی ویر ہے جیہناں نوں توں جاڻدا وی نہیں تے تینوں لوکاں نوں ڈراوے دیڻ دے وی بڑے ڈھنگ آؤندے نیں۔ جے کر انجاڻیاں دی تھاں ایاڻیاں دے پڑھیا جاوے تے ایس دا مطلب ہووے گا جو تینوں معصوم نکے نیاڻیاں نال وی دشمڻی ہے۔
توں اوہناں لوکاں وچوں ہیں جیہناں دی عادت ہوندی ہے جو پہلاں آپ ہی دوجے نوں چھڑدے نیں تے پھیر آپ ہی روندے پھردے نیں۔
وارث شاہ ، کیدو ابلیس شیطان دی شکل ہے تے ساریاں جھگڑیاں دی ایہو جڑ ہے۔

کھلارواں مطلب
ایہہ بند کھلدا ہی واہی واڻ سماج دی اک وڈھی گالھ توں جدوں چوچک کیدو نوں کہندا ہے "لنگیا جا ساتھوں" واہی واڻ سماج وچ کروں پیروں ہیڻا ہوڻا اک بہوں وڈھا نقص تے گالھ ہے۔ واہی دا سارا کم ہی جُثے دے نروئے ہووڻ نال ہے تے جے اوس وچ کوئی نقص ہووے تے اوہ بندہ انج ہی تھلڑی پدھر تے جا ڈگدا ہے۔ فیر اجیہے جی وچ سارے نقص کڈھے جاندے ہیڻ تے اوس نوں فساد تے سازش دی جڑ من لیا جاندا ہے۔ ہو سکدا ہے جو سماج وچ کم توں آتھر اوہ بندہ وی ایہو جیہے پٹھے کماں وچ پیڻ تے مجبور ہو جاندا ہووے۔ کیدو وی اجیہا بندہ ہے جو ایہناں پٹھیاں کماں وچ پے گیا ہے تے سماج دے ہر بندے کولوں آپڻے گھٹیا سمجھے جاڻ دا بدلہ لیڻا چاہوندا ہے۔

وارث شاہ ایس طرحاں دے بندے نوں چھڑا کراں پیراں توں ہی نہیں سگوں اوس دیاں عملاں توں وی جاچدا ہے۔ یاد کرو ملاں دے نقص کڈھدیاں وارث شاہ ہوراں آکھیا سی، "انھے، کوڑے لولیاں وانگ بیٹھے قرعہ مرن جہان دا ماردے ہو" اوتھے ملاں کروں پیروں ہیڻا نہیں پر اوس وچ اوہ سب خصلتاں آ گیاں ہیڻ جو کیدو وچ ہیڻ۔ ملا وی پیداواری عمل تے ورتارے توں کٹیا ہویا ہے تے کیدو وی تے دوہاں دے رانجھے بارے وچار وی کافی سانجھے ہیڻ۔ جے ایس رمز نوں تھوڑی پرتا لوو تے ایہہ وی کہہ سکدے ہو جو چالو سماج دا مذہب، دھرم تے ریتی رواج کروں پیروں ہیڻے ہیڻ۔ اوہناں دا پیداواری طاقتاں نال کوئی سنبندھ نہیں ہے۔ اوہ ناں نوں سماج خاص مقصد لئی پالدا یا جھلدا ہے۔

ایس بند وچ ناٹک وی ہے جو چوچک آپڻی دھی نوں الزام توں بچاؤڻ لئی کیدو دے ہیڻے ہووڻ دے نال نال کیریکٹر دے دوجے پکھاں تے وی حملہ کردیندا ہے۔ عدالتاں وچ ایہہ ڈھنگ بڑا عام ہے جو دعویٰ کرن والے، مدعی یا گواہ دے کردار نوں بے اعتبارا یا گندہ ثابت کر دیو تے فیر اوس دی گل جج نہیں منندا۔ایسے لئی چوچک اوہنوں چور اچکیاں دا سردار تے فسادیاں دا جاسوس بڻا دیندا ہے۔ فیر ایہہ کہ کے جو تینوں نیاڻیاں یا انجاڻیاں نال اللہ واسطے دا ویر ہے تے توں اوہناں نوں دابے تھلے رکھڻا چاہوندا ہیں۔ مطلب تیری ہور کسے تے واہ لگدی نہیں توں معصوم لوکاں نوں ہی دابا دیڻا ہے ۔یعنی ہیر دیاں سہلیاں وی اوہناں وچ ہیڻ جیہناں نوں توں دابے وچ رکھڻ لئی الزام لا رہیا ہیں۔ فیر ایہہ وی جو تیرے ورگے بندے بندے آپ ہی دوجے نوں چھیڑدے ہیڻ تے فیر آپ ہی روندے ہیڻ۔

اخیری مصرعے وچ وارث شاہ کیدو نوں ابلیس دا درجہ دے کے اوس بکھیڑے ول سینت مار رہیا ہے جو ابلیس نے رب نال کیتی سی۔ اوس نے بندے نوں نہ من کے رب دی نافرمانی کیتی سی۔ مطلب رب نے جو عشق نال سرجیا سی ابلیس نے اوس نوں رد کردتا سی تے فیر اوس دا وطیرہ ہی پٹھی راہ تے پاؤڻا رہ گیا۔ کیدو دا کم وی ابلیس والا ہی ہے جیہڑا ہیر رانجھے دے عشق دی سرجڻا نوں رد کرکے سماج نوں پٹھی راہ تے لاؤڻا چاہوندا ہے۔ ایس رمز نوں وی پرتاکے ویکھو تے وارث شاہ ہوریں کہ رہے ہیڻ جو اصل وچ ابلیس بندے دی منفی تے پٹھی مت تے چلت ہے۔ یعنی ابلیس سماج توں یا بندیاں توں باہر رہڻ والی کوئی ہستی نہیں بندیاں دے اندر ہی رہندا ہے!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels