Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 145

ہیر وارث شاہ: بند 145

March 15th, 2011

جھوٹھیاں سچیاں چغلیاں میل کے تے گھرو گھری توں لوتیاں لاونا ہیں
پیو پُتراں توں یار یار کولوں مانواں دِھیاں نوں پاڑ وِکھاونا ہیں
تینوں بان ہے بُرا کماؤنے دی ایویں ٹکراں پیا لڑاونا ہیں
پرہاں جا جٹا پچھا چھڈ ساڈا ایویں کاسنوں پیا اکاونا ہیں

اوکھے لفظاں دے معنے
میل: جمع کرنا، اکٹھا کرنا؛ لُوتی: چغلی؛ پاڑ: اڈ؛ اکاوڻا: تنگ کرنا

سدھا مطلب
چوچک یا پوری پرہیا کیدو نوں کہندی اے کہ توں سچیاں جھوٹھیاں گلاں نوں اک دوجے نال رلا کے ہر گھر وچ جا کے چغلیاں کردا پھرنا ایں۔
توں پیواں پُتراں، یار یاراں تے ماواں دھیاں وچکار پاڑ پا دینا ہیں۔
تینوں برائی کرن دی لت پئی ہوئی ہے تے توں بنا کارن لوکاں نوں اک دوجے نال ٹکراؤناں ایں۔
توں ایتھوں دفع ہو جا کیوں جو توں سانوں تنگ پیا کرنا ایں۔

کھلارواں مطلب
ایہہ بند وی ویکھڻ نوں سدھ پدھرا ہی ہے جیس وچ چوچک تے دوجے سیال کیدو نوں چغل خور تے لڑائیاں کرواؤڻ والا کہہ کے نسا دیڻا چاہوندے نیں۔ ایہو جیہے کردار ہر تھاں تے ہوندے نیں۔ پر ویکھڻ والی گل ایہہ ہے جو چوچک نوں پتہ ہے جو ہو سکدا ہے اوہ سچ ہی کہہ رہیا ہووے تے کڑیاں نے اوہنوں ماریا ہی ہووے۔ پر سیال سرداراں نیاں تے کرنا نہیں ایس لئی اوہ کیدو تے ہی سارا ملبہ پائی جا رہے نیں۔

اک طرحاں کیدو دا کردار وی اوس ویلے دے ڈھیہندے سماج ورگا ہے۔ مغل شاہی وی کیدو طرحاں لنگی لولی ہو چکی ہے تے حکومت وچ ہر روز نویاں سازشاں ہوندیاں نیں نے اک دوجے دا تختہ الٹیا جا رہیا ہے۔ پراڻے مغل شاہی سماج دیاں نیہاں ہل چکیاں ہیڻ تے اوس تے کیدو ورگے سازشی ہی حکومت کر رہے نیں۔ ایہہ سازشی حکومتی ٹولے دے آپو وچ دے ٹاکریاں نوں ابھاردے نیں تے اوہناں دی بھن تروڑ کردے نیں۔

اصل وچ کیدو وی سیالاں دے جاگیرداری نظام دے پاڑ نوں ساہمڻے لیا کے اوہناں نوں تھلے لاؤڻا چاہوندا ہے۔ سیال اک پاسے تے دھیاں دی اڻکھ دے راکھے ہیڻ تے دوجے پاسے آپڻا کم کرواؤڻ لئی دھی دے رانجھے نال عشق نوں وی ہضم کیتی بیٹھے نیں۔ کیدو اوہناں دے ایس اندرلے ٹاکرے نوں بھنڈ کے آپ اُچا ہوڻا چاہوندا ہے۔ دوجے پاسے چوچک تے سیالا ں نوں پتہ ہے جو اوہناں دا سماج ایس دوہرے ورتارے تے ہی چل سکدا ہے تے اوہ کیدو نوں جھوٹھا کرکے اک پاسے کر دیڻا چاہوندے نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels