Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 146

ہیر وارث شاہ: بند 146

March 17th, 2011

دھروئی رب دی نیانوں کماؤ پینچو بھرے دیس وچ پھاٹیا کُٹیا ہاں
مرشد بخشیا سی ٹھوٹھا بھنیا نیں دھروں جڑاں تھیں لامیں پُٹیا ہاں
میں ماریا ویکھدے ملک سارے دھرُوہ کُرنگ موئے وانگوں سٹیا ہاں
ہڈ گوڈڑے بھن کے چور کیتے اَڑی دار گدّوں وانگ کُٹیا ہاں
وارثؔ شاہ میاں وڈا غضب ہویا رو روئی کے بہت نکھٹیا ہاں

اوکھے لفظاں دے معنے

دھروہی: ظلم دی دہائی، پکار؛ پھاٹیا: کٹیا، ماریا؛ ٹھوٹھا: پیالہ؛ بھنیا: توڑیاہے؛ جڑاں تھیں لا: جڑوں لے کے سارے دا سارا؛ مرشد بخشیا: مرشد دا دتا ہویا؛ کرنگ: ہڈیاں دا کاٹھا؛ اڑی:ضد، من مانی؛ نتاریا: ثابت کیتا

سدھا مطلب
کیدو پینچاں نوں کہندا جو میں رب دے ناں تے دہائی دیناں (دھروئی رب دی دا ایہہ مطلب وی ہو سکدا ہے جو میں جھوٹھ بولاں تے میرے تے رب دا قہر پوے) ، جو مینوں سارے لوکاں دے ساہمڻے ماریا کٹیا گیا ہے۔
اوہ میرا خاص پیالہ جو مینوں مرشد نے بخشیا سی اوہ وی بھن دتا گیا تے مینوں پوری طرحاں جڑاں توں پٹ دتا گیا گیا ہے۔
جدوں مینوں مار پے رہی سی تے سارے جہان نے ویکھیا تے فیر مینوں مردے وانگ سُٹ دتا گیا۔
میرے ہڈ گوڈے بھن کے چکنا چور کر دتے گئے تے مینوں ایویں کٹیا جیویں اڑی والی کھوتی نوں کٹیا جاندا ہے۔
میرے تے اینا ظلم ہویا جو میں رو رو کے بے حال ہو گیاں۔

کھلارواں مطلب
ایس بند وچ کیدو دی فریاد ہے تے ذکر ہے جو اوس نوں کیویں ڈاڈھے طریقے نال ماریا گیا۔ ایہہ ساریاں گلاں اسیں اوہناں بنداں وچ وی پڑھ ہٹے ہاں جنہاں وچ کڑیاں کیدو نوں مار رہیاں سڻ تے اسیں کہیا سی جو ایویں لگدا ہے جیویں کوئی دھاڑوی فوج حملہ کرکے علاقے اجاڑ رہی ہووے۔ اسیں ایہہ وی کہیا سی جو کیدو دا حال اوس ویلے دی مغل شاہی والا ہے جیہڑی لنگری لولی ہو گئی ہے تے اوس تے باہروں اندروں حملے ہو رہے ہیڻ۔

جے اسیں کیدو نوں اوسے لنگری لولی مغل بادشاہی دا وکھالا سمجھ لئیے تے لگدا ہے جو وارث شاہ ہوریں کہہ رہے ہیڻ جو اوہ نظام جیہڑا آپ ظلم کماؤندا سی (جیویں کیدو ہیر رانجھے نال کماؤندا ہے) تے فیر جدوں بھیڑے ویلے اوس نوں کُٹ پیندی ہے تے اوہ کیویں رب دیاں دہائیاں دیندا ہے۔ اوس نوں اوسے ویلے رب یاد آؤندا ہے۔

مرشد دے بخشے پیالے دے بھجڻ نوں اوس نظام دے روحانی نظام دے مُک جاڻ جوڑیا جا سکدا ہے۔ تسیں ویکھو ایس توں مگروں "دھروں جڑاں تھیں" پُٹے جاڻ دا ذکر ہے۔ مطلب نظام دے اندر دی طاقت دے مُک جاڻ نال پورا نظام ڈھے جاندا ہے۔ ایسے لئی اگلے مصرعے وچ "کرنگ موئے وانگ" سٹڻ دا ذکر ہے۔ یعنی نظام ٹٹ گیا تے اوس نوں مردہ سمجھ کے اک پاسے سٹ دتا گیا جیویں پنجاب وچ مغل شاہی نوں سٹیا گیا۔ تے ایہہ وی ہے جو ایہہ کسے سازش نال چپ چپیتے کم نہیں ہویا یا ہوندا سگوں سارا جہان ویکھ رہیا ہوندا ہے۔

وارث شاہ ہوریں کیدو نوں اڑی دار گدوں وانگ" کٹے جاڻ دی رمز راہیں ایہہ وی کہہ رہے ہیڻ جو کیدو سچی مچی اڑی دار گدوں ہے۔ اڑی دار گدوں اگے ٹُرن توں منکر ہو جاندی ہے تے فیر مار کھا کھا کے وی اڑی رہندی ہے۔ کیدو وی پراڻے نظام نوں پھڑ کے بیٹھا ہویا ہے تے اگے نہیں ودھڻا چاہوندا۔ ایس لئی اوس نال وی اوہو ورتیندا ہے جو اڑی پئی کھوتی نال۔ سماجی نظام دا وی ایہو ہوندا ہے جو جدوں اوہ پراڻے ورتارے تے اڑیا رہندا ہے جو نویں زمانے دے موجب آپڻے آپ نوں ڈھالدا نہیں اوہ مار کھاندا ہے۔ مغل شاہی نظام وی اک تھاں تے آ کے (اورنگ زیب دے نال) اڑ گیا سی تے فیر اوہ ڈیڑھ سو سال مار کھاندا رہیا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels