Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 147

ہیر وارث شاہ: بند 147

March 19th, 2011

کڑیاں سد کے پینچاں نے پچھ کیتی لنگا کاس تھوں ڈھاہ کے ماریا جے
اینویں باجھ تقصیر گناہ ماریا اکے کوئی گناہ نتاریا جے
حال حال کرے پر ہے وچ بیٹھا ایڈا قہر تے خون گزاریا جے
کہو کون تقصیر فقیر اندر پھڑے چور وانگوں گھٹ ماریا جے
جھگی ساڑ کے مار کے بھن بھانڈے ایس فقر نوں مار اتاریا جے
وارث ؔ شاہ میاں پچھو لڑکیاں نوں اگ لاء فقیر کیوں ساڑیا جے

اوکھے لفظاں دے معنے
نتاریا: ثابت کیتا؛ ماراتارنا:جانوں مارنا؛ گھٹ: رسے نال بنھ کے

سدھا مطلب
پینچاں نے کڑیاں نوں سد کے پچھیا پئی تسیں اک لنگے بندے نوں ڈھاہ کے کیوں ماریا ہے؟
تسیں اوس نوں بنا کسے گناہ دے ہی ماریا ہے یا پہلے ایہہ گل نتار لئی سی جو اوس وچ کوئی گناہ ہے۔
تسیں اوس تے ایڈا وڈا قہر کیتا ہے جو اوہ پرہیا وچ بیٹھ کے حال دہائی پا رہیا ہے۔
تسیں دسو جو ایس فقیر نے غلطی کیہ کیتی جو تسیں چور وانگوں رسے نال بنھ کے ماریا ہے۔
تسیں اوہدی جھگی وی ساڑ دتی، اوس دے بھانڈے برتن توڑ دتے تے اوہنوں لگ بھگ جانوں مار دتا ہے۔
وارث شاہ ہوریں کہندے نیں جو ایہہ کڑیاں کولوں پچھیا جاوے جو اوہناں فقیر نوں اگ لا کے کیوں ساڑ دتا۔ یا اوسدی جھگی تے وستاں کیوں ساڑ دتیاں۔

کھلارواں مطلب
ایس بند دے پہلے مصرعے دے سبھا توں ہی پتہ لگ جاندا ہے جو پینچ نیاں کرن لئی نہیں بیٹھے ہوئے اوہ اک ناٹک کر رہے نیں۔ اوہ کڑیاں نوں کیدو دے ناں دی تھاں "لنگا ڈھاہ" کے کیوں ماریا جے تے پتہ لگ جاندا ہے جو اوہ کڑیاں دے ساہمڻے ایہہ کہہ رہے نیں جو ایس گھٹیا جیہے ہیڻے تے بیکار بندے نوں کیوں ماریا ہے۔

فیر اگلے ہی مصرعے وچ اوہ کہہ رہے ہیڻ جو تسیں مارڻ توں پہلاں اوسدے گناہ دی پُڻ چھاڻ کر لئی سی یا نہیں۔ مطلب جے اوہناں پُڻ چھاڻ کیتے بنا وی اوس نوں ماریا ہوندا تے فیر وی کوئی ایڈی وڈی گل نہیں سی پر چنگا ایہو ہے جو اوہ پہلے اوس دے گناہ دی پُڻ چھاڻ کر لیندیاں۔ اوہناں دے ایہہ کہڻ توں جو "خون گذاریا جے" "گُھٹ ماریا جے" "مار اتاریا جے" "ساڑیا جے" پتہ لگ جاندا ہے جو اوہناں نوں پتہ ہے جو کڑیاں نے کیدو نوں کٹیا پھاٹیا ہے۔

اوہ کڑیاں تے الزام لاؤڻ دی تھاں کہہ رہے ہیڻ جو ویکھو چنگا بھلا بندہ جد پرہیا وچ حال دہائی پا رہیا ہووے تے اوس تے کوئی وڈا ظلم ہی ہویا ہووے گا نا۔ نہیں تے اوہ آپڻی عزت پرہیا وچ کیوں خراب کردا۔ اوہناں دے پچھڻ وچ لگدا ہے جو جیویں اوہ الزام لاؤڻ دی تھاں کہہ رہے ہووڻ جو تہانوں ایس ماڑے بندے تے ترس کھاڻا چاہیدا سی تے ایڈے بھیڑے طریقے نال نہیں ورتڻا چاہیدا سی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels