Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 148

ہیر وارث شاہ: بند 148

March 20th, 2011

منہ انگلیاں گھت کے کہن سبھے کارے کرن تھیں ایہہ نہ سنگدا اے
ساڈیاں ممیاں ٹوہندا توڑ گلھاں پچھوں ہوئی کے ستھناں سنگدا اے
سانوں کٹیاں کرے تے آپ پچھوں ساہن ہوئی کے ٹپ دا رِنگدا اے
نالے بنھ کے جوگ نوں جوء دیندا گتاں بنھ کے کھِچ دا تنگد اے
تیڑوں لا کہائی وتے پھرے بھوندا بھوں بھوں موتداتے نالے ٹھنگدا اے
وارث ؔ شاہ اجاڑ وِچ جائی کے تے پھلگناں اساڈیاں سنگھدا اے

اوکھے لفظاں دے معنے
کارے: بھیڑے کم؛ ممیاں: چھاتیاں؛ تیڑوں:کمر توں؛ موتدا: پیشاب کردا؛ رنگڻا: عیش و نشاط دا سواد لیڻا؛ نالے: ناڑے؛ تنگڻا۔ کس کے بنھ دیڻا؛ کہائی: فقیراں دی لنگوٹی؛ پھلکڻاں: شرم گاہواں؛ سنگھڻا: جنسی لذت لیڻا؛ ٹھنگڻا: ٹھونگے مارنا

سدھا مطلب
(کڑیاں پینچاں دے ساہمڻے کیدو نوں بدنام کرن توں پہلاں تے پوری طرحاں حیران ہوڻ دا ناٹک کردیاں ہیڻ (منہ انگلاں گھت کے) تے فیر کہندیاں نیں جو کیدو بھیڑے تے ذلیل کم کرن توں شرماؤندا نہیں۔
ایہہ ساڈیاں چھاتیاں نوں پھڑ کے ٹوہندا اے، ساڈیاں گلہاں پٹدا تے پچھوں دی ہوکے ساڈیاں ستھڻاں سُنگھدا اے۔
سانوں کٹیاں (نکی عمر دی مجھ) بڻا لیندا اے تے آپ جھوٹا یاں ساہن بڻ کے ساڈے تے ٹپدا تے جنسی سواد لیندا ہے۔
ایہہ ساڈیاں ستھڻاں دے نالے اک وجے نال بنھ دیندا اے (جیویں بلداں دی جوڑی ہل وچ جوئی ہوندی اے) تے ساڈیاں گتاں نوں اک دوجی نال گُھٹ کے بنھ دیندا اے۔
ایہہ آپڻی لنگوٹی لاہ کے ساڈے آلے دوالے بھؤندا ہے۔ موتدا پھردا ہے تے نالے ساڈے ٹھونگے ماردا ہے
ایہہ اجاڑ وچ جاکے ساڈیاں شرمگاہاں نوں سُنگھدا ہے۔

کھلارواں مطلب
ایس بند وچ وارث شاہ ہوراں کڑیاں راہیں جو کیدو دا نقشہ الیکیا ہے اوہ اک جنسی وگڑے تے بیمار انسان دا ہے۔ جنس دیاں ایہناں پکھاں تے وارث شاہ ہوراں توں وکھ کسے نوں لکھڻ دا حوصلہ نہیں پیا۔ پر وارث شاہ ہوریں جتھے وی بندے دے کردار دی گل کردے ہیڻ عام طور تے اوسدیاں جنسی عادتاں بارے ضرور کوئی اشارہ کردے ہیڻ۔ مثال دے طور تے جد اوہ ملاں دی گل کر رہے سڻ تے اوس دی منڈے بازی دا وی ذکر کیتا۔ ایسے طرحاں تسیں اگے وی ویکھو گے جو وارث شاہ ہوریں بھیڑے کرداراں دی جنسی عادتاں نوں جانوراں نال ملا دیندے ہیڻ۔ پر تسیں ویکھڻا جدوں اوہ ہیر رانجھے دے جنسی وصال بارے گل کرن گے تے لگے گا جیویں باغ بہاراں ہو گئیاں نیں۔

ایس بند وچ وی ویکھو تے اوہ وکھا رہے ہیڻ جو جنسی پدھر تے وگڑیا بیمار بندا جانوراں وانگ جنسی عمل کردا ہے۔ مثال دے طور تے عام جانور (چوپائے خاص طور تے) تے جنس لئی پہلے مادہ دی شرمگاہ دے آلے دوالے سنگھدے نیں جیویں کڑیاں کہندیاں نیں جو کیدو اوہناں دیاں پچھوں ستھڻاں (شلواراں) سُنگھدا ہے۔ فیر اگلے مصرعے وچ اوہ کیدو نوں جھوٹا یا ساہن کہندیاں ہی نیں جیہڑا اوہناں تے پچھوں دی ٹپدا ہے، مطلب پچھوں دی جنسی ملاپ دی کوشش کردا ہے۔ ایس توں اگلے مصرعے وچ اوس تے الزام ہے جو اوہ کڑیاں دے اک دوجی دے نالے بنھ کے ڈھگیاں دی جوڑی بڻا دیندا ہے، اک دوجی دیاں گتاں کس کے بنھڻ وچ ایہو الزام ہے۔

فیر جدوں کڑیاں کہندیاں نیں جو ایہہ آپڻی لنگوٹی لاہ کے اوہناں دے دوالے موتدا پھردا تے اوہناں نوں ٹھنگدا پھردا ہے تے ساڈے ساہمڻے اک چوپائے، ڈھگے یا سنڈھے دی شکل آجاندی ہے۔ عام طور تے چوپائے ہی جنسی ملاپ ویلے انج موتدے تے سنگاں نال ٹھنگدے نیں۔ ایسے طرحاں اخیری مصرعے وچ ایہو الزام ہے جو ایہہ اجاڑ وچ جا کے کڑیاں دیاں شرمگاہاں سنگھدا ہے جیہڑا کہ عام طور تے چوپائے کردے ہیڻ۔

ایس بند وچ کڑیاں راہیں کیدو یا کسے وی بندے دے جنسی وگاڑ تے بیماری دی گل ہوئی ہے۔ پر جے پچھلے بنداں طرحاں اسیں ایتھے وی وی کیدو نوں لنگرے لولے ڈھیندے مغل شاہی نظام دا لشکارا من لئیے تے فیر ایہدا مطلب ہووے گا جو مغل شاہی دی ڈھیندی رہتل وچ جنسی وگاڑ وی عام ہو گئے ہیڻ۔ تاریخ دان وی لکھدے ہیڻ جو ڈھیندے مغلئی وسیب وچ لکھنو، دلی تے ہور وڈھیاں شہراں وچ جنسی وگاڑ عام ہو چکیا سی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels