Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 149

ہیر وارث شاہ: بند 149

March 21st, 2011
5 / 5 (1 Votes)

اوہ آکھدا مار گوا دِتا ہڈ گوڈڑے بھن کے چُور کیتے
جھگی ساڑ بھانڈے بھن کھوہ داڑھی لاہ بھاگ پٹے پُٹ دور کیتے
ٹنگوں پکڑ گھسیٹ کے وچ کھائی تساں مار کے خلق حضور کیتے
وارثؔ شاہ گناہ تھوں پگڑ کافر ہڈ پیر ملائکاں چُور کیتے

اوکھے لفظاں دے معنے

بھاگ پٹے: متھے دے لمے وال؛ کھائی: ڈوہنگی نالی؛ خلق حضور کرنا: عوامی عدالت وچ پیش کرنا؛ بھاگ: بھنگ؛ لاہوڻا: مار مار کے نشہ لاہوڻا

سدھا مطلب
کیدو پینچاں نوں کڑیاں دے جواب توں مگروں کہندا ہے ایہناں نے میریاں ہڈیاں تے گوڈے مار مار کے چکنا چور کردتے ہیڻ۔
ایہناں میری جھگی نوں ساڈ دتا، میرے بھانڈے بھن دتے، میری بھنگ دا نشہ لاہ دتا (شریف صابر ہوریں کہندے ہیڻ جو لہندی پنجابی وچ نون غنہ گھٹ جاندا تے ایہہ اصل وچ بھانگ ہے یعنی بھنگ، مطلب کڑیاں کیدو دا بھنگ دا نشہ لاہ دتا) پر جے اسیں بھاگ نوں قسمت لئیے تے ایس دا مطلب ہووے گا جو میریاں وستاں تباہ کرکے میری قسمت ڈوب دتی۔ میرے سر دے لمے وال وی ایہناں پٹ کے اک پاسے کر دتے۔
مینوں لتوں پھڑ کے ڈوہنگی نالی وچ سٹیا تے مینوں سر عام بدنام کرکے ماریا گیا۔ وارث شاہ ہوریں آکھدے ہیڻ جو کیدو نوں انج کُٹ پئی جیویں قبر وچ فرشتے گناہگار بندے دیاں ہڈیاں چکنا چور کرن گے۔

کھلارواں مطلب
ایس بند وچ ورث شاہ ہوریں کیدو کولوں اوہ بلوا رہے نیں جو موت توں اگے گناہگار بندے نال ہوندا ہے۔ مذہبی کتاباں وچ گناہیاں نوں ایہو جیہیاں سزاواں ملڻ دا عام ذکر ہے۔ "مار کے خلق حضور کیتے" تے اخیری مصرعے توں جیس وچ فرشتیاں دا ہڈیاں چور کرن دا ذکر وارث شاہ ہوراں دے وچاراں دا کجھ پتہ لگدا ہے۔

اک گل تے ایہہ ہے جو گناہ دا مطلب اوہو جیہے کم نیں جیہڑے کیدو کر رہیا ہے۔ اوس دے جیس گناہ تے اوس نوں مار پیندی ہے اوہ ہیر دے خلاف چگلی یا ہیر رانجھے دے عشق وچ اڑکے پاؤڻ والے کم ہیڻ۔ ہیر تے رانجھا دو عاشق ہیڻ جیہڑے سماج دے گلے سڑے ورتارے، قبیلے، ذات تے طبقے نوں رد کرکے اک دوجے دے نال رہڻا چاہوندے ہیڻ۔ ایہہ اک اگے ودھو کم ہے۔ کیدو سماج دے پراڻے ورتارے نوں چالو رکھڻا چاہوندا ہے تے ویلے دے نال سماج نوں بدلڻ نہیں دیڻا چاہوندا۔ ایس کرکے اک اوہ دِھر یعنی زنانیاں اوس نوں سزا دیندیاں۔ مطلب ایس بند وچ کڑیاں رب دے فرشتے بڻ گیاں تے کیدو گناہی بندہ۔

جیہڑا بندہ یا نظام بدلڻ لئی تیار نہیں ہوندا اوس نوں سزا ملدی ہے تے اوہ اکثر تباہ برباد ہو جاندا ہے۔ مذہب شاعری تے وچار دھارا وچ ایس گل نوں ربی عذاب نال مک جاڻا کہیا ہے یاں قیامت ( مرن توں بعد حساب کتاب توں بعد سزا یا جزا ملنا) کہیا گیا ہے۔ پہلے کجھ بنداں وچ وارث شاہ ہوراں نے کڑیاں نوں کیدو تے پیڻ والا عذاب وکھایا سی تے ایس بند وچ مذہبی رنگ وچ گناہی دا مرن توں بعد سزا پاؤڻ دے طور تے۔ اصل وچ اوہ گل اک ہی کر رہے ہیڻ پر ہر بند وچ اوہدا رنگ بدل دیندے ہیڻ۔

جیویں اسیں پہلاں کہیا سی جو کیدو ڈھیندی مغل شاہی دا لشکارا ہے۔ جے ایس پکھ توں ویکھو تے وارث شاہ ہوری کہہ رہے ہیں جو مغل شاہی دی بربادی کڈی بھیڑی طرحاں ہو رہی ہے تے کیویں ایہہ ربی نظام دے مطابق ہو رہی ہے۔ ربی نظام دا مطلب ہے جو جیہڑا اگے ودھو لہر دی راہ ڈکدا ہے تے اک تھاں اڑ کے کھلو جاندا ہے اوہ برباد ہو جاندا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels