Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 150

ہیر وارث شاہ: بند 150

March 22nd, 2011

وار گھتیا کون بلا کتا دُھرکار کے پرہاں نہ مار دے ہو
اساں بھیڑے پِٹیاں ہتھ لایا تسیں ایتنی گل نہ سار دے ہو
پھر پھیجیاں مکریاں ٹھِکریاں نوں منہ لائیکے چا وگاڑ دے ہو
مٹھی مٹھی ہاں ایڈ اپرادھ پوندے دھیاں سَدّ کے پر ہے وچ ماردے ہو
ایہہ لُچ مشٹنڈڑا اسیں کڑیاں اجے سچ تے جھوٹھ نتار دے ہو
پُرس ہوئیکے نڈھیاں نال گھلدا تُسیں گل کیہ چا نگھاردے ہو
وارث ؔ شاہ میاں مرد سدا جھوٹھے رَنّاں سچیاں سچ کیہ تاردے ہو

اوکھے لفظاں دے معنے
وار گھتیا: صدقے، قربان؛ بھیڑے پٹیاں:گالھ، بھراواں دا ماتم کرن والی؛ ایتنی: اینی؛ سار:ثابت، سخت، لوہا، ٹھیک سمجھڻا؛ پھر بھیجیاں: مکار، فریبی، مٹھی مٹھی، لُٹڻا؛ اپرادھ: فساد جھیڑا؛ مشٹنڈڑا: آوارہ، بےگھر؛ پُرش: مرد؛ تارنا: خلاصی کرواڻا، کسے آسرے نال تر کے اک کنڈھے توں دوجے کنڈھے تے جاڻا؛ نگھار: نکھیڑنا، غرق ہوڻا یاں ڈُب جاڻا۔

سدھا مطلب
کڑیاں پینچاں نوں کہندیاں ہیڻ جو اسیں تہاڈے صدقے واری جائیے (ایس دا مطلب دہائی دیڻا وی ہو سکدا ہے) ایہہ کیدو کوئی بلا یاں کتا ہے ایس نوں دھتکار کے پرہے ماردے کیوں نہیں او؟
اسیں بھراواں دی سونہہ کھانیاں یاں اسیں بھراواں دے مرن نوں پٹیے جے اسیں جھوٹھ بولئیے ۔ تسیں ایہہ گل سمجھ وی کیویں سکدے ہو جو اسیں ایس نوں ہتھ وی لایا ہووے گا۔ یاں تہانوں ایہہ گل سمجھ کیویں پئی جو اسیں ایس نوں ہتھ وی لایا ہووے گا۔
تسیں ٹھگی، مکر فریبی لوکاں نوں منہ لاؤندے ہو (اوہناں دی گل سڻدے یا اعتبار کردے ہو) تے اوہ وگڑ جاندے ہیڻ۔
ساڈا دل ایس گل تے لٹیا جا رہیا ہے جو فساد ایڈا ودھ گیا ہے بئی تسیں آپڻیاں دھیاں نوں ہی پرہیا وچ سد کے سزا دیندے ہو۔ یاں ایہہ ایڈے فساد تے دل نوں خون کرن والا زمانہ آگیا ہے جو لوکیں آپڻیاں دھیاں نوں عدالت وچ سر عام سد کے مارڻ۔
ایہہ تے منیا لچا لفنگا ہے تے اسیں کڑیاں ہاں تسیں اجے وی سچ تے جھوٹھ دا نکھیڑا کر رہے ہو۔(مطلب ایہہ کیویں ہو سکدا ہے جو اک لچے لفنگے نوں عام جیہیاں کڑیاں مارن دا سوچڻ وی)۔
ایہہ مرد ہو کے جوان کڑیاں نال گھلدا ہے تے تسیں کیہڑی گل نکھیڑ رہے ہو، یا تسیں کیہ ایس طرحاں کرکے گلاں برباد کر رہے او۔
وارث شاہ کہندا ہے جو مرد سدا جھوٹھے ہوندے نیں تے عورتاں سچیاں ایس وچ سچ دا لبھڻا کاہدا۔ مطلب ایہہ گل تے پہلاں ہی سچ ہے، ایس وچوں ہور سچ کیہ کڈھڻا جو مرد جھوٹھے تے عورتاں سچ ہیڻ۔

کھلارواں مطلب
ایس بند وچ وارث شاہ ہوریں کڑیاں دا ناٹک وی وکھا رہے ہیڻ تے نال چاگھ (مذاق) وی کر رہے ہیڻ۔ سب نوں پتہ ہے جو کیدو نوں کٹیا پھانٹیا تے برباد کیتا گیا ہے، پر ایہہ ثابت کیویں کیتا جاوے؟ پنچائیت دوہاں دھراں دا پچھلا سبھا یا کردار ویکھے گی تے ایہہ وی ویکھے گی جو ملزم ایہہ جرم کرن دے قابل وی ہیسڻ یاں نہیں۔ مثال دے طور جے اک پہلوان الزام لاوے جو اوس نوں دس سال دے نیاڻے نے ماریا ہے تے عدالت یا پنچایت من نہیں سکدی۔ کڑیاں وی پنچائیت دیاں ایہناں کمزوریاں نوں ورت رہیاں ہیڻ۔

اوہناں دا ایہہ وی دعویٰ ہے جو کیدو منیا ہویا ٹھگ تے فریبی بندہ ہے اوس دی گل تے اعتبار کیویں کیتا جا سکدا ہے کیوں جو ایہو جیہا بندہ کوئی وی الزام گھڑ کے دوجے تے لا سکدا ہے۔ ایس لئی اک بے اتبارے بندے دے دعوے تے کڑیاں نوں پنچائیت وچ سدڻا بڑے ہینر والی گل ہے۔

کڑیاں ایہہ کہ جو اسیں تے (ماڑیاں) جہیاں کڑیاں ہاں اسیں اک لچے لفنگے مرد نوں مارڻ دا کیویں سوچ سکنیاں اوہ وکھا رہیاں ہیڻ جو اوہناں کول اوہ طاقت ہی نہیں جیس نال کیدو نوں ماریا گیا ہووے گا۔ ایس لئی پنچائیت ایس الزام نوں نتارڻ دا کم آپڻے ذمے لے کے سچ نوں غرق کر رہی ہے۔

عدالتاں وچ تریجا داؤ جذباتی ہوندا ہے ۔ کڑیاں اوہ وی ورت رہیاں نیں جو ایہہ کڈے قہر دی گل ہے جو دھیاں نوں سرعام پنچائیت وچ سدڻا۔

رمز ایہہ ہے جو کڑیاں جو کہہ رہیاں ہیڻ اوس دے مطابق کڑیاں تے الزام آ ہی نہیں سکدا تے پنچائیت ویلا برباد کر رہی ہے۔ پر اسیں جاڻنے ہاں جو ایہہ ہویا ہے۔ ایس دا مطلب ایہہ ہے جو کڑیاں دا یا عورتاں دا اک جتھہ بڻا کے اک مرد نوں پھینٹی لاؤڻا تے اوس نوں تباہ کرن دا ان ہوڻا کم ہویا ہے۔ مطلب ماڑی دھر کولوں آس نہیں ہوندی جو ورتارے نوں توڑ کے تگڑی دھر دے بندے نوں مارے گی۔ پر تاریخ وچ ایہہ ہوندا آیا ہے جو ماڑیاں دھراں جتھہ بند ہوکے تگڑیاں نوں تباہ کر دیندیاں ہیڻ جیویں وارث شاہ دے ویلے ماڑی جٹالی سکھ جتھیاں وچ جُڑ کے کر رہی سی۔

ایس دا ایہہ وی مطلب ہے جو بہتی واری تگڑیاں نوں پتہ وی نہیں لگدا جو ماڑیاں دھراں اوہناں نوں برباد کر سکدیاں ہیڻ۔ اوہناں دے منے اصولاں مطابق ایہہ انہوڻی ہے ۔ کڑیاں کیدو دی بربادی نوں انہوڻی بڻا کے پنچائیت نوں جھوٹھا کردیاں ہیڻ۔ پر حقیقت تے اوسدے الٹ ہے جو پراڻے ورتارے دے متھے اصولاں توں آزاد ہے!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels