Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 152

ہیر وارث شاہ: بند 152

March 26th, 2011

پینچاں کیدو نوں آکھیا صبر کر توں تینوں ماریا نیں جھکھ ماریا نیں
ہائے ہائے فقیر تے قہر ہویا کوئی وڈا ہی خون گزاریا نیں
بہت دے دِلاسڑا پونجھ اکھیں کیدو لنگے نوں ٹھگ کے ٹھاریا نیں
اِہناں چھوہریاں نوں جھڑک جھنب دے کے کول کیدو دے کوڑ پساریا نیں
کیدو آکھیا دھیاں دے ول ہو کے دیکھو دین ایمان نگھاریا نیں
وارثؔ اندھ راجاتے بیداد نِگری جھوٹھا دے دلاسڑا ماریا نیں

اوکھے لفظاں دے معنے
دلاسڑا: تسلی؛ پونجھ: صاف کر؛ ٹھگ کے ٹھارنا: دھوکا دیڻا، تسلیاں دیڻا؛ جھاڑ جھنب: ڈانٹ ڈپٹ؛ کُوڑ: جھوٹھ، فریب؛ پساریا: کھلاریا، وکھایا؛ نگھاریا: گنوایا، نپیا، ڈوبیا، گڈیا؛ اندھ راجا بیداد نگری: بے انصاف حکومت، زبردستی کرن والیاں دی وستی

سدھا مطلب
پینچاں نے کیدو نوں کہیا ہُڻ توں صبر کر، ایہناں کڑیاں تینوں مار کے جھکھ ماری ہے، غلط کم کیتا ہے۔
(پھیر پینچ ہرکھ دا ناٹک کردیاں کہندے نیں ) ایہہ بڑے غضب تے قہر والی گل ہے جو فقیر نوں ماریا گیا۔ فقیر نوں مارنا تے قتل کرن دے برابر ہے۔
پینچاں نے کیدو نوں بڑیاں تسلیاں دتیاں تے اوس دے اتھرو پونجھے۔ اصل وچ اوہناں کیدو نوں ٹھگی نال ٹھنڈا کیتا۔
کیدو کہندا ہے جو تساں آپڻیاں دھیاں دی طرفداری کیتی ہے تے آپڻا دین ایمان ڈوب دتا ہے۔
وارث شاہ ہوراں نوں پتہ ہے جو بستی دا راجہ انھا ہے تے سارا سماج ناانصافی نوں نہ منڻ والا ہے تے ماڑیاں نوں ناانصافی دے بدلے انصاف نہیں صرف تسلیاں مل سکدیاں ہیڻ۔

کھلارواں مطلب
پہلیاں مصرعیاں وچ ہی سانوں پتہ لگ رہیا سی پینچاں نوں پتہ ہے جو اوس نوں کڑیاں ماریا بھنیا تے اوس دی جھگی ساڑ کے اجاڑ دتی ہے۔ پر پہلے پیر توں ہی "لنگیا جا ساتھوں" اوس نوں جھوٹھا کرن دے جتن کردے ہیڻ۔ اوہ کڑیاں کولوں بیان دوا کے اوہنوں جھوٹھا وی کردے ہیڻ تے اوس نوں مکری فریبی جنسی بیمار وی اکھواؤندے ہیڻ۔ پر وچوں اوہناں نوں پتہ ہے جو ایہہ واردات ہو چکی ہے، پر اوہ آپڻیاں دھیاں دے خلاف فیصلہ وی نہیں کر سکدے کیوں جو سماج وچ آپڻے دھی پتر دے خلاف کوئی نہیں جاندا۔ سماج دے ورتارے دا پاڑ (تضاد ) ایہہ ہے جو انصاف کرن تے اوہ لوک لگے ہوئے نیں جنہاں دا مفاد انصاف نہ کرن وچ ہے تے جیہڑے انصاف کر ہی نہیں سکدے۔

کیدو ہے تے ڈھندے نظام دا لشکارا پر اوہ آپڻی مورکھتا (جیہڑی ڈھیندے نظام دی خاص صفت ہوندی ہے) وچ اوس پاڑ نوں کھول دیڻا چاہوندا ہے جیس تے پورا ورتارا کھڑا ہے۔ سیالاں (تے رانجھیاں) دا سماج کھڑا ہی اک پاڑ تے ہے۔ اوس وچ چوچک دی حیاتی تے چوہدر دے سادھن (اوہدا مجھاں دا اجڑ) رانجھا پیدا کردا ہے، پر اوہ چاک ہے تے کجھ نہ کرن والا چوچک سردار۔ ایہو معاشی پاڑ سماجی ریتاں وچ وی آپڻا وکھالا کردا ہے جو اک پاسے تے اڻکھ تے عزت تے جان دے دیڻ دے دعوے ہیڻ پر غرض پوے تے ایس توں اکھ بند وی کر لئی جاندی ہے جیویں چوچک آکھدا ہے "ساڈی دھی دا کجھ نہ لاہ لیندا چار دن تاں مجھیں چرا لئیے"

پینچاں دا جتھہ ایہناں پاڑاں نوں جاڻدا تے اوس تے عمل کردا ہے ۔ کیدو چاہوندا جو ایہہ پاڑ اک واری میٹیا (ختم) جاوے تے سیال سدھا انصاف کردیاں آپڻیاں دھیاں نوں سزا دیوڻ۔ پینچ ایہہ کر نہیں سکدے پر اوہ ایہہ وی نہیں چاہوندے جو کیدو آپڻی مورکھتا وچ ایس پاڑ نوں اگے ودھاوے۔ ایس لئی اوہ اک پاسے تے کیدو نوں ایہہ کہہ کے وڈیاؤندے ہیڻ جو فقیر نوں مارنا بڑے غضب والی تے قتل ورگی گل ہے ۔ اوس نال ہمدردی دیاں گلاں کردے تے دلاسے دیندے ہیڻ تے دوجے پاسے کڑیاں نوں ڈانٹڻ دا ڈرامہ وی کردے ہیڻ۔ پر وچوں وارث شاہ ہوراں نے کمال مصرعے راہیں سچ وکھایا ہے کہ "کیدو لنگے نوں تھگ کے ٹھاریا نیں"

کیدو نوں ایس سارے ناٹک دا پتہ ہے پر اوہ کر کجھ نہیں سکدا۔ جیس تے وارث شاہ ہوریں کیدو نوں کہ رہے ہیڻ جو مورکھا ایہہ انھے راجے تے بیداد نگری دی تھاں ہے۔ تے جے حاکم سچ ویکھڻ توں انھا ہووے تے وستی دے لوک وی ناانصافی نوں ویکھڻ لئی تیار نہ ہووڻ تے فیر انصاف ہو کیویں سکدا ہے؟ ایتھے نیاں دے ناں تے صرف جھوٹھے دلاسے ہی مِل سکدے ہیڻ۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels