Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 154

ہیر وارث شاہ: بند 154

April 3rd, 2011

کیدو آکھیا جیو تدبیر کر کے ایہہ جُوہ وِچ جاءِ کے کھیڈ دے نیں
میرے آکھیاں دھیاں نوں نہ مارن پِنڈ کون مارے خون بھیڈدے نیں
چھہیں تک کے جنگلے وچ آیا ایہہ ویکھ کارے ایس ڈھیڈدے نیں
وارث ؔ شاہ پرائیاں جھگیاں نوں اَگ لالنگے ہوری سینڈھ دے نیں

اوکھے لفظاں دے معنے
جُوہ: علاقہ، ویرانہ، چراگاہ؛ بھیڈ دے خون تے پنڈ مارنا: عام غریب بندے دی حیاتی دی کوئی قیمت نہیں؛ ڈھیڈ: ٹیٹھ، بے شرم، نیچ، مردہ ڈنگراں نوں چکّڻ والی قوم۔
سدھا مطلب
کیدو نے بہہ کے دل وچ دلیل کیتی جو ایہہ (ہیر تے رانجھا) جھنگ بیلے یاں چراہند (چراگاہ) وچ کھیڈدے نیں۔
[سیال] میرے کہڻ تے دھیاں نوں نہیں ماردے، ماڑے بندے دی زندگی دا کیہ مُل ہے ( مطلب میری مار تے بربادی پاروں پنڈ والے آپنیاں نوں کتھے مارڻ گے)۔
اوہ چھہہ لا کے جنگل وچ آیا۔ ویکھو ایس ذلیل دے کڈے چالاکی والے بھیڑے کم نیں۔
وارث شاہ ہوریں کہندے ہیڻ جو ویکھو کیویں پرائیاں جھگیاں نوں اگ لا کے لنگے ہوریں سیکدے نیں۔
کھلارواں مطلب
ایس بند وچ اسیں اک پُٹھے تے سازشی دماغ دی بڻتر ویکھنے آں۔ اوہنے مار کھا کے سبق نہیں سکھیا سگوں بدلہ لیڻ دیاں تدبیراں سوچڻ لگ پیا۔ پُٹھے تے مارو ذہن دا مُڈھ ہی ڈھاؤن تے ہوندا ہے بھاویں اوہ بندیاں دے آپو وچ دے رشتے ہوڻ تے بھاویں سرجنا دا کوئی ہور آہر ہووے۔
کیدو وی اجیہا بندہ ہے ۔ وارث شاہ ہوراں اوہنوں ڈھیڈ یاں مرے جانور چکڻ والی ذات دا بندہ کہہ کے اوہدی اصل دس دتی ہے۔ جیویں مُلاں لوکاں دے مرن دی اڈیک کردا ہے اوسے طرحاں کیدو لوکاں نوں مارن تے شیواں نوں تباہ کرن دی سوچدا ہے۔وارث شاہ ہوریں ایہو جیہے ذہن دے پچھے آپڻے نکے ہوڻ (احساس کمتری) ول دھیان دواؤندے ہیڻ۔ جدوں کیدو کہندا ہے جو "پنڈ کوڻ مارے خون بھیڈ دے نیں" تے اوہ آپڻی ایس کمزوری نوں منندا ہے۔ ایس بھیڈ ہوڻ دے احساس نے اوہنوں فریبی، مکار تے لوک دشمڻ بڻا دتا ہے۔ اوہدا خیال ہے جو سیالاں نوں جھوٹھا کرکے یاں تے آپ بھیڈ نہیں رہوے گا تے یاں اوہ وڈیاں وڈیاں نوں بھیڈ بڻا دیوے گا۔
اوہ اک شکاری وانگ آپڻے شکار دیاں کمزوریاں توں کم لیندا ہے۔ مثال دے طور تے اوس نوں پتہ ہے جو رانجھا اک پردیسی تے نتھاواں بندہ ہے اوس کول کیہڑا کوئی محل ہے جیس وچ اوہ ہیر نوں لُک کے ملدا ہووے گا۔ اوہ نتھاواں کتے جنگل بیلے وچ ملدا ہووے گا۔ ایس لئی اوہ چھہہ لا کے جنگل ول جاندا ہے۔ بندیائی نوں منڻ والے تے مارُو بندیاں وچ ایہو مڈھلا فرق ہوندا ہے۔ بندیائی نوں منڻ والا دوجے دی تھوڑ یاں کمزوری نوں آسرا دیندا ہے تے مارُو ذہن اوہنوں مکاؤڻ دی سوچدا ہے۔
سماج دی پدھر تے وی ایہو سچ ہے۔ جو جے بندیائی دیاں طاقتاں بھارو ہوڻ تے سماج آپڻیاں تھوڑاں پوریاں کرکے اگے ودھدا ہے تے جے مارو طاقتاں اتے آ جاڻ تے فیر ڈھیڻ دا عمل شروع ہوجاندا ہے۔ جیویں اسیں پہلاں کہیا ہے جو کیدو ڈھندے نظام دا لشکارا ہے اوہ ایس بند وچ وی ثابت ہوندی ہے۔ کیدو اک مارُو شکتی ہے تے اوہ ہیر رانجھے دے سرجے ساک نوں اج ہی بھنڻا چاہوندا ہے جیویں اٹھارویں صدی وچ مارو طاقتاں باقی ملک نوں ڈھاہ رہیاں سڻ۔
کیدو وانگ سماج دیاں مارُو طاقتاں لوکاں دے گھر ساڑ کے سیکدیاں ہیڻ۔ تسیں جے وارث شاہ دے ویلیاں دی تاریخ نوں گوہ نال ویکھو تے تہانوں دِسے گا جو مغل شاہی دے اندر ایہو جیہے دھڑے بہت سڻ جیہڑے نادر شاہ تے ہور باہرلیاں بلاواں نوں سدے گھل کے بلاؤندے سڻ تے لکھاں لوکاں دی جان تے مال جاندا ویکھ کے خوش ہوندے سڻ۔ ایہو گل وارث شاہ ہوراں اخیری مصرعے وچ کہی ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels