Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 155

ہیر وارث شاہ: بند 155

April 6th, 2011

155
وڈی ہوئی اُشیر تاں جا چھہیا پوہ مانگھ کتا وچ کنواں دے
ہویا چھاہ ویلا تدوں وچ بیلے پھیر آن پئے سسّی پنواں دے
پونا بنھ کے رانجھے دے ہتھ ملیا ڈھیر آ لگے اتے چنواں دے
بیلا لالو ہی لال پکاردا سی کیدو پے رہیا وانگ گھنواں دے

اوکھے لفظاں دے معنے

اشیر: سویر، تڑکے: کنواں: پرالی دا ڈھیر جیس وچ کتے وڑ کے آرام کردے نیں؛  چھاہ ویلا: تڑکے تڑکے، سورج چڑھن توں اک دو گھنٹے پہلاں دُدھ رڑکن دا وقت؛ بیلے: جنگل؛ پونا: اوہ رومال یا کپڑا جیس وچ روٹی بنھی جاندی ہے؛
چنواں: پھل کا ریاں ، لال دوپٹے؛  گنھواں: گنھا توں۔ اوہ بندہ جیہڑا سب کجھ جانن دی کوشش وی کرے تے جان بُجھ کے گل نوں لکاوے وی۔

 

سدھا مطلب

تڑکے تڑکے ہی کیدو جنگل وچ انج چھیہہ لا کے بیھ گیا جیویں پوہ ماگھ دی ٹھنڈ وچ کتا پرالی وچ اپنے آپ نوں لکا  لیندا ہے۔

جدوں اجے تڑکے دُدھ رڑکن دے ویلے ہی سن تے جنگل وچ سسی پنو اں نے آن کے ڈیرے لا دتے۔

رانجھے دے ہتھ روٹی والا رومال وی آگیا تے آل دوالے پھلکاریاں تے لال دوپٹیاں دے  ٖڈھیرلگ گئے (ہیر تے اوسدیاں سہیلیاں  آگیاں)۔

سارا جنگل  لالو لال ہو گیا سی۔ اوس ویلے کیدو گُنّھا  بن کے لما پیا رہیا۔

 

کھلارواں مطلب

ایس بند وچ ویکھو کیویں وارث شاہ ہوریں اک ٹکروایں تصویر کچھدے ہین۔ سویر ہوئی ہے، حیاتی نویں سرے توں شروع ہوئی ہے یا حیاتی جمی ہے تے اوس ویلے دوہیں ٹکراویاں طاقتاں کنج دِس رہیاں ہین۔ اک پاسے فریبی تے بدی دی طاقت ہے جیس نوں کتا کہہ کے پرالی وچ لکایا گیا ہے۔ دوجے پاسے نویں حیاتی دے وکھالے عاشق ہین جیہڑے  بیلے وچ لال پھلاں ونگ کھڑے ہوئے نیں۔"ڈھیر آلگے رتے چنواں دے" توں لگدا ہے جو ہیر تے اوہدیاں سہیلیاں نہیں آئیاں سگوں سگوں لال رنگ دے پھلاں دا اک ڈھیر لگ گیا ہے۔ اوس نال بیلا لالو ہی لال دی پکار دین لگ پیا اک گیت بن گیا۔ پر بدی دی طاقت گنگی بن کے چُپ ہوون تے مجبور ہے۔

پرالی چاولاں دے بوٹے توں چاول جھاڑ کے رہ جان والا خالی بوٹا ہے۔ عام طور تے پرالی نکیاں موٹیاں لوڑاں  مثلاً اگ سیکن لئی ایویں جئی وادھو تھاں تے ڈھیر کردتی جاندی ہے ۔اوس نوں کوئی بہتا دھیان وی نہیں دیندا جیس کرکے کتے بلیاں بہتی ٹھنڈ ویلے اہناں وچ لک کے اپنے آپ نوں بچاوندے ہین۔ کیدو دی حیثیت وی پنڈ دے کتے ورگی ہے جو پرالی وچ آکے لُک گیا ہے۔

 سماج وچ بدی دیاں طاقتاں وادھو پیاں شیواں وچ پلدیاں رہندیاں نیں ، کسے دی نظر وی اوہناں تے نہیں پیندی تے موقع ویکھ کے اگے ودھو طاقتاں تے وار کردیاں ہین۔ مغل شاہی دے اندر وی بہت پرالی سی جیس وچ کیدو ورگیاں طاقتاں لکیاں ہویاں سن جنہاں نے اوس دی تباہی پھیری۔ پاکستان وچ کنے ہی سال ملا شاہی انج پئی رہی جیویں کتا کنواں وچ لکیا ہوندا۔ کسے دا ایس پاسے دھیان وی نہیں گیا جو ایہہ مارو طاقتاں بن سکدیاں ہین۔

دوجے پاسے اگے ودھو طاقتاں ہین جو بیلے وچ وی پھلاں واہنگ ٹہکدیاں تے اک گیت وانگ بن جاندیاں ہین۔ ہیر رانجھا  تے ہیر دیاں سہیلیاں انج دی طاقت ہین ۔ وارث شاہ ہوراں دی ایس کھچی تحویر وچ  اوہ  لال پھلاں ونگ جنگل نوں سنگار رہیاں ہین۔

 

 

 

 

 

 


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels