Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 158

ہیر وارث شاہ: بند 158

May 21st, 2011

مہر ویکھ کے دوہاں اکلیاں نوں غصہ کھائی کے ہویائی رَت ونا
ایہہ ویکھ نگھار خدائے دا جی بیلے وچ اکلیاں پھرن رَناں
اکھیں نیویاں رکھ کے ٹھمک چلی ہیر کچھ وچ مار کے تھال چھنا
چوچک آکھیا رکھ توں جمع خاطر تیرے سوٹیاں نال میں لنگ بھناں

اوکھے لفظاں دے معنے
رت: لال، غصےنال لال۔
ونّا: ورگا۔
رت ونّا: خون وانگوں لال ہو گیا۔
نگھار: غرق ہوڻا۔
ٹھمک: مٹک۔
جمع خاطر: تسلی۔
لنگ: لتاں

سدھا مطلب
جد ہیر دے پیو مہر چوچک نے دوہاں نوں اکلیاں ویکھیا تے غصے نال خون وانگوں لال رتّا ہو گیا۔
اوہ کہند ایہہ خدا دی غرقی ہے جو جنگل وچ عورتاں اکلیاں پھرن۔
ہیر اکھاں نیویاں کرکے بغل وچ تھال تے چھنا لے کے مٹکاؤندی چلی گئی۔
چوچک نے اوہنوں کہیا توں تسلی رکھ میں تیریاں لتّاں سوٹے نال بھنّاں گا۔

کھلارواں مطلب
ہیر دا پیو چوچک دوہاں نوں ویکھ کے غصے نال لال ہو گیا حالاں کہ اوس نوں پہلاں وی پتہ سی دوہاں وچ عشق چل رہیا۔ پر آپڻے لابھ لئی ایس نوں ویکھڻا نہیں سی چاہوندا۔ اوہنے آپڻی اڻکھ دی ریت تے آپڻیاں مجھاں چراؤڻ دی غرض دے پاڑ نوں دل دی کسے نکر وچ تاڑیا ہو یا سی۔ پر ہُڻ جدوں کیدو نے اوہدا ایس پاڑ نال آہمڻا ساہمڻا کروا دتا تے اوہ غصے نال لال ہو گیا۔ اوہدا ایہہ غصہ ہیر رانجھے دے نال نال شاید آپڻے آپ تے وی ہے، یاں پاڑ توں پردہ چکے جاڻ تے۔

اوہدے لئی ایہہ قہر دی گل ہے جو زنانیاں اکلیاں جنگل وچ پھرن۔ ایتھے اوہنوں زنانیاں دی رکھیا دا فکر نہیں سگوں ایہہ ہے جو اوہ کسے بھیڑے کم لئی ہی اکلیاں جنگل وچ آئیاں ہوڻ گیاں۔ مطلب زنانی کول جنگل وچ اکلیاں جا کے دل ہولا کرن دی وی چوڻ نہیں۔ اوہ جائیداد ہے تے کسے نگرانی وچ اکلیاں ہو سکدی ہے کیوں جو اوہ اکلیاں ہووے تے آپڻی مرضی نال یاں زبردستی لٹی جا سکدی ہے۔ سو چوچک تے سماج لئی ایس لئی اکلی زنانی دا جنگل آؤڻا ربی نظام دا ردّ ہے۔ ایہہ جریا نہیں جا سکدا۔

تیجا مصرع وارث شاہ ہوراں بڑے ہُنر نال گھڑیا ہے۔ ہیر اکھاں نیویاں کرکے اوتھوں جا رہی ہے پر اوہدا جثّہ ٹھمکے مار رہیا ہے، مطلب اوہنے پیو دے ساہمڻے کوئی بدتمیزی نہیں کیتی تے ظاہر وچ اکھاں نیویاں کر لئیاں نیں پر اوہنے آپڻی چال توں وکھا دتا ہے جو اوہنے کوئی گناہ نہیں کیتا یاں کوئی بھیڑا کم نہیں کیتا۔ اوہدی روح تے اوہدا جثہ رانجھے دے عشق نوں سچائی منندا ہے تے ایہو گل اوہدی تور وچ اودوں وی ہے جدوں اوہنوں نموشی نال مرے تے ڈرے ہوڻا چاہیدا ہے۔ پر ہیر نوں نہ نموشی ہے تے نہ ہی ڈر۔

اخیری مصرعے وچ چوچک اوہنوں سوٹے نال لتاں بھنڻ دی دھمکی دیندا ہے۔ تسیں ویکھو کتھے تے اوہ پرہیا وچ بیٹھا چوچک جیہڑا کہہ رہیا سی جو میں اوہناں دی دھوڻ لاہ دیاں گا تے ویکھو کیویں اوہدے گھوڑے دے سنب کاڑ کاڑ وج رہے سڻ تے کتھے ایہہ بندہ جیہڑا سوائے سوٹے دے ہور کوئی دھمکی نہیں دے سکدا۔

چوچک دی ایہہ ٹکراویں تصویر وی اوس ٹٹدے بجھدے سماج دی تصویر ہے جیہڑا اصول قنون دے دعوے تے بڑے کردا ہے پر اوہناں وچوں کسے تے وی پورا نہیں اتردا۔ سیال جٹ تے پنجاب دے دوجے حاکم آپڻے لوکاں ساہمڻے تے بڑھکاں مار کے شیر بنندے نیں پر جدوں نادر شاہ یا کوئی ہور دھاڑوی اوہناں نوں آٹکردا ہے تے اوہ بکری ہو جاندے نیں۔ اک طرحاں ہیر تے رانجھا نویں سماج دے آگو ہیڻ، پراڻا سماج اوہناں دا ساہمڻیوں مقابلہ نہیں کر سکدا۔ ایسے لئی چوچک غصے نال لال ہوڻ تے سوٹے نال لتاں بھنڻ دی دھمکی توں ودھ کجھ وی نہیں کر سکدا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels