Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 159

ہیر وارث شاہ: بند 159

May 23rd, 2011

مہیں چھڈ ماہی اٹھ جاء بھکھا اوسدے کھان دی خبر نہ کسے لیتی
بھتا پھیر نہ کسے لیاونا ای ایدوں پچھلی بابلا ہوئی بیتی
مست ہو بے حال مہر کھلا جیویں کسے ابدال نے بھنگ پیتی
کِتے نڈھی دا چا وواہ کیچے اِیہہ مہر نے جیو دے وچ سیتی

اوکھے لفظاں دے معنے
بھتا: ناشتہ۔
بابلا: باپ۔
ابدال: پیر، فقیر، نیک بزرگ، اولیاء اللہ۔
وواہ: ویاہ۔
سیتی: فیصلہ کر لیا، دھار لیا

سدھا مطلب
ہیر کہندی ہے کہ ماہی (چروال) بھکھا ہی مجھاں لے کے جنگل چلا آیا سی، تے کسے نے اوہدی (کھاڻ پیڻ دی) خبر نہیں لئی۔
جو پچھے ہو گئی اوہ تے ہوگئی پر اج توں بعد کسے ہور ماہی دا بھتا نہیں لیاؤڻا۔ مطلب کسے نے تے پرواہ کرنی نہیں تے میں وی نہیں ایہہ کم کرنا۔
مہر چوچک ہیرا دا پیو ایویں ڈور بھورا ہویا ہے جیویں کسے ولی اللہ نے بھنگ پی لئی ہووے۔
دل وچ اوہنے پکا ارادہ کر لیا جو ہُڻ کڑی دا کتے ویاہ کردیڻا چاہیدا ہے (مطلب ویاہ توں بنا کوئی چارہ نہیں)۔

کھلارواں مطلب
ہیر ایتھے آپڻے پیو دی لکی ہوئی کمزوری تے غرض نوں ڈھال بڻا لیندی ہے۔ ہیر تے اوہدے پیو نوں وچوں پتہ ہے جو رانجھا اجے تیکر ایس لئی اوتھے ہے جو مجھاں نوں کوئی ہور نہیں سی چار سکدا۔ ہیر آپڻے پیو دی ایسے اندرلی لکی ہوئی کمزوری نوں اوس دے مُنہ تے ماردی ہے۔

اوہ ایہہ کہہ رہی ہے جو جے آپڻے کم لئی یاں مجھاں چارن لئی کسے بندے نوں رکھیا جاوے تے اوس دے روٹی ٹُک دا وی کسے نے پربندھ کرنا ہوندا ہے۔ اوہ بڻا بہانہ ہی رہی ہے پر اوہدا ذمے وار آپڻے پیو دی مجھاں چرواؤڻ دی غرض نوں بڻا رہی ہے۔ یاں اوہ ایہہ کہہ رہی ہے جو جے معاشی غرض ہووے تے اوہدے بدلے وچ کجھ دیڻا وی تے پیندا ہے۔

تیجا مصرع بڑا سوادی ہے۔ وارث شاہ ہیر دے پیو چوچک نوں مست یاں ڈور بھورا ہویا وکھالدا ہے تے اوہدی مثال انج دیندا ہے جیویں کسے ابدال نے بھنگ پی لئی ہووے۔ ایس وچ کئی نقطے ہیڻ۔ اک تے ہیر دے پیو دی سماجی آدر تے اوہدے دعوے ہیڻ تے دوجے پاسے اوہدی معاشی غرض ہے جس دا ذکر ہیر اوس دے مُنہ تے مار دیندی ہے۔ ایس اندر دے ٹکرا نال پہلاں اوہ لال رتا ہویا سی تے ہُڻ ڈور بھورا۔ تسیں ویکھو اوہو بندہ جیہڑا کجھ چر پہلاں غصے وچ لہو وانگ لال سی ہُڻ جھلیاں طرحاں مست جیہا ہو گیا ہے۔

وارث شاہ دے چوچک نوں بھنگ پیتے ابدال ورگا وکھاؤڻ وچ وی رمز ہے۔ اوہ ابدال دی تھاں فقیر وی لکھدا تاں وی مصرعے دا وزن پورا رہڻا سی۔ پر اوہنے جاڻ بجھ کے ابدال لکھیا۔ ابدال روحانی پدھر تے بڑا پہنچیا ہویا بزرگ ہوندا ہے۔ اوہنوں آپڻی روحانیت دا ہی بہت نشہ ہوندا ہے تے اوہدے وچ مست رہندا ہے۔ پر جے کسے ابدال نوں بھنگ پی کے مست ہوڻا پوے تے ایہدا مطلب ہے جو آپڻا ست مُک گیا ہے۔ چوچک دا حال وی بھنگ پیتے ابدال ورگا ہے جس دا آپڻا ست مُک گیا ہے تے اوہدی مت مار ی گئی ہے۔

چوچک دے بھنگ پیتے ابدال وانگوں دسڻ نوں اک ہور رنگ وچ وی ویکھیا جا سکدا ہے۔ جو ابدال کدی بھنگ نہیں پیندا اوہنوں آپڻا ہی بہت نشہ ہوندا ہے۔ پر جے اوہ بھنگ پی لوے تے فیر اوہدا حال ہور وی مستی والا ہو جاوے گا۔ چوچک وی رانجھے کولوں آپڻی غرض پوری کروا کے مست سی پر ہُڻ جدوں اوس غرض نے وکھالا کیتا ہے تے اوہدی سریوں مت مار گئی ہے۔ یاں ایہہ کہہ لوو جو پہلاں ہی اوس دے اندر پاڑ سی تے ہُڻ اوہ پاڑ جدوں اوہدے ساہمڻے آگیا ہے تے اوہدے ہوش حواس اڈ گئے نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels