Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 161

ہیر وارث شاہ: بند 161

May 28th, 2011

تُسیں گھل دیہو تاں احسان ہووے نہیں چل میلا اسیں آونے ہاں
گل پلڑا پائی کے ویر سبھے اسیں رُٹھڑا ویر مناونے ہاں
اساں آیاں نوں تسیں جے نہ موڑو تدے پئے پُکا پکاونے ہاں
نالے بھائیاں پنڈ دے پینچ سارے وارثؔ شاہ نوں نال لیاونے ہاں

اوکھے لفظاں دے معنے
میلا: رل کے، جتھا، پراڻے جٹکے ویہار وچ کسے رُسے نوں مناؤڻ لئی یاں کوئی غلطی معاف کرواؤڻ لئی جتھا بڻا کے جاندے سڻ جس نوں دوجی دِھر عام طور تے انکار نہیں سی کردی۔ جے مرداں دا میلا وی اسپھل (ناکام) ہو جاوے تے فیر زنانیاں دا میلا جاندا سی جیس نوں کوئی نہیں سی موڑدا؛
رُٹھڑا: رُسیا۔
پکا پکاؤنے : پکی گل کرنا

سدھا مطلب
رانجھے دے بھراواں نے سیالاں نوں لکھیا جو تسیں رانجھے نوں واپس گھل دیو نہیں تے اسیں میلا بڻا کے آؤنے ہاں۔
اسیں آپڻے گل وچ پلّا پاکے آپڻے رُسے ہوئے بھرا نوں منا لواں گے۔
جے تسیں سانوں آیاں نوں نہ موڑو تے اسیں آؤڻ دا پکّا کر لئیے۔
اسیں میلے وچ پنڈ دے سارے پینچ تے وارث شاہ ورگے شاعر وی لے آواں گے۔

کھلارواں مطلب
ایہہ پہلے بند والے ناٹک دی دوجی جھاتی ہے۔ ایس وچ رانجھے دے بھرا سیالاں دے دبا پاؤڻ لئی رِیت دا آسرا لے رہے ہیڻ جس دے مطابق جے دو بندیاں وچکار گل نہ مُکّے تے فیر ہور سیاڻے لوک اک خاص طرحاں نال گل دا نبیڑا کردے ہیڻ۔ رانجھے دے بھرا وی سیالاں نوں کہہ رہے ہیڻ جو جے تسیں ساڈی گل نہ منّی تے اسیں میلا کرکے تہاڈے کول آواں گے۔

وارث شاہ ایتھے پراڻی رِیت دا ڈھنگ دس رہے ہیڻ جس وچ جے اک پنڈ دے سیاڻے جتھا بڻا کے دوجے پنڈ والیاں کول جاڻ تے اوہناں نوں آدر کرنی پیندی ہے۔ رانجھے دے بھراواں نوں بڑی نموشی (شرمندگی) ہے جو اوہناں دا نکّا بھرا کسے ہور دی چاکری کر رہیا ہے۔ ایس لئی اوہ ودھ توں ودھ دبا پاؤڻا چاہوندے ہیڻ۔

ایس بند دی پڑھت اِنج وی ہو سکدی ہے جو فیر ایہہ رانجھا آپڻے ہی دل وِچ سوچ رہیا جو جے اوس دے بھرا پنڈ دا پینچا نوں نال لے کے میلا بڻا کے اوس نوں واپس لیجاڻا چاہوڻ تے اوہ کیہ کرے گا؟ اوہ نویں حیاتی دیاں راہواں تے اگّے ٹُردا رہوے گا یاں فیر رِیت نوں من کے پچھانہہ مُڑ جاوے گا۔ رانجھے نوں ایس مقام تے فیر فیصلہ کرنا ہے جو سماج دیاں مطابق جیوے یا اوہناں نوں توڑن دی راہ تے ٹُردا رہوے!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels