Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 162

ہیر وارث شاہ: بند 162

May 28th, 2011

چوچک سیال نے لکھیا رانجھیاں نوں نڈھی ہیر دا چاک اوہ منڈڑا جے
سارا پنڈ ڈردا اوس چاک کولوں سرماہیاں دے اوہدا کنڈڑا جے
اساں جٹ ہے جان کے چاک لایا دئیے تراہ جے جانیے گنڈڑا جے
ایہہ گبھرو گھروں کیوں کڈھیو جے لنگا نہیں کم چور نہ ٹنڈڑا جے
سر سوہندیاں بودیاں نڈھڑے دے کنیں لاڈلے دے بنے بُندڑا جے
وارثؔ شاہ نہ کسے نوں جان دا ہے پاس ہیر دے رات دینہہ ہنڈڑا جے

اوکھے لفظاں دے معنے
سارو: سارا
کنڈڑا: قبضہ، سایہ، قابو ہوڻا، کسے تے واگ پا لیڻی (جیویں ڈھگے یاں گھوڑے نوں پائی جاندی ہے۔
لنگا: لنگڑا
سدھا مطلب
چوچک سیال نے رانجھیاں نوں لکھیا جو ایہہ صرف ہیر سیال دا چاک ہے۔
سارا پنڈ رانجھے چاک کولوں ڈردا ہے تے پنڈ تے باقی ماہیاں یاں چروالاں دی واگ ایس دے ہتھ وچ ہے۔ یاں ایہہ اوہناں نوں نکیل پا کے رکھدا ہے۔
اسیں جاڻ بُجھ کے اک جٹ نوں چاک یاں نوکر بڻایا ہے۔ جے سانوں جاپے جو ایہہ گُنڈا بدمعاش ہے تے اسیں ایس نوں ڈرا دھمکا کے ایتھوں کڈھ دئیے۔
تسیں ایس مُنڈے نوں گھروں کیوں کڈھیا کیوں جے نہ تے لنگا ہے تے نہ ہی کم چور ہے۔
ایس دے سر تے بودے بڑے سوہڻے جاپدے ہیڻ تے ایس لاڈلے یاں شوقین دے کن وچ بندے پئے ہوئے ہیڻ۔
وارث شاہ وی کہندا ہے جو ایہہ رات دِن ہیر کول ہوندا ہے تے ایہہ کسے دی کوئی پرواہ نہیں کردا۔

کھلارواں مطلب
رانجھے دے بھراواں دے خط دے جواب وچ ہیر دے پیو چوچک نے لکھیا جو ایہہ ساڈا نہیں ہیر سیال دا چاک ہے۔ ایس نوں کوئی مجبور نہیں کر رہیا سگوں ایہہ آپڻے عشق لئی سب کجھ کر رہیا ہے۔سو چوچک کہہ رہیا ہے کہ اِک تے تسیں غلط بندے نوں موڑن لئی لکھ رہے ہو تے دوجے اِس دا مُڑنا کوئی ایڈا سوکھا نہیں جو ایہہ ہیر دے عشق وچ پھسیا ہویا۔ چوچک ایہہ گل رانجھیاں نوں جھوٹھیاں کرن لئی ایہہ گل لِکھ سکدا ہے۔ اُنج وی رانجھے کیہڑے ساہمڻے آکے اوس نوں شرمندہ کر سکدے ہیڻ۔ چوچک رانجھے دی محنت دا مُفت کھا رہیا ہے تے اوس نوں ہتھوں چھڈڻا نہیں چاہوندا۔ ایس لئی ساری ذمے واری ہیر تے پا رہیا ہے تاکہ رانجھے میلا کرکے جھنگ نہ پُج جاڻ۔

ہیر دی چاکری دا ذکر کرکے چوچک ایہہ وی دس رہیا ہے جو اوہ کوئی معمولی چاک نہیں سگوں سب چروالاں دا سردار ہے تے اوہنے سب نوں نکیل پائی ہوئی اے۔ مطلب رانجھا جھنگ سیال دا کوئی معمولی کمّی نہیں ہے جو رانجھیاں نوں شرمساری ہووے۔ سگوں اوہ ماہیاں دا سردار ہے تے اوہناں اُتّے اوس دی پنڈ وچ چودھر ہے۔

فیر چوچک رانجھے دے بھراواں کولوں ہی سوال پچھدا ہے جو ایہہ جوان مُنڈا تسیں گھروں کیوں کڈھیا ہے، ایہہ نہ تے لنگا ہے، نہ ٹُنڈا تے نہ ہی کم چور ہے۔ مطلب جے ایس دے کر پیر خراب ہوندے تے تسیں گھروں کڈھ دتا ہوندا تے سانوں سمجھ آ جاندی پر چنگے بھلے کم کرن والے جوان نوں گھروں کیوں کڈھیا جے۔ یعنی واہی واڻ سماج وچ ہیڻے بندے نوں گھروں کڈھ دیڻا کوئی وڈی گل نہیں سی۔ جیہڑا بندہ نروئے جُثے نال واہی نہ کر سکے اوہدا بھار اوہدے بھیڻ بھرا وی نہیں سڻ چُکدے۔ چوچک ہوراں آپ کیدو نوں پنڈوں ایسے لئی کڈھیا ہویا جو اوہ لنگا ہے۔ ایس مصرعے توں سانوں کیدو دی آپڻے بھراواں تے اوہناں دی اولاداں نال دشمڻی دی وجہ وی سمجھ وچ آؤندی ہے۔ کیدو ایسے دشمڻی پاروں ڈگدے سماج دا رکھوالا بڻ گیا ہے تے آپڻے بھراواں دے اندرلے پاڑاں نوں چھیڑدا رہندا ہے۔

اگلا مصرعہ پچھلے مصرعے دا ہی ودھاء ہے۔ چوچک کہہ رہیا جو رانجھا چھڑا کم کرن والا جوان ہی نہیں ہے سگوں سوہڻا وی ہے جس دے سر تے سوہڻے وال ہیڻ تے کنیں مندراں پیاں ہوئیاں نیں۔

اخیری مصرعے وچ فیر چوچک ہیر تے ساری گل پا دیندا ہے ایہہ کہہ کے جو اوہ تے دن رات ہیر کول ہی ہوندا ہے۔ مطلب میتھوں کجھ نہ منگو کیوں جو اوہ تے دن رات رہندا ہی ہیردے نال ہے!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels