Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 165

ہیر وارث شاہ: بند 165

June 3rd, 2011

جدوں خط دتا لیا قاصداں نے نڈھی ہیر نے تُرت پڑھایا ای
سارے معاملے اُتے وجھاپ سارے گلہ لکھیا واچ سنایا ای
گھلو موڑ کے دیور اساڈڑے نوں منڈا رُس ہزاریوں آیا ای
ہیر سد کے رانجھنے یار تائیں سارا معاملہ کھول سنایا ای

اوکھے لفظاں دے معنے
وجھاپ: کارن، وکھیویں دا دکھ، احساس محرومی۔
واچ: پڑھنا، بولنا، زبانی یاد کرنا، غور کرنا۔
اساڈڑے: ساڈے۔
سارا معاملہ کھول سڻایائی: ساری گل دسی اے۔

سدھا مطلب
جدوں قاصداں ہیر نوں خط دتا تے اوہنے چھیتی نال اوس نوں پڑھوایا
پڑھن والے نے خط وچ لکھے سارے گلے الاہمے تے جدائی دے دُکھ دیاں گلاں پڑھ کے سڻایاں۔
خط وچ ایہو سی جو ساڈا دیور رُس کے آگیا ہے اوس نو ں موڑ کے گھل دیو۔
ہیر نے رانجھے یار نوں سد کے سارا معاملہ کھول کے دسیا۔

کھلارواں مطلب
ایس بند وچ پہلے تن مصرعے تے سدھا بیان ہے۔ ہیر دے چھیتی نال خط پڑھاؤڻ توں ایہہ اگھڑدا ہے جو اوہ رانجھے دے گھر والیاں دے معاملے نوں جانڻاں چاہوندی ہے ۔ ایس بند دا اخیری مصرعہ خاص ہے کیوں جو ایہہ دسدا ہے کہ ہیر نے رانجھے توں لکا کے آپ ہی بھابیاں نوں جواب نہیں دتا۔ اوہ بھابیاں نوں کورا جواب دے سکدی سی یاں ٹال سکدی سی جیویں ہیر دے پیو چوچک سیال نے کیتا۔ پر ہیر رانجھے نوں ہنیرے وچ نہیں رکھڻا چاہوندی۔رانجھے نوں پہلی وار ہیر کولوں ہی پتہ لگا ہے جو اوہدیاں بھابیاں اوہنوں موڑ لیاؤڻ لئی ترلا کر رہیا ہیڻ۔

ہیر کولوں رانجھے نوں سارا معاملہ دسوا کے وارث شاہ دوہاں دے ساہمڻے اگے جاڻ یاں مڑ جاڻ دیاں راہاں دی چوڻ رکھ دیندے ہیڻ۔ اوہ ایہہ وی وکھا رہے ہیڻ جو ہیر رانجھے دا معاملہ اک دوجے توں لُکیا ہویا نہیں تے اوہ ہر گل سانجھی سوچ نال کردے ہیڻ۔ سوچ دا سانجھیاں ہوڻا عشق دا لازمی انگ ہے جس نوں وارث شاہ ہوریں ایتھے اگھیڑ رہے ہیڻ۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels